|
| 1 |
|
| Wena setšhaba sa ka, theetša molao wa ka. Le utlwele ruri puo ya molomo wa ka. |
|
| 2 |
|
| Ke tlo ahlama ka hlaba diema, ka bola thopa tša bogologolo, |
|
| 3 |
|
| Tše re di kwilego ra di tseba re boditšwe ke botatawešo. |
|
| 4 |
|
| Re ka se di utele bana ba bona. Re anegela ditlogolo ditheto tša Morena, tša maatla a gagwe, le tša mehlolo a go e dira. |
|
| 5 |
|
| Bohlatse o bo tsemile ga Jakobo; ga Isiraele a bea molao, a o laelela borrawešo, gore ba o rute bana ba bona. |
|
| 6 |
|
| Gore ditlogolo tše di bego di sa tlo tšwelela di o tsebe; go tsebe bana ba go tlo belegwa; le bona ba eme ba botše bana ba bona. |
|
| 7 |
|
| Gore le bona ba bote Modimo, ba se lebale ditiro tša Modimo; ba diše ditaelo tša gagwe. |
|
| 8 |
|
| Gore ba se etše botatabo, moloko wola wa bonganga le wa lonya, wa dipelo tša go se tiiše, wa meoya ya go se botegele Modimo. |
|
| 9 |
|
| Bana ba Efuraimi, ba itlhamile ba swere bora, ba phekgogile mohla wa tlhabano; |
|
| 10 |
|
| Ba hlala kgwerano ba lahla, ba gana go ya ka molao wa gagwe. |
|
| 11 |
|
| Ba be ba lebetše ditiro tša gagwe, mehlolo ye ba e bonego a e dira. |
|
| 12 |
|
| A dira mehlolo, botatabo ba e bona kua nageng ya Egipita, le kua lešokeng la Tsoane. |
|
| 13 |
|
| A fatola lewatle a ba sediša, a hlopha meetse boka leboto. |
|
| 14 |
|
| Mosegare a ba etetša ka leru; bošego ka moka a ba etetša ka seetša sa mollo. |
|
| 15 |
|
| A fatola lentswe lešokeng, a ba noša meetse a kago a madiba a magolo. |
|
| 16 |
|
| A thula methopo lwaleng, ya ela boka dinoka tša meetse. |
|
| 17 |
|
| Le ge go le bjalo ba fela ba boela go mo senya, ba hlanogela yena yo godimodimo gona kua mahanateng. |
|
| 18 |
|
| Ba leka Modimo dipelong tša bona ka go lopa dijo ba di kganyogago. |
|
| 19 |
|
| Ba tsota Modimo ba re: A Modimo a ka kgona go re nea dijo lešokeng? |
|
| 20 |
|
| Ge e le leswika lona o tiile la tšwa meetse, dinoka tša ela; a le bogobe a ka kgona go re nea? A ka kgona go tlišetša setšhaba sa gagwe dinama? |
|
| 21 |
|
| Morena a di kwa, mme a galefa; mollo wa tukela ba Jakobo, kgalefo ya wela Isiraele. |
|
| 22 |
|
| Ka ge ba sa ka ba dumela Modimo, ba se ke ba mmota ge a tlo ba phološa. |
|
| 23 |
|
| A roma maru a le kua legodimong, a bula mejako ya leratadima. |
|
| 24 |
|
| A ba nešetša Mana ya go lewa, a ba nea mabele' a legodimo. |
|
| 25 |
|
| Ka moka ga bona ba ja bušwa bja barongwa, a ba romela dijo mme ba khora. |
|
| 26 |
|
| A tsoša phefo ya bohlabatšatši a le kua legodimong, a tliša le phefo ya borwa ka maatla a gagwe. |
|
| 27 |
|
| A ba nešetša nama bokalerole, dinonyana tša ata wa lešabašaba la lewatle. |
|
| 28 |
|
| A di tsokamiša mešašeng, mekutwaneng ya bona gwa nyeunya tšona. |
|
| 29 |
|
| Ba ja ba khora gagolo, a ba tlišeditše tše ba bego ba di kganyogile. |
|
| 30 |
|
| Gomme ya re ba sa ja ba sa kganyoga, dijo di sa le fa marameng, |
|
| 31 |
|
| Ba tukelwa ke bogale bja Modimo; a bolaya ba nonnego mo go bona, a rapalatša masogana a Isiraele. |
|
| 32 |
|
| Le bjale ba fela ba buša ba senya, ba se dumele mehlolo ya gagwe. |
|
| 33 |
|
| Yena a lesa matšatši a bona a felela lefeleng; nywaga ya bona ya ba ya lephakaphaka la boi. |
|
| 34 |
|
| E be e re ge a ba bolaya, ba mo lla, ba mmoela ba mo hlologetšwe, |
|
| 35 |
|
| Ba elelwa gobane Modimo ke yena lentswe la bona; ba elelwa gobane Yogodimodimo ke yena Mophološi wa bona. |
|
| 36 |
|
| Ba mmobolela ka melomo, ba mo aketša ka maleme, |
|
| 37 |
|
| mola pelo tša bona di sa mo gomarele, ba sa mmotegele kgweranong ya gagwe. |
|
| 38 |
|
| Mme yena, e le yo kgaugelo, o lebalela dibe, ga a iše tshenyegong; o gomiša kgalefo gantši, o lesa go tsoša bogale bja gagwe ka moka. |
|
| 39 |
|
| A eleletša a re: Ke ba nama, ba etša moya o fetago o sa boe. |
|
| 40 |
|
| Ke gantšintši ba mo hlanogela kua lešokeng, ba mmefela gona kua leganateng. |
|
| 41 |
|
| Ba fela ba boela go leka Modimo, ba šegamiša yena Mokgethwa wa Isiraele. |
|
| 42 |
|
| Ba širega letsogo la gagwe la mola a ba namolela manabeng. |
|
| 43 |
|
| Ba lebala matete a go a dira kua Egipita, le mehlolo ya molaleng wa Tsoane. |
|
| 44 |
|
| Ke tša mola a fetola noka ya bona madi, ba šitwa go nwa didiba tša bona. |
|
| 45 |
|
| Tša mola a roma dinta tša ba loma, le digwegwe tša ba senya. |
|
| 46 |
|
| Merogo ya bona a e gafela diji, tše ba di lemilego a di gafela tšie. |
|
| 47 |
|
| Merara ya bona a e rothotha ka sefako, le mego ya bona a e senya ka tšhwane. |
|
| 48 |
|
| Le dikgomo tša bona a di gafela sefako; mehlape ya bona a e gafela ditladi. |
|
| 49 |
|
| A ba romela bogale bja gagwe bo tuka, a befetšwe a hutlega; ya ba thomo ya barongwa ba go senya. |
|
| 50 |
|
| Bogale bja gagwe a bo thulela tsela; meoya ya bona a se e efele lehu, bophelo bja bona a bo gafela dinkhu. |
|
| 51 |
|
| Maitšibulo ohle a kua Egipita o a bolaile, dithakaletswalo metseng ya ba Hama. |
|
| 52 |
|
| Setšhaba sa gagwe a se ntšha, a se gapa bjalo ka mohlape lešokeng. |
|
| 53 |
|
| A ba iša a ba hleka, ba se tšhoge selo; mme manaba a bona a a ribegetša ka lewatle. |
|
| 54 |
|
| A ba iša mellwaneng ya gagwe e mekgethwa, fa thabeng ye a e tšerego ka tsogo la gagwe le maatla. |
|
| 55 |
|
| A raka dithšhaba ge ba sa fihla, a ba fa magae ka tengwa; meloko ya Isiraele a e agiša mo metseng ya ditšhaba tšela. |
|
| 56 |
|
| Fela, bona ba leka Modimo, ba rumola Yogodimodimo, ba se hlokomele, mabohlatse a gwe. |
|
| 57 |
|
| Ba goma ba hlanoga bjalo ka bontatabo, ba etša bora bjo bo hlephilego. |
|
| 58 |
|
| Ba mo rumola ka meboto ya medimo, ba mmefediša ka diswantšho tša medimo. |
|
| 59 |
|
| Modimo ge a bona fao a hutlega, a lahla Isiraele o šoro. |
|
| 60 |
|
| A ngala bodulo bjola bja Silo, Ngwako wola wo a o hlomilego gare ga batho. |
|
| 61 |
|
| A lesa letago la gagwe la išwa bothopa, bothšhephi bja gagwe bja wela diatleng tša manaba. |
|
| 62 |
|
| Setšhaba sa gagwe a se lahletša marumong, a galefetše naga ya gagwe. |
|
| 63 |
|
| Mollo wa fetša masogana a bona; basetsana ba bona ba hloka koša ya lenyalo. |
|
| 64 |
|
| Baperisita ba bona ba fela ka lerumo, mme bahlologadi ba se ba llele. |
|
| 65 |
|
| Yena Mong a bohle a ba a phafoga, eke o tsoga borokong, bjalo ka mogale e a bego a tlemilwe ke sebela. |
|
| 66 |
|
| A phekgola manaba a gagwe, a ba lahlela dihlonyeng tše di sa felego. |
|
| 67 |
|
| A lahla motse wa Josefa, a se kgethe leloko la Efuraimi. |
|
| 68 |
|
| A kgetha leloko la Juda, le thaba ya Tsione ye a e ratilego. |
|
| 69 |
|
| A ikagela Ntlokgethwa boka thaba, ya etša lefase le a le theetšego mehla e sa felego. |
|
| 70 |
|
| A kgetha Dafida mohlanka wa gagwe, a mo tšea a le merakeng ya dihuswana. |
|
| 71 |
|
| A mo tliša a etšwa dinkung, gore a tle a diše setšhaba sa gagwe sa gaJakobo, naga ya gagwe ya Isiraele. |
|
| 72 |
|
| Yena yeo a ba diša ka bolo bja pelo ya gagwe, a ba hlahla ka seatla se bohlale. |
|
|
|
|