×

Kamba Bible Mbivilia 1956

KUMA 24

1
Na amwĩa Mose, Ambata wũke kũla kwĩ Yeova, we, na Alunĩ, na Natavu, na Aviu, na atumĩa mĩongo mũonza ma Isilaeli; na mũkĩthaitha mwĩ kũasa:
2
na Mose e weka akamũthengeea Yeova; ĩndĩ mo matikathengeee; o na andũ matikambate nake.
3
Na Mose athi na atavya andũ ndeto syonthe sya Yeova, na motw’ĩo onthe: na andũ onthe masũngĩa na wasya ũmwe, na masya, Ndeto syonthe ila Yeova ũneenete tũkeeka.
4
Na Mose aandĩka ndeto syonthe sya Yeova, na ookĩla kĩoko tene, na aaka kĩthembeo, na ituĩ ĩkĩĩmi na ilĩ ĩtina wa kĩĩma, kwĩanana na mbaĩ ĩkũmi na ili sya Isilaeli.
5
Na atũma anake ma ana ma Isilaeli, ala mathembie nthembo sya kũvĩvw’a, na kũthembea Yeova nthembo sya mũuo sya ng’ombe.
6
Na Mose oosa nyunzu ya ĩla nthakame, na amĩkĩa masaaninĩ manene; na nyunzu ya nthakame aminzangĩsya kĩthembeonĩ.
7
Na oosa ĩvuku ya ũtianĩo, na asoma andũ makĩw’a: namo masya, Tũkekaa onthe ala Yeova ũneenete, na kwĩkalaa twĩ ewi.
8
Na Mose oosa ĩla nthakame, na aminzangĩsya andũ, na amea, Sisyai nthakame ya ũtianĩo, ũla Yeova ũtianĩĩte nenyu ũndũ wa ndeto ii syonthe.
9
Nĩvo ĩndĩ Mose, na Aluni, na Natavu, na Aviu, na atumĩa mĩongo mũonza ma Isilaeli mambatie:
10
na moona Ngai wa Isilaeli; na kwaĩ ta vandũ vaseũvĩtw’e na tũvila twa savili, na ta ĩtu yo yene ũndũ wa kũthea, vala wakinyĩle.
11
Na ndaailĩĩla kw’oko kwake anene me ndaĩa ma ana ma Isilaeli: namo mamwona Ngai, na maya na manyw’a.
12
Na Yeova amwĩa Mose, Ambata vala nĩĩ kĩĩmanĩ, na wĩthĩwe vo: na ngakũnenga masengea ma mavia, na ĩla mĩao na motw’ĩo, ala nĩandĩkĩte, nĩ kana ũtonye kũmamanyĩsya.
13
Na Mose ookĩla, na Yosua mũthũkũmi wake: na Mose ambata kĩĩmanĩ kya Ngai.
14
Na amea ala atumĩa, Tweteelei vaa, kũvika twaalũka vala mũĩ ĩngĩ: na, sisyai, Aluni na Uulu me vamwe nenyu: o ũla wĩ na ũndũ, nathi vala maĩ.
15
Na Mose ambata kĩĩmanĩ, na ũla mũumbĩ wavw’ĩka kĩĩma.
16
Na ũtheu mũtisu wa Yeova wekala kĩĩmanĩ kya Sinai ĩũlũ, na ũla mũumbĩ wakĩvw’ĩka mĩthenya thanthatũ: na mũthenya wa mũonza amwĩta Mose e mũumbĩnĩ katĩ.
17
Na kwoneka kwa ũtheu mũtisu wa Yeova mũtumbĩnĩ wa kĩĩma, ana ma Isilaeli moona ta mwaki ũla ũvĩvasya.
18
Na Mose avota mũumbĩnĩ katĩ, na ambata kĩĩmanĩ: na Mose ekala kĩĩmanĩ mĩthenya mĩongo ĩna na matukũ mĩongo ĩna.
Kamba Bible 1956
God's word open for all Bible Society of Kenya, 1956
:
Save Notes