×

Ika Bible 2018

Ẹbụ-ọma 90

1
Osolobuẹ, ịyụ wụ ebe obibi ẹnyi, gha alị lala.
2
N'i d'e ke ugu ọwụlẹ, n'i d'e ke ụwa lẹ ndị rịn'a, ịyụ wụ Chuku; ị wụ Chuku ẹdẹi; ịyụ wụzịkwọ Chuku jẹnrin-ejẹn.
3
Y'e mẹ ịhịan a lakin ẹjan; y'e sị, “Ịhịan mmaka, kin ni azụụn ebe ụnụ gha bịa!”
4
Ahụa nnụ-uku nọhụ kẹ akpọhịn ohu ẹnya ị, nọkẹ ụnyanhụn ghafegụnị, nọkẹ ebe ịhịan nọhụ ranhịn tẹnhin!
5
Y'e huru ịhịan nọkẹ mirin; w'a ghafehụ kẹ ụran e fọnpụ ịhịan ẹnya, wẹ nọhụ kẹ ẹfịfịa e suepụhahụ ụtụntụn:
6
ụtụntụn, o mẹ oyiyi, mẹ mọkọmọkọ; ẹnyasị, o shinwụn, kpọpụ nkụn.
7
I bumẹ olulu, ẹnyi a la iwi; ị kpọma ọnụma, egun a tụgbu ẹnyi.
8
Y'e bu njọ ẹnyi e che ihun i ogẹn ile; y'e wepụhadẹ njọ ẹnyi mẹ nzuzue ihun i.
9
Olulu-olulu kẹ y'e busọn ẹnyi ẹnyi e we nwụn, nwụnhụnhụ nọkẹ ebe ịhịan nọ kunpụ uzun.
10
Ahụa iri-kwasị-ọgụn ẹtọ sụọ kẹ ẹnyi a tọhụ; onyẹ nwọnkẹ ndụn, ọ tọ ahụa ọgụn ẹnọ; kanị elu ẹnyi wụ ọrụn-ọrụn lẹ nsọngbu-nsọngbu, o gini e mẹ emẹ, ogẹn ẹnyi e zu, ẹnyi e fepụ kẹ nnụnụ.
11
Onyẹ k'a s'ẹka marịnchanrịn kẹ olulu i zehan? Kẹ ọnụma ị han kẹ wẹ gi a tụ egun i.
12
Mẹ ẹnyi nwan ghọta kẹ ogẹn ẹnyi han, kẹni ẹnyi nwọnrin uche.
13
Osolobuẹ dodo, elee mgbe k'i k'e webehi iwe, n'i mẹni idibo i omikẹn!
14
Dodo, gi uwẹ ụtụntụn ghọsị ẹnyi ihiẹn-ọsụsụọ ị kẹ ndị nke i, kẹni ẹnyi hụn ụzọ e yi oro ịghọghọ, kẹni ẹfọ sụọsọnmẹ ẹnyi ụsụọ ẹnyi e we nwụn.
15
Mẹ nwan ẹnyi ghọghọ akpọhịn ole ahụn i ye ẹnyi afụnfụn, ahụa ole ahụn ẹnya hụn ẹnyi ihiẹn.
16
Dodo, mẹ idibo i hụnzị ọrụn-atụmẹnya ị; ghọsị ụmụ wẹ ọghọ ị.
17
Ọhụnma Osolobuẹ wụ Chuku ẹnyi ya ru ẹnyi ẹka; ya mẹ ihiẹn ẹnyi buche ẹka ghanị ẹnyi; ya dodo mẹ ihiẹn ẹnyi buche ẹka gha ihun!
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes