Ang Ginoo miingon kang Moises, “Tungas ngari kanako sa bukid kauban ni Aaron, ni Nadab ug ni Abihu uban sa 70 ka kadagkoan sa Israel ug simba kamo kanako samtang atua pa kamo sa layo.
Busa giadto ni Moises ang katawhan ug gisuginlan sa tanan nga gisugo sa Ginoo. Ang tibuok Israel nagdungan pagtubag, “Buhaton namo ang tanan nga gisulti sa Ginoo.”
Gisulat ni Moises ang tanan nga gisugo sa Ginoo. Unya sayo kaayo sa buntag sa pagkasunod adlaw, nagtukod siyag halaran sa tiilan sa bukid. Nagbutang siyag 12 ka dagkong bato nga handomanan alang sa 12 ka banay sa Israel.
Unya nagsugo siyag mga batan-ong lalaki aron paghimog mga halad nga sunogon ug pag-ihaw ug mga torong baka aron ihalad sa Ginoo alang sa usa ka halad sa pakigdait.
Unya gikuha niya ang basahon sa kasabotan ug gikusog niya kini pagbasa ngadto sa katawhan ug sila miingon, “Tumanon namo ang tanang gisugo sa Ginoo ug sundon namo siya.”
Unya gikuha ni Moises ang dugo ug gisablig ngadto sa katawhan. Siya miingon, “Mao kini ang dugo nga naglig-on sa kasabotan nga gihimo sa Ginoo uban kanato sa paghatag niya niining tanang mga sugo.”
Ang Ginoo miingon kang Moises, “Tungas ngari kanako sa bukid ug pabilin diri. Ihatag ko kanimo ang mga papan nga bato nga akong gisulatan sa tanang mga balaod aron itudlo sa katawhan.”
Giingnan ni Moises ang mga kadagkoan, “Paghulat kamo dinhi hangtod nga mahibalik kami. Ania uban kaninyo si Aaron ug si Hur. Kon kamo may kasungian, dangop kamo kanila.”
Unya ang himaya sa Ginoo mikunsad sa Bukid sa Sinai ug sulod sa unom ka adlaw naputos sa panganod ang bukid. Unya sa ikapito nga adlaw, gikan sa taliwala sa panganod, ang Ginoo mitawag kang Moises.