×

Ika Bible 2018

Ẹbụ-ọma 80

1
Dodo, gọn ẹnyi ntịn, Onyẹ-ndu Izrẹlụ, ịyụ hụn e du ẹnyi ndị ebọn Josẹfụ nọkẹ atụnrụn! Ịyụ hụn nọdị alị elu chẹrobu ẹbụọ ahụn nwọn nku; dodo, ghọsị ẹka ị!
2
Gi ufiri Ifrem lẹ Bẹnjamini lẹ Manasẹ kpa ikẹn, n'ị zụọpụha ẹnyi!
3
Chuku, dodo dọnzini ẹnyi ihiẹn; gizi ẹnya rị mma lee ẹnyi nị ẹnyi nwọn nzụọpụha!
4
Osolobuẹ, Chuku ihiẹn ile rị okpuru ẹ, elee mgbe ekpere ndị nke i k'e webehi i iwe?
5
Y'e yegụọ wẹ ẹnya-mirin ri kẹ ihiẹn-oriri; y'e yegụọ wẹ ẹnya-mirin jun mkpu ra!
6
Y'e mẹgụọ alị ndị nọkunmẹni ẹnyi zụọma alị ẹnyi; ndị-iṅẹnrẹn ẹnyi rị nwan a mụ ẹmụ!
7
Chuku Ihiẹn Ile rị okpuru ẹ, dodo dọnzini ẹnyi ihiẹn; Gizi ẹnya rị mma lee ẹnyi nị ẹnyi nwọn nzụọpụha!!
8
Ẹnyi wụ vaịnị hụn ị gha Ijiptu wepụha, ị nọ chụpụ ndị alị ọzọ rị ichẹn-ichẹn gbọ ẹnyi ye.
9
Ị nọ rụnfọn ẹ, ọ gbọrị, shịagbarị alịnị ile.
10
O sue, du ọda-ọda, kpumẹ ugu, agalaba a nọ kpumẹdẹ okẹn osisi sida.
11
Agalaba a nọ sueshi azụụnnị d'e rudẹ Ohimin Mẹditerenia, sueshizi azụụnnị d'e ru Iyi Yufretisi!
12
K'i tikpọnị nwan mgbọn i tụnhunmẹ vaịnị hụ ị kụn, hụn ndị ile ghafekọnị gi nwan rị a ghọrị a?
13
Ezin-ọfịa hụ a dọgbu ẹ, anụ-ọfịa hụ a tagbu ẹ!
14
Chuku ihiẹn ile rị okpuru ẹ, dodo, kinhẹn nwan! Gha elu-igwee lee ẹnya, n'ị lebanzị vaịnịnị ẹnya:
15
vaịnịnị i gi ẹka ị gbọma, vaịnịnị nọ kẹ nwa i mẹ n'o zeni i!
16
E bigụọ wẹ ọkụn ye ẹ; e gbutugụọ w'a! Ndị nke i hụ a la iwi yeni ihiẹnni ile i gi a jụgbọ wẹ!
17
Dodo, gi nwan ẹka-nni i kwọndọn onyẹ ahụn ị họrị, onyẹ ahụn i mẹ n'ọ kanị ị ẹhụ.
18
Ogẹn ahụn, ẹnyi agbakịtọkọzị ị azụụn; mẹ ẹnyi lihizi, kẹni ẹnyi kpọku ẹfan ị.
19
Osolobuẹ, Chuku ihiẹn ile rị okpuru ẹ, dodo dọnzini ẹnyi ihiẹn; gizi ẹnya rị mma lemẹ ẹnyi kẹni ẹnyi nwọn nzụọpụha!!
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes