Ĩndĩ Valao ndakamwĩthukĩĩsya, nakwa ngailĩĩla kw’oko kwakwa Misili, na ngyumya nguthu syakwa, andũ makwa ana ma Isilaeli, kuma nthĩ ya Misili na mosilĩlo manene.
Na Mose na Aluni malika kwa Valao, na meeka ũu, o tondũ Yeova wameaĩe: na Aluni ekya ndata yake nthĩ mbee wa Valao na mbee wa athũkũmi make, na yatw’ĩka nzoka.
Na Yeova amwĩa Mose, Mwĩe Alunĩ, Osa ndata yaku, noitambũũkya kw’oko kwaku ĩũlũ wa manzĩ ma Misili, ĩũlũ wa mbũsĩ syoo, na ĩũlũ wa tũlũsĩ twoo, na ĩũlũ wa ndia syoo, na ĩũlũ wa maia moo onthe ma manzĩ, matw’ĩke nthakame; na kũkeethĩwa nthakame nthĩ yonthe ya Misili, syĩndũnĩ sya mĩtĩ o na syĩndũnĩ sya mavia.
Na Mose na Aluni meeka ũu, o tondũ Yeova weaie; na ookĩlya ndata, na akũna manzĩ ala maĩ ũsĩnĩ, Valao ene, o na athũkũmi make mene; na manzĩ onthe ala maĩ ũsĩnĩ maalyũka nthakame.