×

Ika Bible 2018

Ọpụpụ 33

1
Osolobuẹ nọ sị Mozizi, “Gha ebeni pụ, ịyụ lẹ ndị ị gha Ijiptu wepụha; jẹnmẹ ni alị hụ m kun enwẹn m kwe Ebraham lẹ Aziki lẹ Jekọpụ nkwa, sị, ‘M jẹnkọ d'e ye ụmụ ọnụ ya.’
2
M k'e zi mmọn-ozi n'o buruni ụnụ ụzọ; m sikọ d'a chụpụ ndị Kenaanị, ndị Amọ, ndị Hẹti, ndị Pẹrẹzi, ndị Hivu lẹ ndị Jebusu.
3
Shi ni alị ahụn mirin-ẹran lẹ mirin-ẹnwụn jun, e hu. Kanị, esọnjẹnkọ m ụnụ, makẹni ndị isi-ikẹn kẹ ụnụ wụ, amamgbe m'e gbupụ ụnụ ụzọ.”
4
Ogẹn wẹ gi nụ okuni e gbu ẹhụ, ẹhụ nọ jụ wẹ ile oyi, onwọnzini onyẹ yiri ihiẹn-mma ọwụlẹ —
5
makẹni Osolobuẹ a gwagụọ Mozizi, “Sị ndị Izrẹlụ, ‘Ndị isi-ikẹn kẹ ụnụ wụ. M ma-ama sọnjẹn ụnụ, o ru ẹ e gbupụ m ụnụ. Gbụpụchanrịngụdẹ ni ihiẹn-mma ụnụ yi, nị m marịn ihiẹn m k'e mẹ ọnụ.’ ”
6
Ya mẹ ndị Izrẹlụ gi gbụpụ ihiẹn-mma wẹ elu-ugu Horẹbụ.
7
Ogẹn hụ, Mozizi a pụ ebe wẹ ziẹntọ e jẹnzụkazị d'e tumẹ ọdụ; ọ kpọ a “Ọdụ-ozuzu”. Onyẹ chọ n'ọ marịn uche Osolobuẹ, ọ pụ ebẹhụ wẹ ziẹntọ, shi ọdụ ahụn.
8
Ogẹn ọwụlẹ Mozizi shikọ ọdụ hụ, wẹ ile e turu ọnụmụzọ ọdụ wẹ, e lee Mozizi, d'e ru n'ọ banyechanrịn imẹ ọdụ hụ.
9
Mozizi banye ọdụ hụ, orukpu ahụn jẹn elu e duhunmẹni wẹ e hidan d'a nọdị ọnụmụzọ ọdụ ahụn, Osolobuẹ e du Mozizi ku oku;
10
ndị Izrẹlụ hụn orukpu hụ k'ọ mawuru ọnụmụzọ ọdụ ahụn, wẹ ile e ke isi alị ebẹhụ wẹ rịsọnmẹ ọnụmụzọ ọdụ.
11
Osolobuẹ e du Mozizi e ku oku elee-m elee-i kẹ ịhịan lẹ ọwụ a dọn e ku oku. Wẹ kugụ Mozizi e kin azụụn ebe wẹ ziẹntọ — kanị, hụn e yen'ẹ ẹka wụ Joshụa nwa Nọnụ ara gha ọdụ ahụn pụ.
12
Mozizi nọ sị Osolobuẹ, “O teghọtan ị gwama m, ‘Duru ndịnị,’ bụ y'e ke gwa m onyẹ ị hanyeni m. Y'e kugụọ, sị, ‘Ẹfan ị rị m obi, ihiẹn i sụọ m.’
13
Omẹni ihiẹn m a sụọghọ ị, kuzi m ụzọ ị, nị m hụn ụzọ marịn ị ọhụnma kẹni ihiẹn m sụọsọnmẹ i. Nyanhankwọ nị ndị Izrẹlụnị wụ ndị nke i.”
14
Osolobuẹ nọ sị a, “Mmẹ lẹ enwẹn m k'e sọnjẹn i; m k'e mẹ obi ru i alị.”
15
Mozizi nọ sị a, “Omẹni yụ lẹ enwẹn i esọnjẹnkọ ẹnyi; emẹkwọlẹ ẹnyi gha ebeni buli kaka.
16
Nanị kẹ w'a dọn marịn nị ihiẹn mmẹ lẹ ndị nke i a sụọghọ ị mmanị yụ lẹ enwẹn i sọnjẹn ẹnyi? Kị mmẹ lẹ ndị nke i gizi nwan rị ichẹn ebe ndị ọzọ ile rị enu-ụwa rị?”
17
Osolobuẹ nọ sị Mozizi, “M k'e mẹ ihiẹn ahụn ị rịọkwasị m, makẹni ihiẹn i sụọ m lẹni ẹfan ị rị m obi.”
18
Ya Mozizi nọ sị a, “Ghọsị m nwan k'ị nọ.”
19
Osolobuẹ nọ sị a, “M sikọ nwan d'a ghafe ihun i, ghọsị ị mma m ile, kpọ ẹfan m wụ Osolobuẹ idẹnya ị: onyẹ m chọ nị m mẹni ọhụnma kẹ m k'e mẹni ọhụnma, onyẹ m chọ nị m mẹni omikẹn kẹ m k'e mẹni omikẹn.
20
Kanị, y'a hụnkọ ihun m, makẹni ịhịan a hụnkọ m rị ndụn.”
21
Osolobuẹ nọzị sị, “O nwọn ebe nọkunmẹni m hụn i k'a nọ turu elu ọmụma.
22
M gi ọghọ m ghafekọ, e bu m'i che ebe ọmụma nọ nwọn oghe, e gi m ẹka kpumẹ i d'e ru mgbe m ghafegụ;
23
e wepụ m nwan ẹka, y'a hụn azụụn m; kanị o mẹ nke ihun m, ahụnkọ w'a kaka.”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes