×

Ika Bible 2018

Ọpụpụ 16

1
Ndị Izrẹlụ ile nọ gha Ẹlim buli, ya wẹ nọ ru Atụ Sini hụn rị ẹgbata Ẹlim lẹ Saịnaị — nke akpọhịn mmisẹn imẹ ifọn hụn mẹ ẹ ẹbụọ wẹ gha Ijiptu pụha kẹ wẹ ru ẹ.
2
Ndị Izrẹlụ ile nọ dẹnnwịnwịnma nị Mozizi lẹ Ẹrọnụ imẹ atụ ebẹhụ:
3
wẹ sị Mozizi lẹ Ẹrọnụ, “O te ka ẹnyi mma nị Osolobuẹ gbu ẹnyi tọ imẹ Ijiptu! Ebahụn, ẹnyi a nọdịyeni ite-anụ, e rijundẹ ẹfọ kẹ ẹnyi chọ — ụnụ nọ nwan wepụha ẹnyi imẹ atụnị nị ọnụ gi ẹgụn gbu igunrunni ile.”
4
Ya kẹ Osolobuẹ nọ sị Mozizi, “M jẹnkọ d'a gha elu-igwee hutuni ụnụ ihiẹn-oriri nọkẹ ebe mirin rị e zue. Wẹ k'a gha a pụha ụhụọhịn-ụhụọhịn d'e kpọnrin hụn k'e zu wẹ ri ụhụọhịn hụ. Ụzọnị kẹ m'e gi lele wẹ, nị m lee kẹni wẹ mẹ ihiẹn m sị wẹ mẹ.
5
Nke akpọhịn isin, wẹ kpọnrin hụn w'e kpọn ụhụọhịn-ụhụọhịn ụzọ ẹbụọ mẹmẹrin.”
6
Ya Mozizi lẹ Ẹrọnụ nọ sị ndị Izrẹlụ ile, “Ẹnyasịnị kẹ ụnụ k'a marịn nị Osolobuẹ wụ onyẹ hụn gha Ijiptu wepụha ụnụ;
7
o ruzi ụtụntụn, ụnụ k'a hụnzịkwọ ikẹn-lẹ-ọghọ Osolobuẹ, makẹni Osolobuẹ anụọlẹ kẹ ụnụ rị e dẹnnwịnwịnn'a. Makẹni ẹlẹ ẹnyi kẹ ụnụ rị e dẹnnwịnwịnnị: onyẹ kẹ ẹnyi wụ hụn ụnụ e dẹnnwịnwịnnị?”
8
Mozizi nọzị sị, “Ụnụ k'a marịn nị Osolobuẹ wụ onyẹ hụn wepụha ụnụ ogẹn o k'e gi ye ụnụ anụ ri ogẹn ẹnyasị, o ru ụtụntụn, o ye ụnụ brẹdi ụnụ k'e gi rijun ẹfọ kẹ ụnụ chọ. Makẹni, Osolobuẹ a nụgụọ kẹ ụnụ rị e dẹnnwịnwịnn'a. Onyẹ wụ ẹnyi? Ẹlẹkwọ ẹnyi kẹ ụnụ rị e dẹnnwịnwịnnị; Osolobuẹ kẹ ụnụ rị e dẹnnwịnwịnnị.”
9
Mozizi nọ sị Ẹrọnụ, “Sị ndị Izrẹlụ ile, ‘Pụha nị d'e turu ihun Osolobuẹ, n'ọ nụgụọ kẹ ụnụ rị e dẹnnwịnwịn.’ ”
10
Hụn Ẹrọnụ gi rị a gwa ndị Izrẹlụ ile oku, wẹ nọ lee ẹnya ibe atụ: e lee orukpu hụ Osolobuẹ gi a ghọsị enwẹn ẹ k'ọ pụha.
11
Osolobuẹ nọ sị Mozizi,
12
“A nụgụọ m kẹ ndị Izrẹlụ rị e dẹnnwịnwịn. Sị wẹ, ‘Ọhị gbama ṅẹnrẹn-ṅẹnrẹn, ụnụ k'e ri anụ; o ru ụtụntụn, ụnụ k'e ri brẹdi, rijun ẹfọ. Ogẹn ahụn kẹ ụnụ e gi marịn nị m wụ Osolobuẹ, Chuku ụnụ.’ ”
13
Ẹnyasị ahụn, kwẹlụ nọ pụha, jun ebẹhụ ndị Izrẹlụ ziẹntọ; o ru ụtụntụn, e lee igirigi ziẹnni, fihunmẹ ebẹhụ.
14
Hụn igirigi hụ gi kọrọ, e lee ihiẹn mẹ ibe-ibe nwọnlẹni ulu jun atụ ebẹhụ.
15
Ogẹn ndị Izrẹlụ gi hụn a, wẹ hụ a sị ibe wẹ, “Mana?” Makẹni, ete marịn wẹ ihiẹn ọ wụ. Mozizi nọ sị wẹ, “Brẹdi Osolobuẹ ye ụnụ nị ụnụ ri rọ.
16
Lee ni iwu Osolobuẹ ti: ‘Onyẹ-onyẹ k'e kpọnrin hụn k'e zun'ẹ. Onyẹ ohu k'e kpọnrin hụn k'e jun mkpu-kọstadị nta ẹbụọ. Werisọnmẹni ni onyẹ-onyẹ rị iwe ụnụ.’ ”
17
Ndị Izrẹlụ nọ mẹ kẹ wẹ gwa wẹ: ndị hụ e kpọnrin ọda, ndị hụ e kpọnrin ẹkẹrẹ.
18
Kanị ogẹn wẹ gi gi mkpu wẹ gwa wẹ ma a, onyẹ kpọnrin ọda enwọnkẹni, nke onyẹ kpọnrin ẹkẹrẹ emẹkẹni ẹkẹrẹ. Ọ nọ mẹ ni hụn onyẹ-onyẹ kpọnrin wụhụ hụn ahụn k'e zu ezi-lẹ-ụlọ a ri!
19
Mozizi nọ sị wẹ, “Anịkwọlẹ ni eki fọnkunrun hụn ọwụlẹ.”
20
Kanị ndị hụ imẹ wẹ egini ihiẹn Mozizi ku dọn; e bu wẹ mgbube tọ, eki e fọnkunrun ẹ, kanị ọhọrị e jun ẹ, o shinmẹ. Ya Mozizi nọ weni wẹ iwe.
21
Eki fọnzi nwan ụtụntụn, onyẹ-onyẹ e kpọnrinhụ mana k'e zun'ẹ; anwụn kẹnrẹn, mana họdụ ezi e dẹnhin.
22
Nke akpọhịn isin, e kpọnrinsọnmẹ wẹ ụzọ ẹbụọ-ẹbụọ, hụn han kẹ mkpu-kọstadị ẹnọ-ẹnọ. Ya kẹ ndị-isi ile nọ bịa d'a gwaghọsị Mozizi ihiẹnni wẹ rị e mẹ.
23
Ọ nọ sị wẹ, “Lee ni ihiẹn Osolobuẹ ku: ‘Eki wụ ụhụọhịn izu-ikẹn, Ezumikẹn hụn rị nsọ wẹ gi e ye Osolobuẹ ọghọ. Shiri ni nwan ihiẹn ụnụ chọ nị ụnụ shi tannị, gheri ni ihiẹn ọwụlẹ ụnụ k'e ghe, ụnụ e bu hụn họdụnị tọ nị eki fọn.’ ”
24
Ya wẹ nọ bu ẹ tọ nị eki fọn, kẹ Mozizi dọn gi ọnụ a ku; eki e fọn, o shinni, ọhọrị abann'a.
25
Mozizi nọ sị wẹ, “Rin'ẹ tannị. Makẹni tannị wụ Ezumikẹn wẹ gi e ye Osolobuẹ ọghọ; onwọnni mana ụnụ k'a hụn alị tannị.
26
Akpọhịn isin kẹ ụnụ e gi kpọnrinsọnmẹ ẹ, kanị nke akp'ọhịn ẹsa, Ụhụọhịn Ezumikẹn, ọ rịkọ a.”
27
Kanị, o nwọnghọzị ndị pụ nke akpọhịn ẹsa d'e kpọnrin, onwẹni hụn wẹ hụn.
28
Ya kẹ Osolobuẹ nọ sị Mozizi, “Elee mgbe kẹ ụnụ k'a jụbehi iwu m ye ụnụ lẹ ihiẹn m sị ụnụ mẹ?
29
Lee n'ẹ: makẹni Osolobuẹ e yeọlẹ ụnụ Ụhụọhịn ụnụ k'a gha e zu ikẹn haịn o gi mẹ ni nke akpọhịn isin o ye ụnụ mana akpọhịn ẹbụọ. Nke akpọhịn ẹsa, onyẹ ọwụlẹ ya nọdị ebe ọ rị. Onyẹ ọwụlẹ apụkwọlẹ ezi.”
30
Ya wẹ nọ nwan zu ikẹn nke akpọhịn ẹsa.
31
Ndị Izrẹlụ kpọ brẹdi ahụn “mana.” O nwun nzụn-nzụn kẹ nkpụrụ-osisi korịanda, a sụọ kẹ akara-wefa wẹ buche mirin-ẹnwụn.
32
Mozizi nọ sị, “Lee ni ihiẹn Osolobuẹ ku: ọ sị, ‘Weri ni mana jun mkpu-oma ohu dọnmẹni agbọ ndị lalanị, nị wẹ hụn ihiẹn-oriri m ye ụnụ ri imẹ atụ ogẹn m gha Ijiptu wepụha ọnụ.’ ”
33
Ya Mozizi nọ sị Ẹrọnụ, “Weri mkpu; y'e hu mana k'e jun mkpu oma, mkpu-kọstadị nta ẹbụọ, ye imẹ ẹ. Bu ẹ tọ ihun Osolobuẹ, gi dọnmẹni agbọ ụnụ ile lalanị ya.”
34
Kẹ Osolobuẹ dọn gwa Mozizi, Ẹrọnụ nọ bu mana hụ tọ ihun Ọdụ Ashịa-ẹri, gi dọnmẹ ẹ.
35
Ndị Izrẹlụ ri mana ahụa ọgụnnaị: wẹ ri ẹ d'e ru ni e ru wẹ alị wẹ biri; mana kẹ wẹ ri e we wẹ ru mkpẹnrẹn alị Kenaanị.
36
Mkpuni wụ “oma” han kẹ mkpu ẹfa wẹ kebe ụzọ iri.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes