×

Ika Bible 2018

Ẹbụ-ọma 83

1
Chuku dodo, agbakwọlẹ nkịtịn! Chuku dodo, akpọkinlẹ ntịn, akụkụmalẹ ẹka!
2
E lee ndị-iṅẹnrẹn i kẹ wẹ rị a ban mban; ndị e we iwe i a kpamakwọ ikẹn!
3
Wẹ hụ e gi akọ e zuni ndị nke i umẹ, wẹ hụ e zuni ndị rị ị mkpa umẹ.
4
Wẹ hụ a sị ibe wẹ, “Bịa nị, nị ẹnyi tikpọ alị wẹ la iwi, kẹni ẹfan Izrẹlụ gụ!”
5
E zugụọnị wẹ i eje-umẹ; e kwerigbamagụọ wẹ bunụman'ị:
6
kẹ ndị alị Ẹdọm kẹ ndị Ishmẹlụ; ndị Mụabụ lẹ ndị Hagri;
7
ndị Gẹbalụ lẹ ndị Amọnụ lẹ ndị Amalẹki; ndị alị Filistia lẹ ndị bi alị Taya.
8
Ndị alị Asiria nkẹ a banyegụọnị wẹ; Asiria e yemẹgụọnị ụmụ Lọtụ ẹka!
9
Mẹ wẹ ihiẹn i mẹ ndị alị Midianị, ihiẹn hụn i mẹ ọkị-agha wụ Sisẹra lẹ eze wẹ wụ Jabini mkpẹnrẹn iyi Kishọnụ —
10
ndị hụn i tikpọ la iwi imẹ Ẹndọ, ozun wẹ e retọ alị nọkẹ nsịn.
11
Mẹ ndị-isi wẹ ihiẹn i mẹ Orẹbụ lẹ Zibu; gbu ndị-nze wẹ k'i dọn gbu Zẹba lẹ Zal'muna,
12
hụn te sị, “Nị ẹnyi weri ni ihiẹn wẹ, ezigbo alị Chuku ye wẹ hụn wẹ nọ a zụn anụ.”
13
Chuku m, dodo, mẹ wẹ ihiẹn ufere mẹ uzunzun, mẹ wẹ ihiẹn ufere mẹ ẹfịfịa-ọkpọnkụn.
14
Mẹ wẹ ihiẹn ọkụn e mẹ ọfịa, ihiẹn ọkụn e mẹ ọfịa elu ugu,
15
gi eje-ẹbi i chụ wẹ, gi okẹn ufere i rọn wẹ okẹn egun!
16
Gbe ifẹnrẹn ye wẹ ihun, Osolobuẹ, kẹni wẹ gbayemẹ ẹfan ị.
17
Ifẹnrẹn ya mẹ wẹ, ya mẹgbu wẹ jẹnrin ejẹn; wẹ fa, la iwi.
18
Mẹ wẹ marịn nị ịyụ sụọ, hụn ẹfan a wụ Osolobuẹ, wụ Onyẹ hụn Kachanrịnnị imẹ ụwa ile.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes