Ritagîreni MWATHANI biewa. O muntû wonthe ûrîa ûrî na nkoro ya kwenda kweejana gîntû nî areete kîrî kîewa kîrî MWATHANI; thaabu, na fetha, na îturutia.
Kîritîro kîa igongwana gîa kwîîthîria ubaani, na mîgaamba yaakîo, na maguta ja kwathûra na kûtheria, na ubaani îrîa yeeraga bwega, na nanga îrîa îcuuragua mwariine jwa îema rîa gûtirimanîra.
“Bathithie kîritîro kîa igongwana gîa kûritîra igongwana bia gwakîîria, na rûtara rwaakîo rwa îturutia, na mîgaamba yaakîo, na into bionthe bia gûtumîka kîritîro kîa igongwana na kîraî na gîkinyithio gîaakîo.
Tontû bûû, aka na arûme bonthe barîa baigagua nkoroone ciaao barî na wendo bwa kûrita into, barareeta mbini, na mina, na imata, na mîkathî, na into bia mîthemba yonthe bia thaabu. O muntû o muntû akînenkanagîra into bia thaabu kîrî MWATHANI.
Muntû wonthe ûrîa waarî na nguû injirû, kana ya mûkû, kana întuune, kana nguû înjega ya guee ya mbûri kana mîgûûta ya ntûrûme, kana mîgûûta ya mbûri arareeta.
Aka bonthe barîa baijî gûtuma baratuma na njara ciaao, barareeta nguû irîa baatumîte; injirû, na cia mûkû, na intuune na nguû cionthe irîa ciatumi bwega.
MWATHANI nî abaeete ûûme bwa kûmenya kûrita ngûgî cionthe irîa iritagwa nî agemia maiga, na eerekeria mwakîre jwa mwako, na atumi nguû irîa nthongi cia rangi ya wiirû bwa îgûrû, na ya mûkû na întuune. Bau baarî atîa ba ngûgî cia mîthemba yonthe.”