|
| 1 |
|
| O Ginoo, ang Dios sang akon kaluwasan; nagtuaw ako sa atubangan mo sa adlaw kag gab-i. |
|
| 2 |
|
| Palambuta ang akon pangamuyo sa imo atubangan, ilingig ang imo idulungug sa akon pagtuaw! |
|
| 3 |
|
| Kay ang akon kalag puno sang mga kalisdanan, kag ang akon kabuhi nagapalapit sa Sheol. |
|
| 4 |
|
| Naisipan ako upud sa mga nagapanaug sa Boho; subong ako sang tawo nga wala sing pagtabang, |
|
| 5 |
|
| ginpilak sa tunga sang mga patay, kaangay sang ginpatay nga nagahamyang sa lulubngan, nga wala mo na ginadumdum, kay nahamulag sila sa imo kamut. |
|
| 6 |
|
| Ginpahamtang mo ako sa madalum gid nga Boho, sa madulum nga mga duug kag sa mga kadadalman. |
|
| 7 |
|
| Ang imo kasingkal nagabug-at sa akon, kag ginpiotan mo ako sang imo tanan nga balud. Sela |
|
| 8 |
|
| Ginpalayo mo sa akon ang akon mga kilala; ginhimo mo ako nga kangil-aran sa ila. Natakpan ako kag indi ako makagowa; |
|
| 9 |
|
| ang akon mga mata nagahagas bangud sang kapipit-an. Nagpanawag ako adlawadlaw sa imo, O Ginoo; nauntay ko ang akon mga kamut sa imo. |
|
| 10 |
|
| Magapakita ka bala sing mga katingalahan sa mga patay? Magabangon bala kag magadayaw sa imo ang mga napatay? Sela |
|
| 11 |
|
| Ipahayag bala sa lulubngan ang imo malig-on nga paghigugma, ukon ang imo katutum sa Kalaglagan? |
|
| 12 |
|
| Makilala bala sa mga kadudulman ang imo mga katingalahan, ang imo pagkamatarung sa duta sang pagkalimot? |
|
| 13 |
|
| Apang sa imo, O Ginoo, nagtuaw ako; sa kaagahon ang akon pangamuyo magalambut sa atubangan mo. |
|
| 14 |
|
| O Ginoo, ngaa bala ginasikway mo ang akon kalag? Ngaa bala ginalipdan mo sa akon ang imo nawung? |
|
| 15 |
|
| Ginapiotan ako kag tagumatayon kutub pa sa akon pagkapamatan-on, samtang nagaantus ako sa imo mga kakugmat; ginalibogan ako. |
|
| 16 |
|
| Ang imo mabangis nga kasingkal nag-agi sa akon; ang imo mga kakugmat nagtapus sa akon. |
|
| 17 |
|
| Ginlibutan nila ako kaangay sang tubig sa bug-os nga adlaw; ginlikupan nila ako sing tingub. |
|
| 18 |
|
| Ginpalayo mo sa akon ang kahagugma kag abyan; ang akon kilala yara sa kadudulman. |
|
|
|
|