×

Ika Bible 2018

Ọpụpụ 40

1
Ya kẹ Osolobuẹ nọ sị Mozizi,
2
“O ru ụhụọhịn ibuzọ imẹ ifọn ibuzọ, y'e tumẹ Ọdụ-nsọ, Ọdụ-ozuzu.
3
“Bu Ẹkpẹti Ashịa-ẹri che imẹ Ọdụ-nsọ; y'e gi Ẹkwa-mgbọnkin tankin ẹkpẹti ahụn.
4
Bubanhan teburu; y'e dọn ihiẹn ndị ahụn ya lẹ wẹ wị ye elu ẹ; y'a bịa d'e bubanhan obu-ukpẹ, dọnyesọnmẹ ukpẹ rịn'a.
5
Bu ukpo goru hụ wẹ nọ a mụ nsẹnsi che ihun Ẹkpẹti-Ashịa-ẹri, y'e bu ẹkwa wẹ gi a tankin ọnụmụzọ che ọnụmụzọ Ọdụ-nsọ.
6
“Bu ukpo hụ wẹ n'a dụn ẹjan ọkụn che ihun ebẹhụ wẹ gha a banye Ọdụ-nsọ, Ọdụ-ozuzu;
7
bu afẹrẹ-mirin hụ wẹ gi a chanchan ụkụ lẹ ẹka che ẹgbata Ọdụ-ozuzu lẹ ukpo nchụn-ẹjan, y'e bu mirin che imẹ ẹ.
8
“Mẹmẹpụha nwan ezi ẹ azụụn a ile, y'a tan ẹkwa hụ tankin ọnụ-mgbọn ẹ.
9
“Weri udẹn-ntumẹ hụ fekpu Ọdụ-nsọ lẹ ihiẹn ile rị imẹ ẹ, dọn ẹ nsọ, ịya lẹ ihiẹn ile sọnn'ẹ, n'ọ hụn ụzọ rị nsọ.
10
Y'e fezi ẹ ye ukpo hu wẹ jẹnkọ d'a nọ a dụn ẹjan ọkụn lẹ ihiẹn ile sọnn'ẹ, dọn ukpo hụ nsọ n'ọ wụrụ ihiẹn rị okẹn nsọ.
11
Fe udẹn-nsọ hụ ye afẹrẹ-mirin lẹ ụkụ a, dọn wẹ nsọ.
12
“Wẹhẹ Ẹrọnụ lẹ ụmụ a ọnụmụzọ Ọdụ-ozuzu, y'e gi mirin chanchan wẹ ẹhụ.
13
Y'e yimẹ Ẹrọnụ ẹwuru-nsọ ndịnẹi, hukpu ẹ udẹn-ntumẹ, dọn ẹ nsọ, n'ọ hụn ụzọ rụnmanị m ọrụn onyẹ nchụn-ẹjan.
14
Wẹhẹ ụmụ a, y'e yimẹ wẹ ẹwuru ọrụn nchụn-ẹjan tueru alị.
15
Hukpu wẹ udẹn-ntumẹ k'i dọn hukpu nẹdi wẹ, ni wẹ hụn ụzọ rụnmanị m ọrụn ndị nchụn-ẹjan. Udẹn-nsọnị wẹ jẹnkọ d'e hukpu wẹ kẹ w'e gi wụsọnmẹ ndị nchụn-ẹjan agbọ ile lalanị.”
16
Mozizi mẹchanrịn ihiẹn ile kẹ Osolobuẹ dọn gwa a.
17
Ụhụọhịn ibuzọ imẹ ifọn ibuzọ ahụa nke ẹbụọ kẹ wẹ tumẹ Ọdụ-nsọ hụ.
18
Mozizi e tumẹ Ọdụ-nsọ: o bu ụkụ ndịnẹi che ọnọdị wẹ; o tumẹsọnmẹ ibe-osisi ye wẹ; ọ ghayesọnmẹ akp'osisi e fiẹngipụnị wẹ; o tumẹ adansụn ndị rịn'a.
19
O bu okpukpu ibuzọ gbama elu Ọdụ-nsọ, buzi okpukpu ẹbụọ họdụnị gbama elu nke ibuzọ hụ: nọkẹ kẹ Osolobuẹ dọn gwa a.
20
O bu ibe-ọmụma ẹbụbụọ hụ wụ ọshẹri che imẹ Ẹkpẹti-Osolobuẹ, ọ fa akp'osisi ndị hụ wẹ gi goru nyankwama ye ọnọdị wẹ ụsụọ ẹkpẹti hụ, o bu okun ẹ wẹ k'a nọ elu ẹ a gbarị isi che elu ẹ.
21
O bubanhan Ẹkpẹti-nsọ imẹ Ọdụ-nsọ, tan Ẹkwa-mgbọnkin hụ, gi ẹ tankin Ẹkpẹti-nsọ hụ wụ Ọshẹri: kẹ Osolobuẹ dọn gwa a.
22
O bu teburu-nsọ che ẹbamịn-ugu imẹ Ọdụ-ozuzu, o wen'ẹ ghafe Ẹkwa-Ọtankin hụ;
23
o bu brẹdi hụ dọnmẹ elu ẹ, ihun Osolobuẹ, kẹ Osolobuẹ dọn gwa a.
24
Ọ nọ bu obu-ukpẹ hụ che nchetarị ihun teburu hụ, ẹbamịn ndịdan-mirin imẹ Ọdụ-ozuzu hụ,
25
dọnyesọnmẹ ukpẹ ndị rịn'a ihun Osolobuẹ: kẹ Osolobuẹ dọn gwa a.
26
O buzi ukpo-nsẹnsị hụ wẹ gi goru mẹmẹ che imẹ Ọdụ-ozuzu, ihun Ẹkwa-mgbọnkin hụ wẹ gi tankin Ẹkpẹti Osolobuẹ,
27
ọ nọ elu ẹ mụ nsẹnsi e shin ọhụnma: kẹ Osolobuẹ dọn gwa a.
28
Ọ nọ nwan tan Ẹkwa-ọnụmụzọ Ọdụ-nsọ.
29
Ọ nọ bu ukpo hụ wẹ nọ a dụn ẹjan ọkụn che ẹhụ ọnụmụzọ Ọdụ-nsọ, Ọdụ-ozuzu, nọ elu ẹ chụn ẹjan w'a dụn ọkụn lẹ ẹjan-ọka: kẹ Osolobuẹ dọn gwa a.
30
Ọ nọ bu afẹrẹ-mirin hụ che ẹgbata Ọdụ-ozuzu lẹ ukpo hụ, buche ẹ mirin w'e gi a chanchan ẹhụ,
31
hụn Mozizi lẹ Ẹrọnụ lẹ ụmụ Ẹrọnụ gi a chanchan ẹka lẹ ụkụ:
32
ogẹn ọwụlẹ wẹ bankọ Ọdụ-ozuzu mọbụ jẹnkọ ukpo hụ wẹ nọ a chụn ẹjan, a chanchangụ wẹ ẹka lẹ ụkụ wẹ kẹ Osolobuẹ dọn gwa Mozizi.
33
Ya Mozizi nọ tan ẹkwa ndị ahụn mẹmẹpụha ezi Ọdụ-ozuzu hụ ghahunmẹ Ọdụ lẹ enwẹn ẹ lẹ ukpo nchụn-ẹjan hụ rị ihun ẹ; o gi ẹkwa tankin ọnụ-mgbọn ẹ. Ẹrịra kẹ Mozizi dọn rụnchanrịn ọrụn hụ.
34
Ya kẹ orukpu nọ kpumẹ Ọdụ-ozuzu, ọghọ rị Osolobuẹ ẹhụ e jun Ọdụ nsọ.
35
Mozizi asazịnị ẹka banye Ọdụ-ozuzu, makẹni orukpu a nọkwasịgụọ a, ọghọ rị Osolobuẹ ẹhụ e jun imẹ Ọdụ-nsọ.
36
Hụn ahụn ile ndị Izrẹlụ jẹnkọ, ogẹn ọwụlẹ orukpu hụ gha elu Ọdụ-nsọ buli, wẹ nwẹn a gha ebẹhụ wẹ ziẹntọ buli;
37
kanị omẹni orukpu hụ ebulini, ebulikọ wẹ — d'e ru ụhụọhịn o buli.
38
Ya wụ, orukpu Osolobuẹ a nọ elu Ọdụ-nsọ ebe eki rị elu, o ru uhinhin, ọkụn hụ imẹ orukpu ahụn, hụn ikpụnọ Izrẹlụ ile e legha; ẹrịra k'ọ rị hụn ahụn ile wẹ rị ụzọ.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes