Ziazia Kekeapai 1978
|
| 1 |
| Gbia, mo adu ni gaani banye fu rika ngbatunga aboro dunduko. |
| 2 |
| Mbata abaagangara nikaenga, mbata mo nikamanga kpotosende na zegino, Mbori nga mo, mbata rago nikaenga nye anye kindi. |
| 3 |
| Kina ro nakaraga boro ku rogo nvutu sende, naya a, “Oni yéga berewe, awiri aboro!” |
| 4 |
| Bambiko agarã kutu sa bangiro wa kina gba ho si asusi ni, watadu wa kina maarago yuru. |
| 5 |
| Mo naroga aboro ku sa yo wa hihi ime, i ki du wa kina rame; wa kina gu nvuo nasona wiso ni fogo ho; |
| 6 |
| wiso si namaa pai, ki nisono; ono nyemu i ki de he ku sande, si ki ugu. |
| 7 |
| Bambiko ani nanyasa be ga zinga; ani nakiga akiga be ga era. |
| 8 |
| Mo amoi gaani irairapai ku bara bangiro, na gaani okooko ingaapai rogo gu imarago du ti kpakpuro. |
| 9 |
| Bambiko gaani arame dunduko nasusa rogo ga dingidingi ngbaduse, gaani agarã nadiga wa kina uko. |
| 10 |
| Rago tipa gaani agarã wa garã 70; ono ka ngia mbiko ngarã si ki du wa 80; ono gaha nyaka nga kina mbusa na irairapai; bambiko si nasusa ni ipo, ani ki ga ku sa yo. |
| 11 |
| Da ini pa gu ome du ti ga zinga, na pa ga dingidingi ngbaduse ka i gunde ti ro! |
| 12 |
| Mo yúgu pa geda gaani arame fu rani, ani di tatamana ku kpotorani yo. |
| 13 |
| Ako Yekova, mo káraga tiro! Rago adú waĩ? Mo dú na nunga fu avururo! |
| 14 |
| Ako, mo mbísi rani na ga weneringise wiso, ani ki ngbiko ki ningi angi rogo gaani arame dunduko. |
| 15 |
| Mo ngíisi rani rengbe tipa agu arago mo arungosi rani ti ni, na agu agarã ani abi gbigbitapai ti ni. |
| 16 |
| Mo ídi he fu avururo i bi ga sunge, na ga taarimo ku ri awiriyo. |
| 17 |
| Gu wene ngbanya nga ga Yekova gaani Mbori dú ku ri rani, mo nyákasi gu mangapai nga ga berani, ii, gu mangapai nga ga berani mo nyákasi he. |
| Save Notes |
https://beblia.bible:81/BibleAudio/zande/psalms/090.mp3
150
90