|
| 1 |
|
| Ya kẹ Osolobuẹ nọ sị Mozizi, “Lee ẹ, e mẹgụọ m'ị nọ kẹ Osolobuẹ ebe eze wụ Fẹro rị — Ẹrọnụ nwẹnẹ i a wụrụ ọnụ ị, nọkẹ onyẹ-amụma. |
|
| 2 |
|
| I jẹnkọ d'e kuchanrịn ihiẹn ile m k'a gwa ị ku; Ẹrọnụ nwẹnẹ i k'a gwa Fẹro n'ọ hatu ndị Izrẹlụ nị wẹ gha alị a pụ. |
|
| 3 |
|
| Kanị m k'a kpọkin obi Fẹro; ọsụọdẹn'a nị m rụn ọrụn atụmẹnya lẹ ihiẹn-ghọsị bugbu enwẹn ẹ ọda imẹ alị Ijiptu, |
|
| 4 |
|
| o gọnkọ ụnụ ntịn. Ogẹn hụ kẹ m'e gi mẹ alị Ijiptu ihiẹn, yesọnmẹ wẹ ezigbo afụnfụn, gi e wepụha itu-agha m ile, ndị nke m ndị Izrẹlụ. |
|
| 5 |
|
| Ogẹn hụ kẹ ndị Ijiptu e gi marịn nị m wụ Osolobuẹ — ogẹn m k'e gi mẹshi wẹ ikẹn, gha imẹ alị Ijiptu wepụha ndị Izrẹlụ.” |
|
| 6 |
|
| Mozizi lẹ Ẹrọnụ mẹchanrịn kẹ Osolobuẹ dọn gwa wẹ. |
|
| 7 |
|
| Mozizi rị ahụa ọgụn ẹnọ ogẹn wẹ gi gwa Fẹro oku, Ẹrọnụ rị ahụa ẹtọ kwasị ọgụn ẹnọ. |
|
| 8 |
|
| Osolobuẹ nọ sị Mozizi lẹ Ẹrọnụ, |
|
| 9 |
|
| “Ogẹn Fẹro k'e gi sị ụnụ ‘Rụnghọsịnị ẹnyi ọrụn-atụmẹnya w'e gi kweri oku ụnụ’, y'a sị Ẹrọnụ, ‘Weri ọkpọ ị tụye alị ihun Fẹro’, o k'e họnrin agwọ.” |
|
| 10 |
|
| Ya Mozizi lẹ Ẹrọnụ nọ jẹn d'e kunrun Fẹro; wẹ nọ mẹchanrịn kẹ Osolobuẹ dọn gwa wẹ: Ẹrọnụ a tụ ọkpọ a ye ihun Fẹro lẹ ịhịamẹ ẹ, ọkpọ a nọ họnrin agwọ. |
|
| 11 |
|
| Ya kẹ Fẹro nọ kpọbanhan ndị marịn ihiẹn lẹ ndị a gwọ ọgụn. Ndị Ijiptu ndịnị wẹ kpọbanhan nọzị gi ọgụn wẹ mẹzikwọ ihiẹn ohu hụ: |
|
| 12 |
|
| onyẹ-onyẹ nọ tụ ọkpọ a ye alị, ọkpọ wẹ nọ họnrinsọnmẹ agwọ; kanị, ọkpọ Ẹrọnụ nọ luepụsọnmẹ nke wẹ. |
|
| 13 |
|
| Kanị obi Fẹro kpọkin akpọhịn, o gọnni Mozizi lẹ Ẹrọnụ ntịn; ọ rịhụ kẹ Osolobuẹ dọn ku. |
|
| 14 |
|
| Osolobuẹ nọ sị Mozizi “Obi Fẹro kpọkin akpọhịn; ọ jụgụọ n'ọ hatukọ ndịnị nị wẹ lama. |
|
| 15 |
|
| Ụzụtụntụn y'e jẹn d'e kunrun ẹ ebẹhụ o jẹnkọ Iyi Naịlị. Turu mkpẹnrẹn Naịlị ebẹhụ cheri ẹ; weri ọkpọ ahụn họnrin agwọ kwọndọn. |
|
| 16 |
|
| Y'a sị a, ‘Osolobuẹ, Chuku ndị Hibru, zi m d'a sị ị “Hatu ndị nke m, kẹni wẹ fe m imẹ atụ, kanị y'e ke gọnkwọ nwan ntịn.” |
|
| 17 |
|
| Osolobuẹ rị nwan a sị ị, “M jẹnkọ nwan d'a ghọsị ị nị m wụ Osolobuẹ: Lee ẹ, m jẹnkọ d'e gi ọkpọnị rị m ẹka fịan mirin Naịlịnị, mirin ẹ e họnrin ẹdeke. |
|
| 18 |
|
| Azụn rị imẹ ẹ k'a nwụn, mirin ẹ e shinmẹ; ndị Ijiptu asakọ ẹka ra a.” ’ ” |
|
| 19 |
|
| Osolobuẹ nọzị sị Mozizi, “I k'a sị Ẹrọnụ, ‘Weri ọkpọ ị, y'a tịnpụ ẹka ị zinmẹ mirin ile rị alị Ijiptu: kẹ mirin rị iyi kẹ hụn rị uroro-amị ndị wẹ gu mirin gha e ru ugbo wẹ kẹ ọgbọ-mirin kẹ mirin ile wẹ dọnmẹtọ imẹ Ijiptu’; wẹ ile k'e họnrinchanrịn ẹdeke. Ẹdeke k'e jun ụzọ ile imẹ Ijiptu, kẹ ihiẹn-mirin wẹ gi osisi mẹmẹ kẹ hụn wẹ gi ọmụma tụ.” |
|
| 20 |
|
| Ya Mozizi lẹ Ẹrọnụ nọ mẹchanrịn kẹ Osolobuẹ dọn ku. Idẹnya eze lẹ ịhaịmẹ ẹ, Mozizi nọ weshi ọkpọ a elu, fịan mirin Naịlị hụ, mirin ẹ ile nọ họnrin ẹdeke. |
|
| 21 |
|
| Azụn rị Naịlị nọ nwụnhụn, mirin iyi ahụn nọ shinmẹ, o shinkpo nke wụ nị ọ nịnị ndị Ijiptu ra; ẹdeke e jun ụzọ ile imẹ alị Ijiptu. |
|
| 22 |
|
| Kanị ndị a gwọ ọgụn imẹ alị Ijiptu nọzị gi ọgụn wẹ mẹzikwọ ihiẹn ohu ahụn. Obi nọ kpọkin Fẹro eze Ijiptu, ọ jụ n'o gọnkọ Mozizi lẹ Ẹrọnụ ntịn. Ihiẹn mẹhụ kẹ Osolobuẹ dọn ku. |
|
| 23 |
|
| Eze Ijiptu e gbehutọdẹ, kin azụụn shi imẹ ọgwa a; onwọnzikwọnị ihiẹn ọ kpọ hụnnị. |
|
| 24 |
|
| Ya kẹ ndị Ijiptu nọ gumẹ mkpẹnrẹn mirin Naịlị nị wẹ hụn mirin ra, makẹni asanị wẹ ẹka ra mirin Iyi hụ. |
|
| 25 |
|
| O mẹpụ akpọhịn ẹsa Osolobuẹ mẹ ihiẹn hụ o mẹ Iyi Naịlị, |
|
|
|
|