×

Maayong Balita 2012

SALMO 86

1
Pamatii ako, O Ginoo, kag sabta ako, kay maluya ako kag wala sing ikasarang.
2
Luwasa ako sa kamatayon, tungod kay ako mainunongon sa imo, luwasa ako, kay ako imo alagad kag nagasalig ako sa imo.
3
Ikaw amo ang akon Dios, gani kaluoyi ako, O Ginoo, nagapangamuyo ako sa imo sa bug-os nga adlaw.
4
Lipaya man ang imo alagad, O Ginoo, tungod kay ang akon mga pangamuyo nagalambot sa imo.
5
O Ginoo, maayo ka sa akon kag mapinatawaron, puno sang mapinadayunon nga gugma sa tanan nga nagapangamuyo sa imo.
6
Pamatii man, O Ginoo, ang akon pangamuyo, dungga ang akon pagpangayo sing bulig.
7
Nagapanawag ako sa imo sa mga tion sang kagamo, tungod kay ginasabat mo ang akon mga pangamuyo.
8
Wala sing iban nga dios kaangay sa imo, O Ginoo, wala sing isa nga makahimo sang imo nahimo.
9
Ang tanan nga mga kapungsoran imo gintuga, gani magaabot sila kag magaluhod sa imo, magadayaw sila sang imo pagkagamhanan.
10
Ikaw gamhanan kag nagahimo sang makatilingala nga mga butang, ikaw lamang amo ang Dios.
11
Tudloi ako, O Ginoo, sang luyag mo nga himuon ko, kag ako magatuman sa imo nga may katutom, tudloi ako sa pag-alagad sa imo sa bug-os nga pagkatutom.
12
Magadayaw ako sa imo sa bug-os ko nga tagipusoon, O Ginoo nga akon Dios, isugid ko ang imo pagkagamhanan sa walay katapusan.
13
Daw ano kadako sang imo mapinadayunon nga gugma para sa akon! Ginluwas mo ako gikan sa kadadalman sang lulobngan.
14
O Dios, ang mga bugalon nagapalapit sa pagsumpong sa akon, may guban sang mapintas nga mga tawo nga nagatinguha sa pagpatay sa akon, mga tawo nga wala nagasapak sa imo.
15
Apang ikaw, O Ginoo, maluloy-on kag mahigugmaon nga Dios, indi madali mangakig, malulo sa gihapon kag matutom.
16
Balik ka sa akon kag kaluoyi ako, pabakura kag luwasa ako, tungod kay ako nagaalagad sa imo subong sang ginhimo sang akon iloy.
17
Pamatud-i sa akon ang imo kaayo, O Ginoo, ang mga nagadumot sa akon magakahuya, kon ila makita nga ikaw nagalipay kag nagabulig sa akon.
Ilonggo Bible 2012
Maayong Balita nga Biblia Philippine Bible Society, 2012
:
Save Notes