×

現代台語譯本羅馬字版

詩篇 94

1
Siōng Chú, lí sī sin-oan ê Siōng-tè; sin-oan ê Siōng-tè ah, kiû lí hoat-chhut kng.
2
Sím-phòaⁿ sè-kài ê Chú ah, kiû lí khí--lâi, hō͘ kiau-ngō͘ ê lâng siū eng-kai siū ê pò-èng.
3
Siōng Chú ah, pháiⁿ-lâng beh koh jōa kú, pháiⁿ-lâng iông-iông-tek-ì beh koh jōa kú?
4
In ê chhùi thò͘-chhut kiau-ngō͘ ê ōe; chòe pháiⁿ ê lâng lóng teh tián ka-kī.
5
Siōng Chú ah, in khi-ap lí ê chú-bîn, khó͘-chhó͘ lí ê sán-gia̍p Í-sek-lia̍t.
6
In hāi-sí ko͘-jî kóaⁿ-hū, koh sat-hāi chhut-gōa-lâng.
7
In kóng, “Siōng Chú it-tēng bô teh chù-ì; Ngá-kok ê Siōng-tè it-tēng bô teh khòaⁿ.”
8
Lín chiah-ê chhin-chhiūⁿ cheng-siⁿ ê lâng tio̍h siūⁿ; lín chiah-ê gû-gōng ê lâng tī-sî chiah ōe ū tì-hūi?
9
Chō hī-khang ê Siōng-tè ka-kī kiám bōe thiaⁿ--kìⁿ? Chō ba̍k-chiu ê Siōng-tè ka-kī kiám bōe khòaⁿ--kìⁿ?
10
Koán-kàu lia̍t-pang ê Siōng-tè kiám bōe chhú-hoa̍t? Kàu-tō lâng ê Siōng-tè kiám ōe bô tì-sek?
11
Siōng Chú chai lâng ê sim-su, chai in só͘ siūⁿ--ê lóng bô lō͘-ēng.
12
Siōng Chú ah, siū lí koán-kàu ê lâng chin ū hok-khì! Lí ēng lu̍t-hoat kā i kàu-tō,
13
beh hō͘ i tī hoān-lān ê ji̍t an-ún chū-chāi, ti̍t-kàu beh tâi pháiⁿ-lâng ê bōng ku̍t hó-sè.
14
Siōng Chú it-tēng bōe pàng-sak I ê chú-bîn, mā bōe hòng-khì I ê sán-gia̍p Í-sek-lia̍t.
15
I ōe koh chiàu kong-gī sím-phòaⁿ, sim chèng-ti̍t ê lâng lóng ōe tè I.
16
Siáⁿ-lâng ōe ūi góa khí-lâi kong-kek pháiⁿ-lâng? Siáⁿ-lâng ōe ūi góa khiā khí-lâi kong-kek chòe pháiⁿ ê lâng?
17
Nā m̄-sī Siōng Chú pang-chān góa, góa chin kín chiū lo̍h-khì éng-oán chēng-be̍k ê só͘-chāi.
18
Góa kóng “Góa ê kha ta̍h chhū--khì”; hit-sî, Siōng Chú ah, lí ēng chû-ài hû-chhî góa.
19
Góa sim-lāi ū chin chōe iu-būn khòa-lū, lí ê an-ùi hō͘ góa sim-sîn khoài-lo̍k.
20
Hú-pāi ê koaⁿ-tiúⁿ lī-iōng hoat-lu̍t chè-chō kan-ok, in kiám ōe kap lí khiā kâng-pêng?
21
In tàu-tīn kè-bô͘ beh hāi gī-lâng ê sìⁿ-miā, kā bô chōe ê lâng tēng sí-chōe.
22
M̄-kú Siōng Chú chòe góa ê pó-lúi; góa ê Siōng-tè chòe góa ê pī-lān-só͘.
23
I hō͘ in ê chōe-ok siū-tio̍h pò-èng; in chòe pháiⁿ ê sî, I beh châu-bia̍t in. Siōng Chú — lán ê Siōng-tè beh châu-bia̍t in.
Chinese TTVR
The Bible Society in Taiwan
:
保存笔记