×

Bukuit Ne Tilil 2020

TIENWOGIKAL 89

1
Atieni agobo rirenetab ge ne bo Jehovah agoi koigeny: Abortoi eng’ kutinnyu imandang’ung’ eng’ ibinwek tugul.
2
Amu kiale, Teegoksei koigeny rirenetab ge. Igimit imandang’ung’ eng’ kipsengwetisiek.
3
Kigiyomisge ak nenyu ne kialewen, Kiayosiechi Daudi kiboitiondennyu, alenji,
4
Agimiti kesweguk koigeny, Ak agimiti ng’echereng’ung’ ne bo laitornatet agoi ibinwek tugul.
5
Ilosu kipsengwetisiek kwong’utiguk, ee Jehovah; Ak ilosu agine imandang’ung’ eng’ tuiyetab che tililen.
6
Amu mi ng’o eng’ barak ne kirogendoe Jehovah? Tos mi ng’o eng’ werikab che kimen ne kergei ak Jehovah,
7
Inendet Kamuktaindet ne kiywei mising’ eng’ tuiyetab che tililen, Ne kiywei kosiir tugul che kiyiem inendet?
8
Ee Jehovah, Kamuktaindet ne bo lugosiek, Ng’o ne bo kamuktaet ko u inye, ee JAH? Ak yiemin imandang’ung’.
9
Inye ne ibou wasetab ge ne bo nyanjet: Ye kang’eet mildaennyi bo ge igere kong’ kosis.
10
Kiituatui Rahab ko u ne kagebar. Kiiyeste buniguk eng’ eutab kimnateng’ung’.
11
Cheguk kipsengwetisiek, ak ng’ony agine: Inye ne kiiyai ng’ony ak che nyiitat oloto.
12
Kiitau iyai murot ne bo katam ak murot ne bo tai: Tiendos eng’ boiboiyet Tabor ak Hermon eng’ kaineng’ung’.
13
Itinye eut ne bo kamuktaet: Kim eung’ung’, ak toror eung’ung’ ne bo tai.
14
Ole tebe ng’echereng’ung’ ne bo bounatet ko imanda ak kiruoget: Indoenen rirenetab ge ak imanit.
15
Boiboen bik che ingen tiendab boiboiyet: Bendote ichek lapkeiyetab togeng’ung’, ee Jehovah.
16
Igasegei betut komugul eng’ kaineng’ung’: Ak kitorori ichek eng’ imandang’ung’.
17
Amu inye kororonindab kimnatenywa: Ak kitorori kuinennyo eng’ chameng’ung’.
18
Amu bo Jehovah long’ennyo; Ak bo Inendet ne Tilil ne bo Israel laitoriandennyo.
19
Kiing’alalji anyun cheguk che tililen eng’ ng’ang’utik, Ak ilenjini, Kaalaakyi toretet inendet ne nyigan; Kiatoror ne kigilewen eng’ bik.
20
Kianyoru Daudi kiboitiondennyu; Kiaiile inendet mwaitanyu ne tilil:
21
Ne tun kimitu eunnyu eng’ inendet; Igimiti agine eunnyu inendet.
22
Maimuchi bunyot koyachi inendet kiy ne ya; Anan konyalil weritab yaitiet inendet.
23
Atuatui bunikyik eng’ tainnyi, Ak abir che wechei inendet.
24
Ak tebyei koboto inendet imandanyu ak rirenennyu; Ak tororitu kuinennyi eng’ kainennyu.
25
Agochini eunnyi koboi nyanjet, Ak koboi ainosiek eunnyi ne bo tai.
26
Rirjina kolen, I baba inye, Kamuktaindennyu, ak ruandetab yetunennyu.
27
Ayae inendet koek taitanyu, Koeet kosiir laitorinik tugul che bo ng’ony.
28
Agonorjini rirenennyu koigeny, Ak tononi eng’ kimnatet kayomisennyu koboto inendet.
29
Achamjini iyotennyi agine kotebi koigeny. Ak ng’echerennyi ne bo laitornatet ko u betusiekab kipsengwet.
30
Ago ngo bagakta lagokyik ng’atutiennyu, Ak ngo mabendate kiruogutikyuk;
31
Ngot kobut konetisiosiekyuk, Ak ngo marib ng’atutikyuk;
32
Atigone anyun bistoenywa kirokto, Ak atigone tengektanywa birutik.
33
Ago maistoi rirenennyu kot kogestagei eng’ inendet, Amayae koek buch imandanyu.
34
Mabute kayomisennyu, Amawale kit ne kimong’une kutinnyu.
35
Kiayosie konyil agenge eng’ tililindanyu; Ale, Maberberi Daudi;
36
Tebyei iyotennyi koigeny, Ak ng’echerennyi ne bo laitornatet ko u asista eng’ tainnyu.
37
Kigimiti koigeny ko u arawet, Ak ko u baornatet ne bo iman ne mi barak.
38
Ago kiitimde ak iesie, Kiinerekyi neng’ung’ ne iilat.
39
Kiisas kayomiset ne bo kiboitiondeng’ung’: Ak kiing’wanit nariennyi ne bo laitornatet kot iwirji ng’ony.
40
Kiibut ng’otonokyik tugul; Kiiluul irimoikyik.
41
Rebe inendet tugukyik bik che siirtoi: Kigoek ne itewerat eng’ bikab kokwennyi.
42
Kiitoror eutab tai ne bo bunikyik; Kiigochi bunikyik tugul koboiboitu.
43
Ee, kiiweekyi let ng’atibindab rotwennyi ne bo chok, Amaigochi kobelis eng’ luget.
44
Kiiunde tililindanyi kogesgei. Ak kiiwirji ng’ony ng’echerennyi ne bo laitornatet.
45
Kiitil kong’ering’itu betusiekab ming’inatennyi; Kiilaakyi inendet tewernatet.
46
Iunyege kot kotianit, ee Jehovah? Laldos neregeguk ko u mat kot kotianit?
47
Ee, ibwat ole te nwagindab betusiekyuk: Kiitau iyai werik tugul che bo bik koek buch agobo nee?
48
Tos ng’o chi ne sobei ne mageerei meet, Ne tos sor sobondanyi eng’ kimnatetab meet?
49
Ee, Kiptaiyat, mi ano rirenosieguk che bo keny, Che kiiyosiechi Daudi eng’ imandang’ung’?
50
Ibwat, ee Kiptaiyat, sastaet ne bo kiboitiniguk; Ko u ye aiboti eng’ tegennyu keretab kong’ ne bo bik tugul che chang’;
51
Noto ne kigogerisie kong’ buniguk, ee Jehovah, Che kigogerate kong’ kakwautikab neng’ung’ ne iilat.
52
Iberurot Jehovah agoi koigeny. Amen, ak Amen.
Kalenjin Bible 2020
God's word open for all Bible Society of Kenya, 2020
:
Save Notes