Shob divessa krenn t'mari boudi! O eftato dives hi o Debleskro dives. Ap ko dives krenn či! Ko dives hi o baro Debleske. Koon ap kava dives boudrella, hounte merella.
ko bob, kay ko soungepaskro koova rhačedo vella oun leskre hidjepaskre kashta; ko makepaskro djet; ko kouč soungepaskro koova; koy plarhta an o khereskro voudar;
kol tikne sasterne kotya, hoy denn le an i phoub, te rikrenn le i plarhte zoreles, kolla plarhte hoy hi ap o kheer, ninna kolla, hoy hi troul i glanstouni platsa, oun kol shelle, hoy hi kote an-pandlo;
Halauter, kolengre djia rhačan, oun kay kaman pendar čomone te dell, van oun anan čomone o baro Debleske, te vell leske i plarhteno kheer kerdo, kay i rashaya nay boudrenn leske, oun te nay krenn le ripya kolenge.
Kones kouč bakrengro bal his, hoy blaueto, lolo oun lolo har yag kerdo vas, kova anas les pash o Moseste, ninna lačo layntikro than, bouzyengre balla, bakrengri ledertikre plarhte, hoy lolo kerdo van, oun vavar lače ledertikre plarhte.
I tsele djouvya, kay hayvan mishto thaba dran kouč bakrengro bal te krell, kran kova oun anan yaake thaba, hoy blaueto, lolo, oun lolo har yag kerdo vas, ninna lačo layntikro than.
Kol deesh-te-douy pralstoune morsha, kay his i pralstoune pral kol deesh-te-douy bare familye, kay van o Israeleskre čavendar, kolla anan kouč barra, hoy kharenna Onyx, oun vavar kouč barra, te venn le ap o rashayeskri damdira oun ap o bečeskri possita kerdo.
Ninna anan le momelengro djet oun ko koova, hoy mishto soungella, te vell lo rhačedo, ninna kouč soungepaskro koova, hoy vell an o makepaskro djet čiddo.
Ninna hayvell lo kouč barra te činell oun an goustria te čivell. Ninna nay dell lo shoukar koova vin čourye dran kasht, yaake te nay krell lo hako shoukar koova.
O Devel das les ninna o gosvepen an o dji, te sikrell lo i vavaren, har te krenn le kay boudi. Ko gosvepen das o baro Devel ninna o Oholiab. Koleskro dad hi o Ahisamak, dran o kheer Dan.
O baro Devel das kol douyen, o Bezalel oun o Oholiab, o gosvepen, te hayvenn le mishto sonakaskro koova te krell, ninna shoukar plarhte dran lačo layntikro than oun dran kouč bakrengro bal, hoy blaueto, lolo oun lolo har yag kerdo vas. Ninna nay sivenn le shoukar koova an kol kotya than. Yaake nay krenn le haki boudi, oun hayvenn, an pengro shero glan-vi te dikell, har te krenn le lat.