Mouk tiro phrales, o Arones, oun leskre morsh čaven glan toute te anell. Kolen rodom vin dran i vavar Israelitarya, te venn le mange rashaya: o Nadab, o Abihu, o Elazar oun o Itamar.
Rake kolentsa, kolen me lače vasta oun o gosvepen dom, te hayvenn le mishto te sivell. Pen lenge, te krenn le ripya o Aroneske, te vell yob mange i rashay.
Kolla hi i koola, hoy te krenn le: i bečeskri possita, i rashayeskri damdira, i baya oun i gad, i shereskro pandepen, oun i layntikro pandepen, hoy yob troul peskro per pandell. Kol rashayengre koola krenn le o Aroneske oun leskre čavenge, te venn yon mange rashaya.
Palle kre kol douy barra ap i damdira pre, kote kay i phika hi. Yaake hidjrell o Aron i laba o Israeleskre čavendar ap peskre phika, te djal lo an o Debleskro kheer. Oun yon venn mange, o baro Debleske, an o shero, te vap lenge lačo.
Mouk i bečeskri possita yaake te krell, har kran le o rashayeskri damdira: dran i lačo zorelo layntikro kotar than, kay sonakay dren sido vell, ninna kouč bakrengro bal, hoy blaueto, lolo oun lolo har yag kerdo vas. An koy possita hi kol douy tikne koola dren, hoy lell o rashay, te hatsell lo vin, hoy o Devel peskre menshendar kamella.
Oun palle čip douy vavar sonakangre goustria ap kol douy kotya, hoy kote ap i damdira sido hi, kay i phika hi. Sib len ap i glanstouni rig kote, kay kol kotya khetne lino hi, pral o pereskro pandepen, hoy rikrell i damdira khetne.
Palle čip i dori dran blaueto kouč bakrengro bal an kol douy goustria, hoy ap o bečeskri possita hi, oun pande lat yaake ap i goustria ap i damdira, te hi li zoreles rikedo pral o pereskro pandepen.
Yaake hidjrell o Aron i laba kol deesh-te-douy Israeleskre čavendar ap peskro dji hako kopo, kay djal lo an o Debleskro kheer. Oun me bistrau len gar, te vap lenge lačo hako tsiro.
An ko bečeskri possita čip kol douy tikne koola, hoy kharenna momeli oun čačepen, te venn le ap o dji o Aronestar, te djal o Aron dren pash mande. Kol douy tikne koola, kolentsa t'mer vin hatsenn, hoy me, o baro Devel, i Israelendar kamau, kolen hidjrell lo ap peskro dji, te vell lo glan mande.
Pral moukess tou lat pre, te nay vell kote o shero vin. Ko kotar troul i meen sivess tou yaake zoreles har pash i ledertikri baya, te nay djal li gar paash.
Koy baya rivell o Aron an, te shounell yek les, te djal lo glan o baro Debleste an leskro kheer dren, ninna te vell lo pale vin. Kava krell lo, te merell lo gar.
An i tikno kotar lačo sonakay čin kol laba: “Kova hi o baro Debleske”, oun pande ko kotar sonakay ap i dori dran blaueto kouč bakrengro bal glan ap o shereskro pandepen.
Ko tikno kotar sonakay hidjrell o Aron glan ap peskro shero, te vell lo glan mande. Kova sikrella, te lell o Aron i doosh ap peste, hoy ap ko koova hi, hoy i Israelitarya man dan. Oun me dikau lačes ap lende.
Kre o gad dran i lačo layntikro kotar than an shoukar vastengri boudi. Kre ninna o shereskro pandepen dran lačo layntikro than, oun i pereskro pandepen an shoukar vastengri boudi.
Hako kopo kay djan le an o Debleskro plarhteno kheer, ninna te rhačrenn le i firho ap o Debleskri sasterni rhačepaskri, hounte rivell o Aron oun leskre čave kol telstoune rholopya. Yaake čivenn le penge kek doosh ap pende oun hounte merenn gar. Oun kova vell yaake o Aroneske oun leskre čavenge, hoy pal leste venna, lauterenge, kay venna rashaya, o tselo tsireske.