×

現代台語譯本羅馬字版

詩篇 86

1
Siōng Chú ah, kiû lí àⁿ hī-khang thiaⁿ góa, ìn góa, in-ūi góa khùn-khó͘ sàn-chhiah.
2
Kiû lí pó-chûn góa ê sìⁿ-miā, in-ūi góa sìn-khò lí. Góa ê Siōng-tè ah, lí ê po̍k-jîn óa-khò lí; kiû lí chín-kiù góa.
3
Chú ah, kiû lí lîn-bín góa, in-ūi góa kui-ji̍t kiû-kiò lí.
4
Chú ah, kiû lí hō͘ lí ê po̍k-jîn sim-sîn hoaⁿ-hí, in-ūi góa gióng-bōng lí, tùi lí kî-tó.
5
Chú ah, lí liông-siān, hoaⁿ-hí sià-bián; lí sù hong-sēng ê chû-ài hō͘ só͘-ū kiû-kiò lí ê lâng.
6
Siōng Chú ah, kiû lí àⁿ hī-khang thiaⁿ góa ê kî-tó, àⁿ-lo̍h thiaⁿ góa khún-kiû ê siaⁿ.
7
Góa tī hoān-lān ê ji̍t kiû-kiò lí, in-ūi lí ōe ìn góa.
8
Chú ah, chiah-ê sîn-bêng bô chi̍t ê ōe-tàng kap lí saⁿ-pí; in ê só͘-chòe mā bōe-tàng kap lí pí.
9
Chú ah, lí só͘ chō ê bān-bîn lóng ōe lâi kàu lí ê bīn-chêng phak-pài; in ōe êng-iāu lí ê miâ.
10
In-ūi lí úi-tāi, chòe kî-biāu ê sū; chí-ū lí sī Siōng-tè.
11
Siōng Chú ah, kiû lí chiong lí ê tō-lō͘ chí-sī góa, góa beh chiàu lí ê chin-lí lâi kiâⁿ; kiû lí hō͘ góa ēng choan-it ê sim kèng-ùi lí ê miâ.
12
Chú — góa ê Siōng-tè ah, góa beh choân-sim chheng-chàn lí; góa beh éng-oán êng-iāu lí ê miâ.
13
Lí si-lo̍h hō͘ góa ê chû-ài hiah-ni̍h tōa, ū kiù góa ê sìⁿ-miā bián lo̍h Im-hú siōng-chhim ê só͘-chāi.
14
Siōng-tè ah, kiau-ngō͘ ê lâng khí-lâi kong-kek góa; kui-tīn kiông-pō ê lâng siàu-siūⁿ góa ê sìⁿ-miā; in bô chiong lí khǹg tī gán-tiong.
15
Chú ah, lí sī jîn-chû un-tián ê Siōng-tè, bô khoài siū-khì, koh ū hong-sēng ê chû-ài kap sìn-si̍t.
16
Kiû lí oa̍t kè-lâi khòaⁿ góa, khó-lîn góa, chiong lí ê khùi-la̍t sù hō͘ lí ê po̍k-jîn, kiù lí lú-pī ê kiáⁿ.
17
Kiû lí hián-sī un-thāi góa ê chèng-kù, hō͘ oàn-hūn góa ê lâng khòaⁿ--tio̍h lâi kiàn-siàu, in-ūi Siōng Chú lí ū pang-chān góa, an-ùi góa.
Chinese TTVR
The Bible Society in Taiwan
:
保存笔记