Ku va Isareli linõlẽlako huvove Arone lomãla vaye valume ha va mbumbila komangu yutunda, okuti Arone, lomãla va Arone, Nadava la Avihu, kuenda Eleasa la Itamare.
O pañinya vosi vakuavitima viuloño, haivo nda yukisa lespiritu liolondunge, okuti va tunga uwalo wa Arone woku u kolisa, oco a mbumbile komangu yutunda.
Uwalo va tonga yu: onjeke yoponete, efonde, esanya, ocikutu catumba, ekofue, luvia. Va tungila Arone lomãla vaye uwalo u kola ha va mbumbila komangu yutunda.
Uvia walio wa vindiwa luloño, woku litika, u pangiwa ndeci va panga efonde, u linga cimosi lalio; vo tunga lulu lalinya onoloti la a vumbula la a kusuka lovalatanya.
O tunga onjeke yoku wala ponete. Yi tungiwa luloño. Haimo muenda evi vioku tetulula lavio. Ndeci va tonga efonde haico o yi tonga. O yi tunga lalinya onoloti la a vumbula la a kusuka kuenda onanga yovalatanya.
Ovawe a soka lolonduko viomãla va Isareli ekui la vavali, a soka lolonduko viavo. Ndoku sokotola osinete, eli londuko yalio, eli londuko yalio; a kalako mekonda liapata ekui lavali.
Onjeke yoponete lovinunga viaco va vi pandeka kovinunga viefonde lukolo wonoloti, okuti yi kala kuvia wefonde wa vindiwa luloño, oco onjeke yoponete ka yi panduluka kefonde.
Oco Arone ambata olonduko via va Isareli vonjeke yoponete omo muenda evi vioku tetulula lavio, ndokuti o vi ambata kutima eci a iñila omu mu kola. Vi linga onjivaluiso yi kala hũ kovaso a Yehova.
O kapa Urimi la Tumimi vonjeke yoponete. Vi kala ponete ya Arone kutima waye eci a iñila ku Yehova. Oco Arone ambata kutima waye evi o tetuluila lavio va Isareli kovaso a Yehova oloneke viosi.
U kala kupolo wa Arone, kuenje Arone ambata ongole yovina vi kola, vina va Isareli va kolisa ha vi lingi oviali viavo vi kola. Olonjanja viosi u kala kupolo waye, oco vi taviwa la Yehova.
Arone lomãla vaye va vi wala eci va iñila kombalaka yoku ñualẽhẽla la Yehova, pamue eci veya ocipepi lutala ha va lingi upange omu mu kola, sanga ongole yi va wila ha va fi. Ci linga ocisila caye leci combuto yaye yu kuãi otembo ka yi pui.