×

Ika Bible 2018

Ẹbụ-ọma 94

1
Osolobuẹ, Chuku hụn e mẹgwarị ndị-njọ; Chuku hụn e mẹgwarị ndị-njọ, dodo ghọsị nwan ẹka ị!
2
Dodo lihi nwan, ọka-ikpe hụn a hannị ụwa ile eṅẹn; lihi n'i ye ndị mpache ihiẹn wẹ chọ!
3
Osolobuẹ dodo, elee mgbe kẹ ndị njọ k'e mẹbehi ihiẹn wẹ rị e mẹ? Elee mgbe kẹ ndị-njọ k'a ghọghọbehi?
4
Wẹ e kukarị enwẹn wẹ; ndị-njọ ile a nyan isi.
5
Osolobuẹ, wẹ rị a zọpịpịa ndị nke i, a bịangbu ndị hụn wụ ukuu i.
6
Wẹ e gbu ikpoho di wẹ nwụn lẹ abịamabịa; e gbu ndị nwọnlẹni nẹdi;
7
a sị, “Osolobuẹ ara hụn ẹnyi, Chuku Jekọpụ amarịn ihiẹn rị e mẹni.”
8
Ndị ẹwobi, rokpọ nị ihiẹnni; ndị-nzuzu, elee mgbe kẹ ụnụ k'e nwọnrin uche?
9
Onyẹ hụn bu ntịn che ịhịan ẹhụ, ọ nụkọ ihiẹn? Onyẹ hụn mẹmẹ ẹnya ịhịan, o leghakọ ụzọ?
10
Onyẹ hụn e ye alị ọwụlẹ mẹ eje-ihiẹn afụnfụn, o yekọ ụnụ afụnfụn? Onyẹ hụn e ye amamihiẹn?
11
Osolobuẹ a marịngụọ obi ịhịan, nị ihiẹn ọlaliwi k'ọ wụ!
12
Euu Osolobuẹ, onyẹ ị zụn e nwọnkẹ ngọzi, makẹni iwu i k'i gi a kuzi ẹ,
13
e gi ẹ e mẹ obi e ru wẹ alị ogẹn nsọngbu, d'e ru mgbe ndị-njọ danban olu i gutọnị wẹ.
14
Makẹni Osolobuẹ alatọkọ ndị nke ẹ; ọ gbakitọkọ ihiẹn ẹ azụụn.
15
Ya wụ, ezioku k'e rizi nwan eṅẹn, ndị ile obi wẹ kụrụ ọtọ e sọnmẹ ezioku.
16
Onyẹ k'a lụsọnni m ndị-ejẹni, wezụka Osolobuẹ? Onyẹ k'e kuni m ọnụ m ẹka ndịnị e mẹ eje-ihiẹn?
17
Omẹni ẹlẹ hụn Osolobuẹ yeni m ẹka, nkẹ w'a nụbehigụọ olu m elu ụwa!
18
M te sị, “Ụkụ m e kpori,” kanị Osolobuẹ, ị nọ ghọsị m ihiẹn ọsụsụọ kẹ onyẹ nke i, ghọdọn m.
19
Ogẹn ọwụlẹ obi gi a gbaka m, ịyụ e mẹ obi e ru m alị.
20
Elee hụn biri yụ lẹ ndị eje-ọkịkị, ndị gi iwu wẹ rị e ti e mẹ eje-ihiẹn?
21
W'e zuni ndị ezi-omumẹ umẹ, a ma ndị nwọnlẹni ihiẹn wẹ mẹ ikpe-ọnwụn.
22
Kanị e gbọnni m Osolobuẹ; e gbọnni m Chuku m, okẹn-ọmụma hụn e che m nche.
23
O k'e mẹ wẹ gi isi buru eje-ihiẹn wẹ mẹ, gbu wẹ la iwi makẹ eje-ihiẹn wẹ mẹ, Osolobuẹ wụ Chuku ẹnyi k'e gbu wẹ la iwi!!
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes