Sugoa ang tanang hanas nga mananahi nga gihatagan kog abilidad sa pagpanahi nga tahian nilag bisti si Aaron nga iyang ikasul-ob sa dihang ididikar na siya ingon nga akong pari.
Mao kini ang bisti nga ilang himoon: tabon sa dughan, epod, sotana, kamisadentro nga binordahan, purong ug bakos. Kinahanglan magtahi silag sagradong bisti alang kang Aaron ug sa iyang mga anak nga lalaki aron mag-alagad sila kanako ingon nga mga pari.
Ang bakos nga maayong pagkahabol nga gipakabit sa kapa kinahanglan nga unay niini ug sama usab nga pagkahimo nga may bulawan kauban sa asul, tapol ug pula nga delana ug pino nga lino.
Sama sa hanas nga tighimo ug alahas ug magkukulit ug silyo, ikulit sa duha ka mahalong bato ang mga ngalan sa mga anak ni Jacob ug ipatapot kini sa engaste nga bulawan.
Ibutang kini diha sa abaga sa epod ingon nga mga handomanan sa mga anak ni Jacob. Daladalaon ni Aaron diha sa iyang abaga ang mga ngalan aron dili sila hikalimtan sa Ginoo.
“Paghimog tabon sa dughan nga gamiton alang sa pagtino sa kabubut-on sa Dios. Ayoha kini pagborda sama sa kapa. Himoa kini gikan sa panapton nga dalag, asul, tapol ug pula nga delana ug pino nga lino.
Kinahanglan nga ang ibutang 12 ka mahalong bato nga kinulitan sa mga ngalan sa mga anak ni Jacob. Kulitan kini sama sa mga silyo, ang matag usa niini may ngalan sa usa sa 12 ka banay.
Paghimo ug lain nga duha ka argulyang bulawan ug ipakabit kini diha sa atubangan ubos sa duha ka kabiba sa epod, diha gayod sa sinumpayan ibabaw sa bakos nga maayong pagkahabol.
Pahigti kanila ang mga argulya nga anaa sa tabon sa dughan ngadto sa mga argulya sa epod pinaagi sa asul nga pisi aron mahimutang pag-ayo ang tabon sa dughan ibabaw sa bakos ug dili kini matangtang.
“Kon mosulod si Aaron sa Dapit nga Balaan kinahanglan isul-ob niya ang tabon sa dughan sa paghukom nga may mga ngalan sa mga anak ni Jacob aron nga hinumdoman sila kanunay sa Ginoo.
Ibutang diha sa tabon sa dughan sa paghukom ang sagradong ripahan nga ginganlag Urim ug Tumim aron nga anaa kini sa dughan ni Aaron inig-adto niya sa atubangan sa Ginoo. Kon anaa na siya sa atubangan sa Ginoo, dad-on niya kanunay diha sa iyang dughan ang kahimanan sa paghukom sa katawhan sa Israel.
Libot sa sidsid sa sotana bordahi ug mga prutas nga granada nga hinimo sa asul, tapol ug pula nga delana. Bitayi usab ang maong sidsid ug mga kampanilyang bulawan nga isal-otsal-ot sa mga granada.
Kinahanglan nga mao kini ang isul-ob ni Aaron inig-alagad niya ingon nga pari. Inigsulod niya sa Dapit nga Balaan sa atubangan sa Ginoo ug iniggawas niya, madungog ang tinagingting sa mga kampanilya ug dili siya mamatay.
Ipasul-ob kining maong mga bisti sa imong igsoon nga si Aaron ug sa iyang mga anak nga lalaki. Unya dihogi, ordinahi ug ihalad sila aron mag-alagad sila kanako ingon nga mga pari.
Kinahanglan isul-ob kini nila inigsulod nila sa Balaan nga Dapit ug inigduol nila sa halaran aron sa ilang pag-alagad ingon nga mga pari dili makita ang ilang pagkahubo ug dili sila mamatay. Usa kini ka permanente nga tulomanon alang kang Aaron ug sa iyang kaliwatan.