|
| 1 |
|
| Góa beh éng-oán chhiùⁿ-koa chheng-chàn Siōng Chú ê chû-ài, beh sè-sè-tāi-tāi soan-iông lí ê sìn-si̍t. |
|
| 2 |
|
| Góa bat kóng, “Lí ê chû-ài éng-oán kian-li̍p; lí ê sìn-si̍t chhin-chhiūⁿ thiⁿ bōe tōng-iâu.” |
|
| 3 |
|
| Lí ū kóng, “Góa kap góa kéng-soán ê lâng li̍p-iok, tùi góa ê po̍k-jîn Tāi-pi̍t soan-sè, |
|
| 4 |
|
| ‘Góa beh kiàn-li̍p lí ê hō͘-tāi kàu éng-oán, kian-kò͘ lí ê pó-chō kàu bān-tāi.’” |
|
| 5 |
|
| Siōng Chú ah, goān thiⁿ chheng-chàn lí kî-biāu ê chok-ûi, thiⁿ-sài tī chū-hōe tiong siōng-chàn lí ê sìn-si̍t. |
|
| 6 |
|
| Tī khong-tiong tó chi̍t ê ōe-pí-tit Siōng Chú? Chèng sîn-bêng tiong tó chi̍t ê ōe chhin-chhiūⁿ Siōng Chú? |
|
| 7 |
|
| I tī thiⁿ-sài ê gī-hōe tiong sī ū tōa ui-giâm ê Siōng-tè, pí it-chhè tī I sì-ûi ê sîn-bêng koh-khah thang kiaⁿ-ùi. |
|
| 8 |
|
| Siōng Chú — Bān-kun ê Thóng-sòe Siōng-tè ah, lí ê tōa koân-lêng tó chi̍t ê ōe-tàng kap lí pí? Lí tī ta̍k-hāng tāi-chì lóng hián-chhut sìn-si̍t. |
|
| 9 |
|
| Hái-chúi tiòng-koân, lí kā i koán-chè; hái-éng giâ--khí-lâi, lí hō͘ i pêng-chēng. |
|
| 10 |
|
| Lí chi̍t-ē-chhiú chiū phah-chhùi hái-koài La-hap-pek; lí ēng tōa khùi-la̍t ê chhiú phah-sòaⁿ tùi-te̍k. |
|
| 11 |
|
| Thiⁿ sio̍k lí, tōe mā lí ê; sè-kài kap bān-mi̍h lóng sī lí só͘ kiàn-li̍p. |
|
| 12 |
|
| Lâm kap pak sī lí só͘ chhòng-chō; Tha-po̍k-soaⁿ kap Hek-bûn-soaⁿ lóng hoaⁿ-hí chheng-chàn lí ê miâ. |
|
| 13 |
|
| Lí ê chhiú-kut ū koân-lêng; lí ê chhiú ū la̍t, lí ê chiàⁿ-chhiú gia̍h-koân-koân. |
|
| 14 |
|
| Kong-gī kap chèng-ti̍t sī lí pó-chō ê tōe-ki; chû-ài kap sìn-si̍t kiâⁿ tī lí bīn-chêng. |
|
| 15 |
|
| Ōe-hiáu tùi lí hoan-ho͘ ê lâng chin ū hok-khì! Siōng Chú ah, in beh tè lí ê bīn hoat-chhut ê kng lâi kiâⁿ. |
|
| 16 |
|
| In kui-ji̍t in-ūi lí ê miâ hoaⁿ-hí, in-ūi lí ê kong-gī khoài-lo̍k. |
|
| 17 |
|
| Lí sī in kî-biāu ê khùi-la̍t; in-ūi lí ê un-tián, goán ōe tit-tio̍h sèng-lī. |
|
| 18 |
|
| Siōng Chú sī goán ê pó-hō͘-chiá; Í-sek-lia̍t sîn-sèng ê Siōng-tè sī goán ê Kun-ông. |
|
| 19 |
|
| Lí chá bat tī īⁿ-siōng tiong tùi lí tiong-si̍t ê chú-bîn kóng, “Góa ū ēng hoa-koan tì tī ióng-sū ê thâu-khak; góa tùi chú-bîn tiong kéng-soán i, ko-seng i. |
|
| 20 |
|
| Góa chhē-tio̍h góa ê po̍k-jîn Tāi-pi̍t, ēng sèng-iû boah i. |
|
| 21 |
|
| Góa ê chhiú beh chi-chhî i; góa ê chhiú-kut beh sù i khùi-la̍t. |
|
| 22 |
|
| Tùi-te̍k bô hoat-tō͘ ēng kè-tì iâⁿ-kè i; hiong-ok ê lâng bô hoat-tō͘ khún-pek i. |
|
| 23 |
|
| Góa beh tī i ê bīn-chêng phah-chhùi i ê tùi-te̍k, phah-pāi hiah-ê oàn-hūn i ê lâng. |
|
| 24 |
|
| Góa ê sìn-si̍t kap góa ê chû-ài beh kap i tông-chāi, in-ūi góa ê miâ, i ōe tit-tio̍h sèng-lī. |
|
| 25 |
|
| Góa beh hō͘ i ê chhiú chhun kàu Tōe-tiong-hái, i ê chiàⁿ-chhiú chhun kàu Iù-hoat-la-tí-hô. |
|
| 26 |
|
| I beh tùi góa kóng, ‘Lí sī góa ê Pē, góa ê Siōng-tè, sī chín-kiù góa ê chio̍h-pôaⁿ.’ |
|
| 27 |
|
| Góa beh siat-li̍p i chòe tōa-kiáⁿ, chòe sè-chiūⁿ siōng-tōa ê kun-ông. |
|
| 28 |
|
| Góa beh tùi i chhî-siú chû-ài kàu éng-oán; góa kap i só͘ li̍p ê iok it-tēng bōe kái-piàn. |
|
| 29 |
|
| Góa beh pó-siú i ê hō͘-tāi kàu éng-oán, hō͘ i ê pó-chō chhin-chhiūⁿ thiⁿ hiah-ni̍h kú-tn̂g. |
|
| 30 |
|
| “I ê kiáⁿ-sun nā khì-sak góa ê Lu̍t-hoat, bô chun-siú góa ê bēng-lēng, |
|
| 31 |
|
| ûi-pōe góa ê kui-lē, bô chun-hêng góa ê kài-bēng, |
|
| 32 |
|
| góa beh ēng koáiⁿ-á hêng-hoa̍t in ê kè-sit, ēng piⁿ chhú-hoa̍t in ê chōe-ok. |
|
| 33 |
|
| Chóng-sī góa it-tēng bōe tùi i siu-hôe góa lóng-chóng ê chû-ài, mā bōe ûi-pōe góa ê sìn-si̍t. |
|
| 34 |
|
| Góa it-tēng bōe ûi-hoán góa ê iok, mā bōe kái-piàn góa kóng ê ōe. |
|
| 35 |
|
| “Góa kí ka-kī ê sèng-kiat kian-koat li̍p-sè, choa̍t-tùi bōe tùi Tāi-pi̍t kóng pe̍h-chha̍t. |
|
| 36 |
|
| I ê hō͘-tāi ōe thoân kàu éng-oán, i ê pó-chō tī góa ê bīn-chêng chhin-chhiūⁿ ji̍t-thâu hiah-ni̍h kú-tn̂g; |
|
| 37 |
|
| chhin-chhiūⁿ ge̍h éng-oán ún-kò͘, tī thiⁿ-téng choh khak-si̍t ê kiàn-chèng.” |
|
| 38 |
|
| Chóng-sī lí ū tùi lí boah-iû soán-li̍p--ê hoat siū-khì, kā i kū-choa̍t khì-sak. |
|
| 39 |
|
| Lí hòe-tû kap lí ê po̍k-jîn só͘ li̍p ê iok, chiong i ê hoa-koan tàn tī thô͘-kha thún-ta̍h. |
|
| 40 |
|
| Lí thiah-húi i só͘-ū ê siâⁿ-chhiûⁿ, hō͘ i ê pó-lúi pìⁿ-chòe pha-hng ê só͘-chāi. |
|
| 41 |
|
| Kè-lō͘-lâng lóng kā i chhiúⁿ-toa̍t; keh-piah-kok lóng kā i lêng-jio̍k. |
|
| 42 |
|
| Lí hō͘ i tùi-te̍k ê chiàⁿ-chhiú gia̍h-koân, hō͘ in lóng hoaⁿ-hí. |
|
| 43 |
|
| Lí hō͘ i ê to-kiàm tun--khì bōe-tàng ēng, hō͘ i tī kau-chiàn ê sî chiàn-pāi. |
|
| 44 |
|
| Lí chiong i koân-pèng ê koáiⁿ chhiúⁿ--khí-lâi, chiong i ê pó-chō chhia-tó tī tōe--ni̍h. |
|
| 45 |
|
| Lí kiám-chió i siàu-liân ê ji̍t-chí, hō͘ i tōa-tōa kiàn-siàu. |
|
| 46 |
|
| Siōng Chú ah, lí beh bih jōa kú, kàu éng-oán sī--bô? Lí chhin-chhiūⁿ hé to̍h teh siū-khì beh jōa kú? |
|
| 47 |
|
| Kiû lí tài-liām góa ê sìⁿ-miā hiah-ni̍h té, lí chhòng-chō ê sè-kan-lâng hiah-ni̍h khang-hu! |
|
| 48 |
|
| Siáⁿ-lâng ōe-tàng kú-tn̂g oa̍h--teh, bô kìⁿ-tio̍h sí, ōe kiù ka-kī ê sìⁿ-miā thoat-lī Im-hú ê koân-sè? |
|
| 49 |
|
| Chú ah, lí í-chêng ê chû-ài tī tó-ūi? Lí tùi Tāi-pi̍t li̍p-sè èng-ún ê sìn-si̍t tī tó-ūi? |
|
| 50 |
|
| Chú ah, kiû lí ōe-kì-tit lí ê po̍k-jîn só͘ siū ê lêng-jio̍k, ōe-kì-tit góa ê sim án-chóaⁿ sêng-siū lia̍t-kok ê bú-jio̍k. |
|
| 51 |
|
| Siōng Chú ah, lí ê tùi-te̍k án-ni teh bú-jio̍k lí ê po̍k-jîn; lí boah-iû kéng-soán--ê kiâⁿ kàu tó-ūi, in lóng tè teh kā i lêng-jio̍k. |
|
| 52 |
|
| Goān chheng-chàn kui hō͘ Siōng Chú kàu éng-oán! Amen! Amen! |
|
|
|
|