|
| 1 |
|
| Atyeni agobo rireenetapkei ne po Kamuktaindet ne Toroor agoi koigeny: Aboortoi eng' kutinnyu imandang'ung' eng' ibinwek tugul. |
|
| 2 |
|
| Amu ki ale, Teegoksei koigeny rireenetapkei. Igimiit imandang'ung' eng' kipsengwet. |
|
| 3 |
|
| Ki imwa ile, “Ki kiyomiske ak nenyu ne ki alewen, ki ayosyechi Daudi kiboityondennyu aleenji: |
|
| 4 |
|
| ‘Agimiiti kesweguk koigeny, ak agimiiti ng'echereeng'ung' ne po laitornatet agoi ibinwek tugul.’ ” |
|
| 5 |
|
| Ilasu kipsengwet kwang'utiguk, ee Kamuktaindet ne Toroor; Ak ilasu agine imandang'ung' eng' tuiyetap che tiliileen. |
|
| 6 |
|
| Amu mi ng'oo eng' parak ne kirogendoe Kamuktaindet ne Toroor? Tos mi ng'oo eng' weeriigap che kiimeen ne kergei ak Kamuktaindet ne Toroor, |
|
| 7 |
|
| Ineendet Kamuktaindet ne kiywei miising' eng' tuiyetap che tiliileen, Ne kiywei kosiir tugul che kiyiem ineendet? |
|
| 8 |
|
| Ee Kamuktaindet ne Toroor, Kamuktaindet ne po lugoosyek, Ng'oo ne po kamuktaet ko uu inyee, ee Kamuktaindet ne Toroor? Ak yiemin imandang'ung'. |
|
| 9 |
|
| Inyee ne ibou wasetapkei ne po nyanjet: Ye kang'eet mildaennyi pogei igeregong' kosiis. |
|
| 10 |
|
| Ki ituatui Rahab ko uu ne kagebar. Ki iyeste puuniguk eng' eutap kimnateng'ung'. |
|
| 11 |
|
| Cheguuk kipsengwet ak ng'wony agine: Inyee ne ki iyai ng'wony ak che nyiitaat olooto. |
|
| 12 |
|
| Ki itau iyai murot kaataam ak murot tai: Tyendos eng' poiboiyet Tabor ak Hermon eng' kaineng'ung'. |
|
| 13 |
|
| Itinye euut ne po kamuktaet: Kiim eung'ung', ak toroor eung'ung' ne po tai. |
|
| 14 |
|
| Ole tebee ng'echereeng'ung' ne po pounateet ko imanda ak kirwooget: Indoenen rireenetapkei ak imanit. |
|
| 15 |
|
| Poiboen piik che ingen tyendap poiboiyet: Pendote icheek lapkeiyetap togeng'ung', ee Kamuktaindet ne Toroor. |
|
| 16 |
|
| Igasegei peetuut komugul eng' kaineng'ung': Ak kitoroori icheek eng' imandang'ung'. |
|
| 17 |
|
| Amu inyee karaaranindap kimnateennywa: Ak kitoroori kuinennyo eng' chameng'ung'. |
|
| 18 |
|
| Amu po Kamuktaindet ne Toroor long'ennyo; Ak po Ineendet ne Tiliil ne po Israel laitoryandennyo. |
|
| 19 |
|
| Ki ing'alaalji anyun cheguuk che tiliileen eng' ng'ang'utik, Ak ileenjini, Kaalaakyi toreteet ineendet ne nyigan; Ki atoroor ne ki kilewen eng' piik. |
|
| 20 |
|
| Ki anyooru Daudi kiboityondennyu; Ki aiile ineendet mwaitanyu ne tiliil: |
|
| 21 |
|
| Ne tuun kimitu eunnyu eng' ineendet; Igimiiti agine eunnyu ineendet. |
|
| 22 |
|
| Ma imuuchi puunyoot koyachi ineendet kiy ne ya; Anan konyaliil weeriitap yaityet ineendet. |
|
| 23 |
|
| Atuatui puunikyik eng' tainnyi, Ak abir che wechei ineendet. |
|
| 24 |
|
| Ak tebyei kobooto ineendet imandanyu ak rireenennyu; Ak tororitu kuinennyi eng' kainennyu. |
|
| 25 |
|
| Agoochini eunnyi koboi nyanjet, Ak koboi ainoosyek eunnyi ne po tai. |
|
| 26 |
|
| Riirchino koleen, Ii abba inyee, Kamuktaindennyu, ak rwandetap yetunennyu. |
|
| 27 |
|
| Ayae ineendet koek taaitanyu, Koeet kosiir laitorinik tugul che po ng'wony. |
|
| 28 |
|
| Agonorchini rireenennyu koigeny, Ak tononi eng' kimnateet kayomisennyu kobooto ineendet. |
|
| 29 |
|
| Achamjini iyotennyi agine kotebi koigeny. Ak ng'echerennyi ne po laitornatet ko uu peetuusyegap kipsengwet. |
|
| 30 |
|
| Ago ngo pagaakta lagokyik ng'atuutyennyu, Ak ngo ma pendatee kirwoogutikyuk; |
|
| 31 |
|
| Ngot kobut kaneetisyosyekyuk, ak ngo ma riip ng'atuutikyuk; |
|
| 32 |
|
| atigoone anyun pistoennywa kirokto, ak atigoone tengektonywa pirutik. |
|
| 33 |
|
| Ago ma istoi rireenennyu kot kogestagei eng' ineendet, Amayae koek puch imandanyu. |
|
| 34 |
|
| Mabute kayomisennyu, Amawale kiit ne ki mang'une kutinnyu. |
|
| 35 |
|
| Ki ayosye konyil agenge eng' tiliilindanyu; Ale, Ma perberi Daudi; |
|
| 36 |
|
| Tebyei iyotennyi koigeny, Ak ng'echerennyi ne po laitornatet ko uu asiista eng' tainnyu. |
|
| 37 |
|
| Ki kimiti koigeny ko uu arawet, Ak ko uu paornateet ne po iman ne mi parak. |
|
| 38 |
|
| Ago kiitimde ak ieesye, Ki inereekyi neng'ung' ne iilaat. |
|
| 39 |
|
| Ki isas kayomiset ne po kiboityondeng'ung'; ak ki ing'wanit naaryeennyi ne po laitornatet kot iwiirchi ng'wony. |
|
| 40 |
|
| Ki ibut ng'otonokyik tugul; Ki iluul irimoikyik. |
|
| 41 |
|
| Rebe ineendet tuguukyik piik che siirtoi: Ki koek ne iteweerat eng' piigap kokwennyi. |
|
| 42 |
|
| Ki itoroor eutap tai ne po puunikyik; Ki igoochi puunikyik tugul koboiboitu. |
|
| 43 |
|
| Ee, ki iweekyi let ng'atiibiindap rotwennyi ne po chok, Ama igoochi kobelis eng' lugeet. |
|
| 44 |
|
| Ki iunde tiliilindanyi kogeskei. Ak ki iwiirchi ng'wony ng'echerennyi ne po laitornatet. |
|
| 45 |
|
| Ki itil kong'ering'itu peetuusyegap ming'inatennyi; Ki ilaakyi ineendet teweernateet. |
|
| 46 |
|
| Iunyegei kot kotyanit, ee Kamuktaindet ne Toroor? Laldos nereegeguk ko uu maat kot kotyanit? |
|
| 47 |
|
| Ee, ibwaat ole tee nwagindap peetuusyekyuk: Ki itau iyai weeriik tugul che po piik koek puch agobo nee? |
|
| 48 |
|
| Tos ng'oo chii ne sabei ne ma keerei meet, Ne tos sar saboondanyi eng' kimnateetap meet? |
|
| 49 |
|
| Ee, Kiptaiyat, mi ano rireenosyeguk che po keny, Che ki iyasyechi Daudi eng' imandang'ung'? |
|
| 50 |
|
| Ibwaat, ee Kiptaiyat, sastaet ne po kiboitiniguk; Ko uu ye aiboti eng' tegeennyu kereetap kong' ne po piik tugul che chaang'; |
|
| 51 |
|
| Nooto ne ki kogerisye kong' puuniguk, ee Kamuktaindet ne Toroor, Che ki kogerate kong' kakwautigap neng'ung' ne iilaat. |
|
| 52 |
|
| Iberuurot Kamuktaindet ne Toroor agoi koigeny. Amen, ak Amen. |
|
|
|
|