Tin, hriak thih mi lain, biak bûk leh a chhûnga awm zawng zawngte chu hnawihin, i tithianghlim tûr a ni, a bungbêl zawng zawngte nên; tichuan, a lo thianghlim ang.
Tin, hâlrala thilhlanna maichâm leh a hmanrua zawng zawngte chu hriak hnawihin, maichâm chu i tithianghlim tûr a ni; tichuan, maichâm chu thianghlim tak a lo ni ang.
Arona chu silhfên thianghlimte chu i sintîr tûr a ni; tichuan, puithiam hna thawka ka tân rawng a bâwl theihna tûra hriak thihin, i tithianghlim tûr a ni.
Puithiam hna thawka ka tân rawng an bâwl theihna tûrin, an pa hriak i thih ang khân anmahni chu hriak i thih tûr a ni; hriak thiha an awm hi, an thlahte thleng pawha kumkhuaa puithiam tûra ruat an ni reng tawh ang tih, an tân chhinchhiahna a ni ang,” tiin a sawi a.
Tin, Mosia chuan biak bûk chu a han din a, a nghahchhan ker kuakte a han rem a, a ban rem khâwmte chu a han din a, a bangrelte chu a han rawlh a, a bante chu a han tung a.
Tin, inbiakna puan in biak bûk kawngka bulah chuan hâlrala thilhlanna maichâm a hûng a, a chungah chuan hâlral thilhlan leh ei tûr thilhlan a hlân a, Lalpan Mosia thu a pêk ang khân.
Tin, biak bûk leh maichâm vêl chuan hung chhûng kawtlai chu a siam a, a hung chhûng kawtlai kawngka puanzâr chu a zâr a. Chutichuan, Mosia chuan hna chu a zo ta a.
Chhûnah chuan Lalpa chhûm chu biak bûk chungah a zîng a, chutah chuan zânah mei a lo awm ṭhîn a, Israel-ho zawng zawng chuan an kalna tûr lama an kal chhûng zawng chuan chu chu an hmu zêl ṭhîn a ni.