Eci omanu va limbuka okuti poku tunda komunda Mose wa cilua, oco omanu va liongoluila ku Arone, va popia laye vati, Votoka. Tu tungile olosuku vi tu pitaile kovaso yetu. Momo omunu waco Mose wa tu tundisa vofeka ye Egito, ka tua kũlĩhĩle eci cu kuete.
Eye wa tambula ulu waco povaka avo, wo songa locivela kuenje wa tunga ociñumañuma congombe. Oco hati, A Isareli, suku yove wa ku upa vofeka ye Egito, yu.
Oco hẽla va pasuka ociteketeke, va lumba ovilumba vioku pia elisi, va nena ovilumba viombembua, kuenje omanu va tumãla loku lia loku nyua. Va votoka oku piluka.
Va pambuka lombili vonjila nda va lekisa oku endelamo. Va litungila ociñumañuma congombe. Va ci fendela. Va ci lumbila, vati, A Isareli, suku yove wa ku upa vofeka ye Egito yu.
Puãi Mose wa livondela la Yehova, Suku yaye, hati, A Yehova, onyeño yove yi wengukilila nye omanu vove wopa vofeka ye Egito lolohõlo via lua leka lia pama?
Va Egito hẽ va popela nye vati, Wa vopila oku va yambula okuti o va ipailela kolomunda, oku va kundula kilu lieve? Onyeño yove eyi ya kãla enene yi liweke. Uvi u wa sokoluila omanu vove, litiulamo.
Ivaluka akuenje vove Avirahama, la Isake kuenda Isareli, vana wa lisila lavo londuko yove yi kola. Wa popia lavo huti, Nduisa ombuto yene ndolombungululu viokilu. Ngeca ofeka yilo yosi kombuto yene ndeci nda likuminya. Va yi piñala otembo ka yi pui.
Tuli eya ocipepi locilombo kuenje wa mõla ongombe, lomo va kasi loku piluka, oco onyeño ya Mose ya wenguka. Wa kupula ovawe a kala povaka, wa a sasõwaila vepato liomunda.
Eye wa popia lavo hati, Ca popia Yehova, Suku ya Isareli, ceci, hati, Omunu omunu a malẽhe osipata yaye kocikalo. A ñuale ñuale vocilombo tunde kepandavelo toke kepandavelo. A ipaye, ci kale manjaye, ci kale u a lisungue laye.
Mose yu wa linga hati, Etaili wa litumbiki kupange wa Yehova. Co peselisi, umue omõlaye, umue manjaye. Puãi wa ci lingi okuti Yehova o vu sumuluĩsa etaili.