×

NTETO INJEGA CIA 2018

Apudunet 17

1
Nakîo kîûthûrano kîonthe gîa antû ba Israeli nî kîaumîre rwanda rwa Sini kîreeta rûgendo rwaao, gîkiumaga antû amwe gwîta angî kûrîngana na ûrîa MWATHANI aabeeraga. Nabo nî baambîre kambî Refidimu, îndî antû au gûtaarî na rûûjî rwa kûnyuwa nî antû.
2
Tontû bûû, antû baranung'unîra Musa bakimwîraga, “Tûnenkere rûûjî rwa kûnyua.” Musa nawe arabooria atîrî, “Nîmbi îgûtûma bûntetia bûgeria MWATHANI?”
3
Antû nabo nî baigîrue nyoonta ya rûûjî mono barî antû au, na baranung'unîra Musa, bakiugaga “Nîkî waatûritîre Misri, nîkenda wîja gûtûûragithia nyoonta amwe na aana beetû na nyomoo cieetû?”
4
Rîu Musa arakaîra MWATHANI arooria, “Nîatîa nkûgîta antû baba, na barî akuî gûmpûûra na maiga?”
5
MWATHANI areera Musa atîrî, “Jûkia akûrû bamwe ba Israeli ûkûrûke mbere ya antû wîîte ûgweete rûturo rûrîa waringîre naru rûûjî rwa Naili.
6
Naani rî, nkaarûngama mbere yeenu, iigeene rîrîa rîrî kîrîmeene kîa Horebu. Naagwe ûringe iiga rîu, naru rûûjî rûkauma ku, nîkenda antû banyua.” Musa arathithia ûntû bûu mbere ya akûrû ba Israeli.
7
Nao antû au areetwa Masaha na Meriba nîûntû bwa antû ba Israeli kûnung'una, na nîûntû bwa kûgeria MWATHANI bakiugaga, “MWATHANI arî gatîgatî geetû kana atî o?”
8
Nabo rî, Amaleki nî beejîre kûrwîra na Israeli Refidimu.
9
Musa areera Joshua atîrî, “Thuura antû bwîîte bûkarwee na Amaleki. Naani rûûjû nkarûngama karîmeene îgûrû ngweete rûturo rwa MWATHANI.”
10
Tontû bûû, Joshua arathithia o ûrîa Musa aamwîrîte areeta kûrwaa na Amaleki. Musa na Aaroni na Huri nabo baraitia karîmeene îgûrû.
11
Kûrakara atîrî, o rîrîa rîonthe Musa eethagîrwa ookîrîîtie njara, Israeli nî yoombanaga; na o rîrîa rîonthe eenîka njara, Amaleki bakoombana.
12
Îndî njara cia Musa nî cianogere; nabo barajûkia iiga bararîîka ruungu rwaawe ararîkarîra. Aaroni na Huri baragwatîîra njara ciaawe ûmwe rûteere rûmwe ûngî rûngî. Tontû bûû, njara ciaawe nî ciakarîre ciûkîîrîte mwanka riûa rîrathûa.
13
Joshua arathiria Amaleki amwe na antû baawe na rûchiû.
14
MWATHANI nî eerîre Musa atîrî, “Andîka mantû jaja yukuune jarî Kîririkanio kîrî antû na ûjathome Joshua akiigagua, atî nkaathiria Amaleki buru batîkaririkanwe kaîrî nthîgûrûûne.”
15
Musa nî aakîre kîritîro kîa igongwana na aragîîta, “MWATHANI nîwe rwano rwaakwa rwa kûthingataga”
16
akiugaga, “Ûkîîria njara rûrigeene rwa MWATHANI! MWATHANI akaarûjaga na Amaleki kuuma nthukî îmwe gwîta îngî.”
Songe Bible 2018
KIMERU BIBLE WITH DC Bible Society of Kenya, 2009, 2018
:
Save Notes