1
Aho yashika myeji idatū kūfuma kwīnga kwabo Misili a Baisilaeli, ū mu lūshikū lwa kūshikīīla ī likanza lyenīlo, būshika ng'witogolo lya Sinai.
2
A Baisilaeli aho bīnga ī Lefidimu, bakashimīza būūkashika ng'witogolo lya Sinai; na lūūlū a banhū benabo būtūūla ng'hambī yabo bbihī na lūgūlū, ū ng'witogolo lyenīlo.
3
Hūna ū Musa ūlinha ū mu lūgūlū kūhoya na Mulungu; nang'hwe ū SEEBA ūng'witana kūfuma ū mu lūgūlū lwenūlo, ūng'wīla, “Ī mihayo īyī ūkūbawīla a banhū ba numba ya ng'wa Yakobo, ūkūbasomboolela a baana ba ng'wa Isilaeli gīkī,
4
‘Bing'we benekīlī ng'wabonile ūmo naabīītīlile a Bamisili, nū mumo naamubūūkīgije na manana ga ng'hoonà nūng'wenha kūūnū kūlī nene.
5
Na lūūlū ūlū ng'ūniigwa gete ū nene, nī lilagane lyane ng'ūlīdima, ū mu mahanga gose na gose mukūbiza sabo yane ya mpango ntaale no.
6
Na ng'hana ī sī pyī ī yose īlī sabo yane, alīyo a bing'we mukūbiza ū kūlī nene būtemi wa bagabīji, n'ihanga lyeela,’ ī mihayo yenīyī h'īyo ūkūbawīla a Baisilaeli.”
7
Hanuma ya henaho ū Musa ūshoka, wiza ūbakuminga a banamhala ba banhū ūbasomboolela pyī ī mihayo īyo SEEBA akankomeleja kūbawīla.
8
A banhū a bose būshosha balīhaya, “Tūkwīyīta pyī īyo wīhayaga ū SEEBA.” Ū Musa ūnshokeja ū SEEBA ī lishosho lyabo.
9
Hūna ū SEEBA ūng'wīla ū Musa, “Nakwiza ū kūlī bebe ng'wilunde idito, bigwe a banhū nalīhoya nang'ho, bakūsanye shikū jose.” Hūna ū Musa ūng'wīla ū SEEBA īyo bakahaya a banhū.
10
Ū SEEBA ūng'wīla ū Musa, “Jaga ū kū banhū ūkabeeje ī lelo nī ntondo, ūbakomige bafule ī shizwalo shabo.
11
Bamalīīle balinde lūshikū lwa kadatū kwīngīīla lelo, nguno ū mu lūshikū lwenūlo ū SEEBA akwika ū mu lūgūlū lwa Sinai kū būtongi wa banhū bose.
12
Tūūlaga lūbīmbī kūlūpīndīlīja ū lūgūlū, hūna ūbawīle gīkī, ‘Ilang'hanagi mutizūlinha ū mu lūgūlū, nūūlū kūlūkuumya dūhū aho lwandīgije yaya; ose ose ūyo ūlūkuumya akūbūlagwa ng'hana gete.
13
Akūpondwa mawe, nūūlū kūlaswa masonga; gwike atūkuumiwa na nkono gwa munhū. Atūlekwa ikale mpanga, abize munhū, nūūlū gūbize ntugo,’ ūlū lyūfuulwa ipembe lya kūng'ang'aala ikanza ilīhu, bakwiza ū kū lūgūlū.”
14
Ū Musa aho wīnga ū mu lūgūlū, ūja ū kū banhū kūbawīla biyeeje, bafule nī shizwalo shabo.
15
Hūna ūbawīla, “Igolanyagi chiza mumalīīle kūlwa lūshikū lwa ntondo būngī; yaya ū kūlaala na a bake bing'we.”
16
Ī dilū ya lūshikū lwa kadatū lwaho, lyūbiza ho ilunde idito a ha lūgūlū, na būpalalūki na ndabi; n'ilaka lya higūlya ly'ipembe itaale, būlī munhū ū mu ng'hambī akayūdetema.
17
Hūna ū Musa ūbafunya a banhū ū mu ng'hambī, ūbatonga kūjūmanhya nū Mulungu; būshika bīmīīla aho lwandīgije ū lūgūlū.
18
Ū lūgūlū lwenūlo ū lwa Sinai lwalī lwakundīkījiwa lyochi, nguno ū SEEBA walī wika hoi mu moto, ī lyochi lidosaga kūja ng'wigūlya gītī līlīfuma mu liiko; pyī ū lūgūlū lūyūtingina kīngī nasho!
19
Ī lilaka ly'ipembe aho lyongeja kūbiza lya higūlya, ū Musa wandya kūyomba; nū Mulungu ūnyombya n'ilaka.
20
Ū SEEBA akika ū mu lūgūlū lwa Sinai, ūng'witana ū Musa alinhe mo; ng'hana ū Musa ūlinha ū mu lūgūlū.
21
Hūna ū SEEBA ūng'wīla ū Musa, “Jaga ū kū banhū ūkabahūgūle batizūgima kūlinha kwiza kūmona SEEBA, nguno bakwenheleja banhū bingī bashile kūcha.
22
Na a bagabīji abo balegeela kūlī SEEBA ni biyeejage tame, būtizūbihoolekela ū būpelanu bokwe.”
23
Ū Musa ūng'wīla ū SEEBA, “A banhū batūdūla ū kwiza ū mu lūgūlū lwa Sinai, nguno bebe ng'wenekīlī watūhūgūlile ūtūwīla, ‘Tūūlagi mbīmbī ja kūlūpīndya ū lūgūlū; mulūkomanye lūbize heeke, nguno lūlī lwela.’”
24
Ū SEEBA ūshosha, “Jaga ko ūkize nū Alooni, alīyo a bagabīji na a banhū batizūgima kwiza ū kūlī SEEBA, būtizūbihoolekela ū būpelanu bokwe.”
25
Na lūūlū ū Musa ūja ū kū banhū ūūkabawīla ī yenīyo.
Sukuma Bible 2019
Sukuma Bible Society of Tanzania, 2019