Oba mu nnyumba abalimu batono nga tebamalaawo kaliga, yeegattanga ne muliraanwa we asinga okumuba okumpi, okusinziira ku bungi bw'abantu. Obunene bw'akaliga mulibugerera ku buli omu ky'asobola okulya.
Mukalyanga bwe muti: Mwesibanga ekimyu mu kiwato, nga n'engatto zammwe zibali mu bigere byammwe; mukalyanga emiggo gyammwe gibali mu ngalo. Mukalyanga mu bwangu, anti eno ye Pasika y'Omukama.
Mu mwezi ogw'olubereberye, okuva ku kawungeezi ak'olunaku olw'ekkumi n'ennya, okutuusa ku kawungeezi ak'olunaku olwabiri mu olumu, mulyanga migaati gitazimbulukuse.
Muddire akaganda aka yissopo, mukannyike mu musaayi oguli mu kibya, musiige waggulu ku mwango ogw'obukiika ne ku gw'obusimba, erudda n'erudda; tewabangawo n'omu mu mmwe afuluma nnyumba mw'ali, okutuusa enkeera,
kubanga Omukama ajja kuyita mu nsi ng'agenda akuba Abamisiri. Bw'anaalaba omusaayi ku mwango ogwa waggulu ne ku myango erudda n'erudda, ajja kuyita buyisi ku mulyango gw'ennyumba, tajja kuleka oli azikiriza kujja ku nnyumba yammwe kubakuba.
Mu ttumbi, Omukama n'atta buli kiggulanda kyonna mu nsi y'e Misiri, okuva ku muggulanda wa Faraawo eyali atudde ku nnamulondo, okutuukira ddala ku w'omusibe mu kkomera na buli kiggulanda eky'ekisolo.
Abayisirayeli ne batambula okuva e Raamesesi ne balaga e Sukkoti, nga bawera obusiriivu mukaaga abaali ku bigere, abasajja bokka obutabala bakazi na baana.
Ne bafumba obutta bwe baali baggye e Misiri, ne bakola obugaati obutazimbulukuse kubanga tebaalina kizimbulukusa, anti Abamisiri baabagobaganya nga tebasobola kulwa oba kwekolera ntanda n'emu.
Ekiro kino Abayisirayeli ba kukimalangako nga batunula olw'okugulumiza Omukama kubanga yakimalako ng'atunula ng'abaggya mu nsi y'e Misiri. Awo nno Abayisirayeli bonna ba kukikuzanga nga batunula mu mazadde gonna agalijja.