×

BIBULIYA ENTUKUVU

Okuva 17

1
Ekibiina kyonna eky'Abayisirayeli ne kisitula okuva mu ddungu ly'e Sini, nga batambula ng'Omukama bwe yabalagiranga; ne basiisira e Refidimu kyokka awataali mazzi ga bantu kunywa.
2
Ne bayombesa Musa, ne bagamba nti: “Tuwe amazzi tunywe.” Musa n'abaddamu nti: “Lwaki munnyombesa? Lwaki mugeza Omukama?”
3
Abantu nga babonaaboneddeyo ennyonta, ne beemulugunyiza Musa, ne bagamba nti: “Lwaki watuggya e Misiri, okutussiza kuno ennyonta ffe n'abaana baffe n'amagana gaffe?”
4
Musa n'awanjagira Omukama, n'agamba nti: “Abantu bano nnaabakolera ki? Mu bbanga ttono bajja kunkuba amayinja.”
5
Omukama n'agamba Musa nti: “Ddira abamu ku bakulu ba Yisirayeli, ogende mu maaso g'abantu; kwata mu mukono gwo omuggo gwe wakubisa Kiyira, ogende.
6
Nzija kuyimirira awo mu maaso go ku lwazi lw'e Korebu. Ojja kukuba olwazi, lujja kuvaamu amazzi, banywe.” Musa bwe yakola n'abakulu b'Abayisirayeli nga weebali.
7
Ekifo n'akituuma Massa ne Meriba olw'okuyomba kw'Abayisirayeli n'olw'okugeza Omukama nga bagamba nti: “Omukama ali naffe, oba nedda?”
8
Abaamaleki ne bajja ne balumba Yisirayeli e Refidimu.
9
Musa n'agamba Yoswa nti: “Weerondere abasajja; enkya ku makya, genda mukwatagane ne Amaleki. Mu budde obwo, nze nzija kuyimirira ku ntikko y'akasozi, n'omuggo gwa Katonda mu mukono gwange.”
10
Yoswa n'akola nga Musa bwe yamugamba n'agenda okukwatagana ne Amaleki; Musa ne Aroni ne Kuru bo ne balinnya ku ntikko y'akasozi.
11
Musa bwe yawanikanga emikono, Yisirayeli ng'agoba; bwe yagissanga, olwo Amaleki nga y'agoba.
12
Emikono gya Musa bwe gyatendewererwa ne baddira ejjinja, ne balissa wansi, n'alituulako. Aroni ne Kuru ne bawanirira emikono gye, omu ku luuyi olumu, omulala ku ludda olulala; emikono gye ne ginywera okutuusa enjuba okugwa.
13
Yoswa n'agoba Amaleki n'eggye lye n'obwogi bw'ekitala.
14
Omukama n'agamba Musa nti: “Kino kiwandiike mu kitabo ng'ekijjukizo, ne Yoswa kimusse mu kutu nti: ‘Nzija kusangulirawo ddala wansi w'eggulu Abaamaleki kwe bandijjuukiriddwa.’ ”
15
Olwo Musa kwe kuzimba omwaliiro n'agutuuma Yawe Nissi.
16
Kubanga yagamba nti: “Kwata bendera y'Omukama. Omukama wa kulwanyisa Amaleki mu mazadde n'amazadde.”
Luganda Bible
BIBULIYA ENTUKUVU SECOND EDITION The Bible Society of Uganda, 2018.
:
Save Notes