Musa nodwoko Ruoth Nyasaye niya, “Ok gibi yie, kata winjo gima awacho, to gibiro mana wachona ni, ‘Ruoth Nyasaye ne ok ofwenyoreni.’ To koro abiro timo ang’o?”
Ruoth Nyasaye nowachone niya, “Tim kamano mondo onyis jo-Israel ni Ruoth Nyasaye ma Nyasach kweregi, ma Nyasach Ibrahim gi Isaka kod Jakobo osefwenyoreni.”
Ruoth Nyasaye nowacho ni Musa kendo niya, “So lweti e lawi.” Notimo kamano, to kane ogolo lweteno oko, nonwang’o kotimo dhoho, kendo olokore rachar ka pe.
Eka Ruoth Nyasaye nowachone ni, “So lweti e lawi kendo.” Mi notimo kamano, to kane ochako ogole oko nonwang’o kochango modoko mangima mana kaka dende duto.
Musa nowacho ni Ruoth Nyasaye niya, “Ruoth kiyie; ok an ng’at mong’eyo wuoyo e nyim ji, kata mana sani, ma koro isewuoyo kodani, pod an mana kamano. Lewa pek, kendo aywayo wach.”
Ruoth Nyasaye nowachone niya, “En ng’a ma chueyo dho dhano, kata en ng’a ma miyo dhano doko momo, kata ma ite odino? En ng’a mamiye wang’ mabith, kata loke muofu? Donge an Ruoth Nyasaye ema atimo gigi duto?
Ruoth Nyasaye nokecho gi Musa, mowachone niya, “Harun owadu ma ja-Lawi donge nitie? En to ang’eyo ni onyalo wuoyo maber. Ero en e yo, obiro iri, kendo obiro bedo mamor ahinya koneni.
Musa nodhi ir Jethro jaduong’ne mowachone niya, “Yie mondo adog Misri ir jowetena, mondo ane ka pod gingima.” Jethro nowachone niya, “Ber, dhi gi kue.”
Ruoth Nyasaye nowacho ni Musa niya, “Koro ero idok Misri, to nyaka ine ni itimo honni ma asemiyi teko ni mondo itim, e nyim Farao. To abiro miyo chunye doko matek, mi ok nowe jo-Israel thuolo mondo oa.
mi ne giyie ni kara Ruoth Nyasaye oseoro Musa adier. Bende kane giwinjo ni Ruoth Nyasaye oselimo jo-Israel, moneno chandruokgi, ne gikulore, mi gilame.