“Chabana' jun porobal cajtzalaj, re che' re q'uisis cabano ri quetan cacab bara' ruc' oxib k'abaj ri jujun u xcut, jun bara' ruc' niq'uiaj cärak'anibej.
Conojel ri jastak ri quebajwataj che ri porobal rajawaxic e re k'an ch'ich': ri c'olbal tak chaj, ri e jocobal tak chaj, ri e u lak, ri ch'ipibal tak ti'j xukuje' ri c'olbal tak rachak k'ak'.
“Chasuc'umaj jun uwo ja che ri k'ijilabal. Che ri jun u xcut pa ri u mox k'ab ri uwo ja rajawaxic quecoj tasbal re tumim lino che, cärababax u cojic jun tasbal re cawinak oxlajuj (53) bara' ruc' jun k'abaj u rabic.
Junam caban che ri jun u xcut chic pa ri riquiak'ab ri elebal k'ij, carababex jun tasbal re cawinak oxlajuj (53) bara' ruc' jun k'abaj u rabic, quebacoj juwinak (20) rakan querachilaj ri juwinak (20) u tac'alibal re k'an ch'ich'; ri e u ch'epebal xukuje' tak ri e u xiquin e re sak puak.
Che ri u xcut ri uwo ja ri cäca'y pa u kajebal k'ij, carababa' jun tasbal re juwinak wakib (26) bara' ruc' jun k'abaj, querachilaj lajuj akan cuc' lajuj tac'alibal.
Che ri kas oquibal pa ri uwo ja, cacoj jun tasbal re lajuj (10) bara' ruc' jun k'abaj ruc' niq'uiaj u rabic, re quem azul, quem morato', quiäk quem xukuje' tumim lino, u chac utzalaj t'isomanel, quebacoj quiejeb akan ruc' quiejeb tac'alibal.
Conojel ri akan ri e sutininak rij ri uwo ja, quebaban qui ch'epebal e re sak puak, xukuje' xiquinaj re sak puak xukuje' tak tac'alibal e re k'an ch'ich'.
Ri uwo ja cawinak oxlajuj (53) bara' ruc' jun k'abaj quetan ri u rabic, juwinak wakib (26) bara' ruc' quieb k'abaj ruc' niq'uiaj k'abaj quetan ri u wäch pa ri quieb u xcut, quieb bara' ruc' quieb k'abaj ruc' niq'uiaj k'abaj cärak'anibej. Ri Tasbal e re tumim lino are c'u ri qui tac'alibal e re k'an ch'ich'.
“Chaya' takanic chque ri aj israelib chi cäquic'am ulok aseit re aseitun ri c'äte u pitz'ic, rech man quechup taj ri yabal k'ak' rech quenicow amak'el.
Ri Aaron e rachilam ri e u c'ojol e are' quesuc'uman ri yabal k'ak' rech quenicow jun ak'ab chuwäch ri Ajawaxel chupam ri Lic'om Rachoch Dios re rikoj ib, chrij ri ch'ukubal ri c'o chunakaj ri caxa re ri c'ulwächinic. Jun pixab wa' ri cäcanaj chque ri aj israelib xukuje' chque ri e quija'lil.”