×

BIBULIYA ENTUKUVU

Okuva 11

1
Omukama n'agamba Musa nti: “Ekibonerezo kimu kye ŋŋenda okwongera okuleetera Faraawo. Ekyo nga kiwedde, ajja kubaleka muve wano mugende. Bw'alibagoba, agenda kubagobera ddala.
2
Kuutira abantu nti: ‘Buli musajja asabanga muliraanwa we na buli mukazi asabe munne ebintu ebya ffeeza ne zaabu.’ ”
3
Omukama n'awa abantu omukisa mu maaso g'Abamisiri, era nga Musa yali muntu mukulu nnyo mu nsi y'e Misiri, mu maaso g'abakungu ba Faraawo ne mu g'abantu abalala.
4
Awo Musa n'agamba nti: “Bw'ati Omukama bw'agambye nti: ‘Awo nga mu ttumbi, nzija kuyita mu Misiri.
5
Buli muggulanda yenna mu Misiri ajja kufa, okuva ku muggulanda wa Faraawo atudde ku nnamulondo okutuuka ku muggulanda w'omuzaana aweereza ku lubengo olusa; era na buli kiggulanda kyonna eky'ensolo.
6
Wonna mu nsi y'e Misiri mujja kubaamu ebiwoobe ebinene, ekiri ng'ekyo tekibangawo, era ekiri ng'ekyo tekiribaawo mulundi mulala.
7
Naye awali Abayisirayeli, teriba wadde embwa eboggolera omuntu oba ensolo, mulyoke mumanye nti Omukama alina enjawulo wakati w'Abayisirayeli n'Abamisiri.
8
Abakungu bo bano baliserengeta gye ndi ne bavunnama mu maaso gange nga bagamba nti: “Genda ggwe n'abantu bonna abakugoberera.” Ekyo nga kiwedde, ŋŋenda kugenda.’ ” Musa n'ava mu maaso ga Faraawo ng'obusungu bumwesera.
9
Awo Omukama n'agamba Musa nti: “Faraawo tajja kukuwuliriza; bwe kityo ebikuuno byange byeyongere obungi mu nsi y'e Misiri.”
10
Ebikuuno bino byonna Musa ne Aroni baabikolera mu maaso ga Faraawo. Naye Omukama yakakanyaza omutima gwa Faraawo, n'ataganya Bayisirayeli kuva mu nsi ye.
Luganda Bible
BIBULIYA ENTUKUVU SECOND EDITION The Bible Society of Uganda, 2018.
:
Save Notes