×

現代台語譯本漢字版

出埃及記 20

1
上帝吩咐諸個一切的話,講:
2
「我是上主 — 你的上帝,有將你對 埃及 地,做奴才的家導出來。
3
「我以外你毋通有別個上帝。
4
「毋通為家己雕刻偶像,無論天頂、地上,及地下水內 所有的物,攏毋通造𪜶的像;
5
毋通給𪜶跪拜,嘛毋通服事𪜶,因為我上主 — 你的上帝是要求全情服事的上帝;怨恨我的人,我追究𪜶的罪,對父到子,到三四代;
6
疼我,遵守我誡命的人,我施恩互𪜶,直到千代。
7
「毋通濫用上主 — 你的上帝的名;因為濫用上主的名的人,我上主一定無給伊當做無罪。
8
「著會記得安歇日,守做聖日。
9
六日內著拍拼做你所有的工課,
10
毋拘第七日是上主 — 你的上帝設立的安歇日;此日,你及你的子、查某子、奴僕、女婢、牲生,以及寄居佇恁中間的人,攏毋通做工,
11
因為六日久,上主創造天、地、海,及彼中間的萬物,第七日就歇睏;所以上主賜福安歇日,設立此日做聖日。
12
「著孝敬你的老父、你的老母,通互你佇上主 — 你的上帝賞賜你的地久長徛起。
13
「毋通害死人。
14
「毋通姦淫。
15
「毋通偷提。
16
「毋通作偽證陷害你的厝邊。
17
「毋通貪你的厝邊的厝,嘛毋通貪你的厝邊的某、奴僕、女婢、牛、驢,抑是你的厝邊任何的物件。」
18
所有的人民看著熠爁,聽著雷彈及哨角的聲,閣看著山頂淐煙,就愕愕惙,遠遠徛啲,
19
對 摩西 講:「請你給阮講就好,阮一定欲聽;毋通互上帝對阮講話,阮才免死。」
20
摩西 對人民講:「毋免驚;上帝降臨是欲考驗恁,互恁常常敬畏伊,才免恁犯罪。」
21
人民遠遠徛啲; 摩西 行倚密雲,去上帝遐。
22
上主對 摩西 講:「你著給 以色列 人按呢講:『恁已經看見我對天頂及恁講話。
23
毋通為家己造任何金抑是銀的神像來及我比並。
24
著用土給我起祭壇,佇彼頂面獻燒化祭及平安祭,以及你的牛、你的羊;所有敬拜我的所在,我欲來遐賜福你。
25
你若用石頭給我起祭壇,毋通用拍過的石頭起;石頭若用傢俬拍過,就受拍垃墋。
26
毋通造崎仔層行上我的祭壇,才免露現你的下體。』」
Chinese TTVH 2021
The Bible Society in Taiwan, 2021
:
保存笔记