Soaala-Wẽnd yeela a Moyiiz: «Bool f kẽem a Aarõ ne a kamba, a Nadab, a Abiyu, a Elazar la a Itamar. Fo na n welg-b-la ne Israyɛl kamb a taaba la maan-kʋʋr tʋʋmd la b na n tʋm m zakẽ.
Bʋʋg sʋls niyns sẽn tʋmd b sõma n yɩɩdã, m sẽn kõ b rãmb yam sɩlengã, tɩ b wʋg a Aarõ yĩnga, fut a sẽn na n yeelg a maan-kʋʋra tõoga reegr daare la a sẽn na n yeelg n tʋm maan-kʋʋra tʋʋmde.
Ad b sẽn na n wʋge: sãnem-pɛ-m-yãoogo, bag korgo. N paas sãnem-pɛ-m-poore. N paas fu-yorg kãsenga. N paas fu-yorg-bil sẽn maneg n buki ne gĩs neeba. N paas zu-vindga la sẽbdga. F kẽema, a Aarõ, n na n yeelg fu-bãmba. Maan-kʋʋra yĩng me, bɩ b sẽ fut a Aarõ kamba yĩnga.
Yaa sʋls sẽn mi b tʋʋmde n na n wʋg sãnem-pɛ-m-poorã. Wʋgd-a-la ne sãnem, ne gĩs mismiidu, gĩs miidu, gĩs moam yʋs, ne beren-dɩgr gĩs peels sẽn dĩng tɩ kẽ. Yɩta tʋʋmd mit n na n tʋm-a.
Pipi kugra zugu yaa Israyɛl kamba yʋy a yoob la b na n gʋlse. Kugra a yiib soaba zug la b na n gʋls a yooba sẽn kellã, la yaa yʋʋr fãa ne a pʋgdga, wala kamba sẽn pʋg taab rogmẽ.
Yaa ned sẽn minim n gʋlsd kugr zugu ne kɩtga n na n gʋls Israyɛl kamba yʋy. Ka bũmb sẽn na n wẽneg n yẽes ye. Sãnem paklg pʋg la b na n lɛɛg n gãneg kuga ne yʋy wã sẽn gʋls b zugã.
Kugr a ye fãa tara a Israyɛl biig yʋʋre la b sõora yaa piig la a yiibu: Yʋʋra na n gʋlsame tɩ kẽ kugrã wala bũmb sẽn ka tõe n yẽese. Buuda sak fãa tara a kugri.
Foom, Moyiiz, fo na n suii sãnem-pɛ-m-yãooga sẽn yaa korga pʋga bũmb a yiibã sẽn tar n sokdẽ la b tar n bãngd Wẽnd leokra yaa n-yẽe, bɩ ayoo wã. A Aarõ tar-b-la a yãoogẽ, a sã n wat Soaala-Wẽnd taoore; la woto me a tara Wẽnd leokrã a sẽn na n taasd Israyɛl kamba wakat buud fãa.
Ning loor a tẽnsʋkã tɩ yaa fu-yorgo. Loora na n yɩɩ tʋʋmd mit tʋʋmde. A na n yɩɩ gilga, la a na n kãda wala gãmbre sẽn na n yɩlẽ t'a ra tõog n kẽeg lɛ-lɛ.
A Aarõ sẽbgda bõn-neerã a rĩirẽ a sẽn wat wakat ning fãa maam, Naaba-Wẽnd, taoore la woto m na reeg kũun niyns fãa a Israyɛl kamba sẽn na n kõ-ma, ba b sã n ket n be tudgr la zɩɩlem pʋgẽ.
A Aarõ ne a kamb na n yeelga boto b tʋʋmda wakato, woto me b kõn kolg b zaal maan-kugra ye; ka rẽ b na maan bũmb sẽn ya wẽnga n sek b kũum. Woto yaa noor sẽn kõn teem abada, a Aarõ ne a yagensa yĩnga.»