×

Bibilia Ilagano Lya Kale 2019

Kūfuma 27

1
“Hanuma ūkūzenga ng'walīlò gwa ntī gwa ng'wininga, gūbize na būgūngūhu wa miita īmò na sentimita makūmi adatū. Ū būgalī galī būbize miita ibīlī na sentimita makūmi adatū, nū būlīhu miita ibīlī na sentimita makūmi adatū.
2
A ha koona būnè wajo ūkūtūūla ipembe būlī hene; ī lipembe lyūdimana nū ng'walīlò, shūbiza shikolo shimò, hūna ū ng'walīlò ūgūbile shaba pyī ū gose.
3
Pyī ī shiseme sha kūtūmamīla hoi ūkūshibeeja sha shaba, shikolo gītī, mayoolelo ga mabu, makolelo, mabakuli, uma ja kūsabūlīla nyama, na a maahulīlo ga moto.
4
Ūkūgūbeegeja na lweyo lwa chūma sha shaba shishibanije gītī ntego, na matendele ga shaba ga kūtūūla a ha koona ja lweyo būnè wajo; būlī hene līmò.
5
Ū lweyo lwenūlo ūkūgūbeegeja ha kūsweng'hwa ū mu sīlīlī ya ng'walīlò, a ha gatī gatī ya ng'walīlò.
6
Hanuma ū ng'walīlò ūkūgūpūnzīla mitī ībīlī ya ng'wininga, wībila shaba.
7
Ī mitī yenīyo īkūbītiwa ū mu matendele, īgūtūūle ha gatī ū ng'walīlò kūlwa kūgūbūūkīja.
8
Ū ng'walīlò gwenūyo gūkūbiza gwa mbawa, gūlī na mhembo ū mu gatī; shiigelile gūbeejiwe gīt'ūmo ūkoolekegejiwa mu lūgūlū.”
9
“Hanuma ī lipandī lya kwikala lībeegejage gwalugwa, īpīndīlījiwe lūūba. Ū kū lwande lwa dakama lūbize lwa būlīhu bo miita makūmi anè n'itandatū, lwa matundubaali ga būlūba bo kitaani īdosilwe chiza;
10
Ī ng'hīngī jibize makūmi abīlī, jilī na malobò na magwasījo ga feza; ī shidako shaajo shibize sha shaba, nasho makūmi abīlī.
11
Nū lwande lwa sukuma lūkūbiza na būlīhu bo miita makūmi anè n'itandatū; nū kwene a matundubaali gabize ga būlūba bo kitaani būdosilwe chiza; nī ng'hīngī jibize makūmi abīlī, jilī na malobò na magwasījo ga feza; nī shidako shaajo shibize sha shaba, nasho makūmi abīlī.
12
Ū lwande lwa ng'weli ū kū būgalī galī wayo ī gwalugwa, ū lūūba lūkūbiza lwa miita makūmi abīlī n'idatū; gakūbiza ko matundubaali na ng'hīngī ikūmi, na shidako shaajo ikūmi.
13
Nū kū būgalī galī bo kū būfuma līīmi, ū kū lwande lwa kīya ya gwalugwa, būkūbiza miita makūmi abīlī n'idatū.
14
A ha kwingīlīla, ī lipandī ī līmò līkūbiza na matundubaali ga būlīhu bo miita itandatū na nusu, na ng'hīngī idatū, hamò na shidako shaajo shidatū.
15
Nī lipandī ī līngī līkūbiza na matundubaali ga būlīhu bo miita itandatū na nusu, na ng'hīngī idatū, hamò na shidako shaajo shidatū.
16
A ha mita gwa kwingīlīla ū mu gwalugwa, ūkūtūūla ho itundubaali lya būlīhu bo futi makūmi adatū; lībize lya langi ya būlulu, nzulunge na yaza, hamò na būlūba bo kitaani būdosilwe chiza na koolī wa nīmo gwenūyo; jibize ho na ng'hīngī inè, na shidako shaajo shinè.
17
Ī ng'hīngī pyī ījo jīpīndīlīgije ī gwalugwa hose hose, jikūbiza na malobò hamò na magwasījo ga chūma sha feza, na shidako sha shaba.
18
Ī gwalugwa īkūbiza na būlīhu bo futi igana na makūmi atanò, ū būgalī galī wayo būkūbiza na futi makūmi mpungatī n'itanò. A matundubaali ga lūūba lwa kwīpīndīlīja, ū būlīhu wago ū kūja ū ng'wigūlya gakūbiza ga futi mpungatī na nusu. Ī shidako sha ng'hīngī shikūbiza sha shaba.
19
Pyī ī shikolo ī shingī īsho shikūtūmama ū mu milīmo ya ng'wipandī lya kwikala shibize sha shaba; nūūlū shikabiza shilī na nīmo hīmba gwa mbika kī; nūūlū jibize mambo ja h'iheema, nūūlū ja kūtūmamīla ha gwalugwa.”
20
“Balagīlage a Baisilaeli kūkwenhela maguta gawiza ga mizeituni; ga kūyūtūūla mu talà, ī talà jiyikala jikūbakaga būlī gwa.
21
Ū Alooni na a bitūnja bakwe bakūbiza na nīmo ū ng'wiheema lya kwibilingīla, ī hanze y'isenge īlo līlī kū būtongi w'isandīko lya būkaanīji. Ū nīmo gwabo gūkūbiza gwa kūjilang'hana ī talà, jikale jikūbakaga kū būtongi bo ng'wa SEEBA, kwandīja mhīndī kūshisha ntondo yaho dilū. Ū mhayo gwenūyū gūkūbiza shilagīlo sha būja na būja ū kū shibayalīlwe na shibyalīlwe sha Baisilaeli.”
Sukuma Bible 2019
Sukuma Bible Society of Tanzania, 2019
:
Save Notes