×

WẼNNAAM SEBRE 2014

Yɩɩla 96

1
Yɩɩl-y yɩɩn-paalg Sẽn-Ka-Saab yĩnga! Bɩ dũniyã gill nebã yɩɩl Sẽn-Ka-Saab yĩnga!
2
Yɩɩl-y Sẽn-Ka-Saab yĩnga, pẽg-y bãmb yʋʋrã. Moon-y bãmb fãagr koe-noogã daar woo daare!
3
Togs-y bãmb ziirã bu-zẽmsã sʋka! Togs-y bãmb tʋʋm-kãsemsã nebã fãa sʋka!
4
Bala, Sẽn-Ka-Saab yaa kãsenga, la b zemsa ne pẽgr buud fãa, bãmb seka zoees n yɩɩd wẽnnaam-dãmbã fãa.
5
Bala, buud a taabã wẽnnaam-dãmbã fãa yaa zĩrẽ wẽnnaam-dãmbã, la yaa Sẽn-Ka-Saab n naan saasã.
6
Sẽn-Ka-Saab nengã tara ziir n pɩnda. Bãmb zĩ-sõngã pida ne pãng la neerlem.
7
Buud toay-toayã roto, pẽg-y Sẽn-Ka-Saabo! Kõ-y bãmb waoogre, wilg-y b pãngã!
8
Kõ-y Sẽn-Ka-Saab yʋʋrã waoogre! Tall-y kũun n wa bãmb samandẽ wã!
9
Wõgemd-y Sẽn-Ka-Saab taoore, b sõmblmã sẽn wat n pukdẽ wã. Bɩ dũniyã gill rig ne rabeem bãmb taoore.
10
Yeel-y bu-zẽmsã sʋk tɩ yaa Sẽn-Ka-Saab n dɩt naam. Bãmb n vigl dũniyã kãenkãe t'a ka miimdẽ ye. Sẽn-Ka-Saab kaooda nebã bʋʋd tɩrga.
11
Bɩ saasẽ maan sũ-noogo, la bɩ dũniyã kɩdme! Bɩ ko-kãsengã ne bũmb nins fãa sẽn be a pʋgẽ wã maan dãamde!
12
Bɩ weoogã ne bũmb nins fãa sẽn be a pʋgẽ wã kɩdme, bɩ weoogã tɩɩs fãa kaas ne sũ-noogo!
13
Bɩ b kaas Sẽn-Ka-Saab taoore, bala, bãmb watame! Bãmb wat n na n kaoo dũniyã bʋʋdo. Bãmb watame n na n kao dũniyã bʋʋd ne tɩrlem, la b kao nebã bʋʋd ne sɩda.
Mossi MPBU 2014
Moore Bible Bible Society of Burkina Faso, 2014
:
Save Notes