Ki leenji `Kamuktaindet ne Toroor Musa, “Kang'et koroito agenge neta aipchini Pharaoh ak Misiriik, ak ye ibata kochamwok obe eng' olito. Ye kagochamwok obe, koonok omande ne matiny.
Ki yai Kamuktaindet ne Toroor anyun piik konyoor chameet eng' Misiriik. Ne siirei nooto, ko kitagunoot miising' Musa eng' emetap Misiri eng' taitap otwogigap Pharaoh ak eng' taitap piik.
Pegu anyun kiboretook tugul eng' emetap Misiri kobooch taita ne po Pharaoh ne tebee ng'echereetap pounateet agoi taita ne po kwondo ne otwogindet ne ng'aisei. Agot kirgit age tugul ne twatei tyony age tugul, kobegu.
Ago eng' piigap Israel koma mi agot seset ne imuuchi koseng'eng'ji chii anan tyony. Si kobiit onai ole ibestos `Kamuktaindet ne Toroor Misiriik ak Israel.
Yeityo kochoorgei anyun otwogichuguk kobwa ole ami ak kong'uruukso eng' tainnyu eng' konyit ne oo, koleen, ‘Mande inyee ak piik tugul che isubin.’ Ye ibata nooto, awe amande anyun.” Kingo pata kwo Musa eng' ole mi Pharaoh eng' nereegek che laldos.
Nganda ki yai Musa ak Aron kwang'utichuuto tugul eng' taitap Pharaoh, ko ki iuit `Kamuktaindet ne Toroor muguleldap Pharaoh ak ki ma chamji piigap Israel koba eng' emennyi.