“Basolanhyage pye a babyalwa ba kwandya a bagosha, ūbeeje babize bane. Būlī ng'wene ū wa kūhangūla nda ya ng'wa nina ū mu Baisilaeli alī wane; abize munhū nūūlū gūbize ntugo.”
Hūna ū Musa ūbawīla a banhū, “Lwizūkagwi ū lūshikū lwenūlū, ū lūshikū lwa kwīnga kwing'we mu sī ya Misili, ī sī ya būsese. Ū lwenūlo lūlī lūshikū lwa ng'wa SEEBA kūmufunya ū mu sī yenīyo na nkono gwa būdūla būtaale; na lūūlū yaya kūlya shose shose īsho shilī na shibimbya.
Ī shikū mpungatī jenījo jibize ja kūlya migatī ītī na shibimbya, shitiziziilonga shikolo shose shose ū mu bing'we īsho shilī na shibimbya. Nīyo ī shibimbya shitiziziilonga hose hose nūūlū hado ū mu sī ying'we.
Būlī nzobe ī ya kwandya kūbyalwa īkomoolage na ng'wana wa ng'holo; alīyo ūlū ūtatogilwe ū kwīkomoola, ībūlagage, ū mu baana bako a baatangī, būlī ng'wana ū ngosha nkomoolage.
Ū kū shikū ja kū būtongi, ū ng'witūnja wako ūlū ūkūbūūja gīkī, “Ū mhayo gwenūyū gūlī na makūlū kī?” Ng'wīlage, “Ū SEEBA akatwīnja mu sī ya Misili na nkono gwa būdūla, ūtūfunya mu sī ya būsese.
Ū Falao walī walema gete na makaala ū kūtūzunīlīja ū kwīnga, hūna ū SEEBA ūbabūlaga pye a babyalwa ba kwandya ū mu Misili; a ba banhū, nī mitugo ī mbyalwa ja kwandya. H'ī nguno yene nakashifunyaga pyī ī sha kwandya kūbyalwa, shabiza shitambò kūlī SEEBA; hama a babyalwa bane ba kwandya a bagosha nakabakomoolaga.”
Na lūūlū ū Falao aho wabazunīlīja a banhū baje, ū Mulungu atabatūngīīgije kū nzīla ya kūbīta mu sī ya Bafilisiti, nūūlū īkī ī yenīyo yalī nguhī. Nguno ū Mulungu akahaya, “Ūlū būpamanya na būlūgū, badūgije kūgalūcha a maganiko būshoka hangī Misili.”
Hūna lūūlū, ū Mulungu ūbabītya a banhū benabo kū nzīla ya kwipīndīīla, ūbabītīja kwitogolo lya kūjīlīīla kū Nyanza Yaza. A Baisilaeli aho balīja, baaja bamanukile nūūlū kūmanhya na būlūgū.
Ū Musa ūgasola na a maguha ga ng'wa Yosefu, nguno ū Yosefu walī wabilahīja a Baisilaeli ūbawīla, “Namanile hape gīkī ū Mulungu akūmugeniha ang'wīnje ū ng'wenūmu; alilūūlū, mukūgabūūcha na a maguha gane muje nago.”
Ū SEEBA hū ng'wene wabatongeelaga ī nzīla; ī līīmi walī mu ng'hīngī y'ilunde, al'ī būjikū mu ng'hīngī ya moto kūlwa kūbatwimīla ū mu nzīla; badūle kūshimīza līīmi na būjikū.