×

WẼNNAAM SEBRE 2014

Yɩɩla 92

1
Yɩɩlle. Yaa vʋʋsg daar yɩɩlle.
2
Yaa sõama tɩ d pʋʋs Sẽn-Ka-Saab barka. Sẽn-Ka-To, zemsame tɩ d yɩɩl n pẽg yãmb yʋʋrã,
3
tɩ d moon yãmb nonglmã yibeoog fãa, la tɩ d moon yãmb sɩdã yʋng fãa.
4
D pẽg-b ne ruudg sẽn tar sus piiga la ne baeela, la pɛndg wẽebo.
5
Sẽn-Ka-Saabo, yãmb sẽn maandã kõta maam sũ-noogo! Mam kaasda ne sũ-noog yãmb nus tʋʋmã yĩnga.
6
Sẽn-Ka-Saabo, yãmb tʋʋmã yaa kãsemse, yãmb tagsdã yaa zulums wʋsgo.
7
Yam-pa-sek soab ka mi baa fɩ ye, la yalem ka tar bãngr ye.
8
Nin-wẽnsã sã n wa n tobd wa moodo, tɩ tʋʋm-wẽns maandbã yidgdẽ, yaa tɩ b na n sãama wakat fãa yĩnga.
9
La yãmba, yãmb bee yĩngri, n yaa Sẽn-Ka-Saab wakat sẽn kõn sa yĩnga.
10
Sẽn-Ka-Saabo, la sã n yaa ne yãmb bɛɛbã, bãmb na n sãama zãnga. La tʋʋm-wẽns maandbã fãa na n sãeegame.
11
Yãmb paas-m-la pãng wa we-naaf pãnga, b rɩka ka-paalg n sudg mam zugu.
12
Mam nin nee m namsdbã, la m tʋb wʋmda sẽn zabd-b ne maam n dat n maan maam wẽngã rãamde.
13
Nin-tɩrs tãooda wa koanga, bãmb bɩta wa Libã sɛɛdr tɩɩse.
14
B sela bãmb wa tɩɩg Sẽn-Ka-Saab roogẽ wã. Bãmb ningda b puud tõnd Wẽnnaamã roog samandẽ.
15
Bãmb kʋʋlame n ket n womd biisi, bãmb tara sũm la b tobda vã-paala.
16
Bõn-kãens wilgdame tɩ Sẽn-Ka-Saab yaa tɩrga. Bãmb yaa mam pĩiga, la bũmb sẽn ka zems ka be bãmb pʋgẽ ye.
Mossi MPBU 2014
Moore Bible Bible Society of Burkina Faso, 2014
:
Save Notes