×

Ika Bible 2018

Ẹbụ-ọma 81

1
Bụ nị nị Chuku hụn wụ ikẹn ẹnyi ẹbụ ịghọghọ, yi ni ni Chuku Jekọpụ oro ịghọghọ!
2
Kpọma nị egu! Kụ nị ẹgede-chakachaka! Gi ni ụbọ-hapụ lẹ ụbọ-layẹ kpọ egu a sụọnị!
3
Gbu ni opi hụn ifọn gi pụ lẹ hụn ifọn gi shịagụ, gi kpọye mmẹmmẹ ẹnyi!
4
Iwu alị Izrẹlụ rọ, omẹnalị hụn Chuku Jekọpụ sị wẹ mẹsọnmẹ.
5
O ye ndị nke Josẹfụ wụ Izrẹlụ iwu hụ ogẹn ahụn o gi maye alị Ijiptu. M nụ olu m marịnlẹni, hụn sị m,
6
“Mmẹ bupụ ụnụ ibu igbọn uvun, napụ ụnụ ụkpalị igbọn.
7
Kẹ ụnụ kpọ m ogẹn nsọngbu, a zụọpụhaghọ m ụnụ, a gha m ebẹhụ zuerini akpara nọ a han za ụnụ, a nọ m mirin Mẹriba lele ụnụ.
8
Ndị nke m, gọn ni m ntịn, nị m gba ụnụ mkpịnsịn-ẹka ẹnya, omẹni ụnụ e kweri gi oku m dọn:
9
Efelẹ ni mmọn; akụlẹni ni mmọn ọwụlẹ isi alị.
10
Mmẹ wụ Osolobuẹ, Chuku ụnụ, hụn gha alị Ijiptu wepụha ụnụ. Shịapụ nị ọnụ ọhụnma-ọhụnma; m k'e hujun ẹ.
11
Kanị ndị nke m egọnni m ntịn; Izrẹlụ ekweyenini m.
12
M nọ la wẹ tọ nị wẹ gbasọnmẹ isi-akwanran wẹ, wẹ nọ mẹsọnmẹ ihiẹn obi wẹ ye wẹ.
13
Omẹni ndị nke m te k'e gọn m ntịn! Omẹni ndị Izrẹlụ te k'e sọn ụzọ m!
14
Nkẹ m'e mẹri ndị-iṅẹnrẹn wẹ ozigbo-ozigbo, ẹka m e bitụ ndị bunụmanị wẹ;
15
nkẹ ndị ile ize Osolobuẹ e ze a mamanị wẹ piripiri, la iwi jẹnrin ejẹn;
16
nkẹ Osolobuẹ e ye ụnụ ọka kachanrịn mma ri; gidẹ mirin-ẹnwụn gha imẹ ọmụma pụha yejun ụnụ ẹfọ.”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes