×

客語聖經 – 現代臺灣客語譯本,新舊約全書客語聖經 – 漢字版 2012

出埃及記 12

1
上主在 埃及 對 摩西 㧯 亞倫 講:
2
「這個月愛做正月,係你等一年个第一隻月。
3
你等愛對 以色列 全部人民講:在本月初十,逐家个家長一定愛為佢全家擇一隻細羊。
4
若係屋下人少,食毋掉歸隻羊,佢就愛㧯隔壁个鄰舍共下食一隻,照人數㧯各人个食量來分。
5
你等用綿羊抑係用山羊全部做得,總係一定愛用無缺點个、一歲大个羊牯。
6
到本月十四日臨暗仔, 以色列 全部个人民愛㓾佢等擇出來个羊牯。
7
逐家人愛拿兜血膏在門框㧯門楣頂,又愛在該間屋肚食羊肉。
8
該暗晡佢等一定愛食焙个羊肉、苦菜㧯無酵餅。
9
羊肉做毋得生食,也做毋得食水煮个,一定愛連頭、連腳㧯腹內,歸隻羊用焙个。
10
做毋得留到朝晨;食賸个愛在天光前燒掉。
11
你等食个時,愛遽遽食;愛繫𢫮腰帶,愛著鞋,拿等柺棍仔。這係上主个𨃟過節。
12
「該暗晡,𠊎愛行透 埃及 ,㓾死所有頭胎𫱔个,不管係人抑係頭牲,全部愛㓾死。𠊎愛責罰所有 埃及 个神明。𠊎係上主。
13
門框頂个血係你等屋仔个記號。當𠊎看到這血,𠊎愛𨃟過你等个屋下。𠊎責罰 埃及 人个時,災難一定毋會傷害你等。
14
逐年你等愛紀念這日,也應該慶祝上主這個節,做你等世世代代永遠个例規。」
15
上主講:「在這七日內,你等愛食無酵餅,做毋得食有酵个餅。你等愛在第一日除掉屋下所有个酵;在該七日內若有人食有酵个餅,一定愛將佢對 以色列 𠊎子民中除名。
16
第一日㧯第七日,你等愛聚集敬拜。這兩日,除了準備大家愛食个以外,麼介事也做毋得做。
17
你等愛守這除酵節,因為在這日,𠊎𢱋你等个眾軍隊離開 埃及 。逐年,你等一定愛慶祝這日,慶祝這節期,做你等世世代代永遠个例規。
18
對正月十四暗晡到二十一暗晡,你等愛食無酵餅。
19
在這七日中,你等屋下做毋得有酵;若係有人食有酵个食物,無論本國出世抑係來做旅客个,全部愛對 以色列 𠊎子民中除掉。
20
有酵个食物,你等全部做毋得食;無論你等住在㖠位,都愛食無酵餅。」
21
摩西 召集所有 以色列 人个長老,㧯佢等講:「你等逐家愛擇一隻羊牯,將這𨃟過節个羊牯㓾掉。
22
愛拿一揢牛膝草,搵盆肚个血,膏在門框㧯門楣頂。一直到第二朝晨,無論麼人全部做毋得出門。
23
當上主行透 埃及 、㓾 埃及 人个時,看到門框㧯門楣頂个血,就𨃟過去,毋俾執行毀滅个天使入你等个屋下㓾你等。
24
你等㧯你等个子孫一定愛永遠遵守這兜例規。
25
當你等進入上主所應許賜給你等个地,你等愛遵守這節期个禮儀。
26
你等个細人仔問你等講:『這個禮儀有麼介意義?』
27
你等就應講:『這係獻給上主𨃟過節个祭物,因為佢在 埃及 𨃟過 以色列 人个屋下。佢㓾掉 埃及 人,拯救𠊎等逐家个性命。』」 以色列 人就跪下來敬拜上主。
28
佢等出去,照上主吩咐 摩西 㧯 亞倫 个去做。
29
到半夜,上主㓾掉所有 埃及 人个長子,上對國王个長子 — 就係將來愛承接王位个王子,下到監獄肚犯人个長子;連所有頭牲个頭胎也全部㓾掉。
30
該暗晡 埃及 王、佢所有个官員,㧯全國人民攏總䟘起來。在 埃及 只有聽到悲傷大噭个聲,因為家家戶戶有死人。
31
該暗晡, 埃及 王就召見 摩西 㧯 亞倫 ,對佢等講:「遽遽走!你等㧯 以色列 人趕緊離開𠊎个人民;照你等所要求个去敬拜上主。
32
照你等所講个,帶等你等个牛羊趕緊離開;也愛為𠊎祝福。」
33
埃及 人催 以色列 人趕緊離開佢等个國家;佢等講:「你等還毋走,𠊎等會死淨淨了!」
34
所以 以色列 人就將無酵个麵團放在盆肚,用衫褲包起來,揹在肩頭頂。
35
佢等也照 摩西 所吩咐个,向 埃及 人討金器、銀器㧯衫褲。
36
上主使 埃及 人尊敬佢个子民;佢等愛麼介, 埃及 人就給佢等麼介。恁樣, 以色列 人帶走 埃及 人个財物。
37
以色列 人對 蘭塞 一直行到 疏割 。婦女㧯細人仔無算,單淨男人就有六十萬人。
38
盡多外族人並牛羊盡大群也㧯佢等共下行。
39
佢等用 埃及 帶出來个無酵麵團焙餅,因為佢等被人催迫愛遽遽離開 埃及 ,無時間準備食物。
40
以色列 人住在 埃及 一共四百三十年。
41
滿四百三十年,堵堵好該日,上主个軍隊就全部離開 埃及 。
42
這暗晡,上主親自保守佢等,𢱋佢等出 埃及 ;所以 以色列 人在這暗晡就愛守夜,將它奉獻給上主,這係佢等世世代代應該遵守个。
43
上主對 摩西 㧯 亞倫 講:「𨃟過節个例規係恁樣:外族人做毋得食𨃟過節个細羊;
44
總係你等買來个奴僕,受割禮以後就做得食。
45
暫時住在你等屋下个人客㧯請來个工人做毋得食。
46
食个時愛全家共下在屋肚食,做毋得帶出屋外;細羊个骨頭連一支也做毋得拗斷。
47
以色列 人民全部愛慶祝這隻節期,
48
總係無受過割禮个人做毋得食這細羊。若係有暫住在你等當中个旅客,愛守𨃟過節來尊敬上主,你等一定愛先為佢全家个男人行割禮。恁樣,佢等就像本地𫱔个 以色列 人,做得食𨃟過節个細羊。
49
所有本地𫱔个 以色列 人㧯暫住在你等當中个旅客全部愛遵守這例規。」
50
所有个 以色列 人就照上主吩咐 摩西 㧯 亞倫 个去做。
51
上主就在該日𢱋 以色列 人个軍隊一隊一隊出 埃及 。
The Bible Society in Taiwan
2012 台灣聖經公會版權所有 2012
:
保存笔记