Ū SEEBA ūng'wīla ū Musa, “Beejaga mabalala gangī abīlī ga mawe gītī a ga kwandya, nayandīke hangī ī mihayo īyo yalī a ha mawe ga kwandya ayo wagabelagūlile.
Na lūūlū ū Musa ūbeeja mabalala gangī abīlī ga mawe, ūmo gaalī a ga kwandya. Ntondo yaho wipuuna dilū ūlinha ū mu lūgūlū lwa Sinai ūmo SEEBA walī wanagīīlīla; na a mabalala ga mawe ay'abīlī ūgabūūcha mu makono gakwe.
Ūyo akoolechaga shigongo shakwe kū banhū mashihūmbī na mashihūmbī, hama nekeja wa būkenaagūji na būgomi bo banhū na shibi shabo. Alīyo atalekaga kūbinha nsango a bakenaagūji; akabinhaga nsango baana, na a baana babo kūlwa nguno ya būkenaagūji wa basaabo, kūshisha shibyalīlwe sha kadatū na sha kanè.”
Lang'hanaga gete ūtizūbeeja ilagane nabo a bikaji ba mu sī yenīyo; nguno ūlū bandya kwīta ī yabo ya malofu, īyo bakīītaga kū bamulungu babo mu mawitongeleja gabo ga kūbafunīja shitambò, bakūng'wegeleja na a bing'we mulye ī shitambò shabo.
Nūūlū muyūsola bashīke babo bamò na bamò, ng'wabatooja kū bitūnja bing'we, hūna a bakīma benabo bandya kwīta ya malofu kū bamulungu babo, bakūbadutīla a bitūnja bing'we ū mu shītwa shenīsho.
Ī nzobe ī mbyalwa ya kwandya īkomoolage na ng'wana wa ng'holo; alīyo ūlū ūlemeelwa ū kwīkomoola, ībūlagage. Na a bitūnja bako a babyalwa ba kwandya ūkūbakomoola pye. Atizilonga nūūlū ūmò wa kwegeela kū būtongi wane alī makono dalali.
Ī shigukulu sha mifungo ūkūshiizūkwa, nī sh'ikanza lya matwajo ga kwandya ga magesa ga ngano; nī shigukulu sha kūkuminga shilīwa mu kaya a ha būkalīkījo bo ng'waka.
Nakūgapeeja a mahanga ū kū būtongi wako, nī sī yako nakūkūgalīhīja; nīyo atīho wa kwīyikūmva ī sī yako. Ū bebe shikaga dūhū ū kū būtongi bo ng'wa SEEBA Mulungu wako, ng'hangala idatū ū mu ng'waka.
Yaya kūnenhela mininga ga shitambò hamò na shose shose īsho shilī na shibimbya. Hama yaya nūūlū hado ū kūshilekeela ī shitambò sha ha shigukulu sha Pasaka, kūshisha kū ntondo dilū.
Ū Musa akikala ū mu lūgūlū, alī hamò nū SEEBA, ikanza lya shikū makūmi anè; līīmi na būjikū ataliile shilīwa nūūlū kūng'wa minzī yaya. Ū ng'wikanza lyenīlo h'akīyandīka a ha mabalala ga mawe ī mihayo y'ilagane, īyo īlī mu shilagīlo ikūmi.