1
Itẹn Solomọnụ nwa Defidi, hụn wụ eze Izrẹlụ:
2
Ịhịan k'e gi wẹ nwọnrin amamihiẹn lẹ ọzụnzụn, a saẹka a ghọta oku mini.
3
Wẹ gizi wẹ a zụn ịhịan kẹn'ọ ma bi ọhụnma, e mẹ ezi-omumẹ, e mẹ ihiẹn ile k'o furu, e mẹ onyẹ-onyẹ k'o furu.
4
Wẹ gi wẹ e mẹ onyẹ marịnlẹni ihiẹn e nwọnrin akọ-lẹ-uche, ẹ mẹ ikoro a marịn ihiẹn, e gi uche e bi.
5
Onyẹ hụn marịn ihiẹn ya gọnzikwọ wẹ ntịn, gi wẹ marịnwaye; wẹ k'e yezikwọnị onyẹ nwọn uche ẹka bi;
6
Ịhịan k'e gizi wẹ a marịn alị itẹn lẹ ilu, gi wẹ a ghọta oku ndị marịn ihiẹn lẹ oku a fụ ọrụn ọghọta.
7
Ịtụ egun Osolobuẹ kẹ ịhịan gi e nwọnmẹ amamihiẹn; ndị-nzuzu e legberi amamihiẹn lẹ ọzụnzụn.
8
Nwa m, welụa isi alị ebe nẹdi i rị a zụn ị; alatọkwọlẹ ihiẹn nnẹ i kuzi i;
9
wẹ k'a wụrụn'ị ihiẹn wẹ gi tu i ugọn lẹ ihiẹn-olu wẹ gi chọ ị mma.
10
Nwa m, ndị-njọ chọ nị wẹ rẹrẹrị ị, ekwerikwọlẹ!
11
Wẹ sị ị, “Sọnmẹ ẹnyi; nị ẹnyi d'a warị che onyẹ ẹnyi k'e gbu, nị ẹnyi d'e che wẹ gbu — ọsụọn'a nị onwọnni ihiẹn wẹ mẹ;
12
ẹnyi e luepụ wẹ lẹ ndụn kẹ ili dọn e luepụ ịhịan, lue wẹ, luechanrịn kẹ mgbugbu hụ dọn e luepụ ndị nwụnnị.
13
Ẹnyi jẹnkọ d'a hụn ihiẹn ile w'a chọ achọ kpọnrin, kpọn ihiẹn ẹnyi zu jun iwe ẹnyi;
14
sọnmẹ nwan ẹnyi, ẹnyi ile k'e ke ihiẹn ẹnyi nwọnhẹn.”
15
Nwa m, esọnkwọlẹ wẹ gha ụzọ wẹ, ụkụ ị erukwọlẹ ụzọ wẹ;
16
makẹni eje-ihiẹn kẹ ụkụ wẹ a hụhụ d'e mẹ, nkanran igbu-ịhịan kẹ w'e be.
17
Ihiẹn la iwi k'ọ wụ nị ịhịan rị e shimẹ ọnyan-nnụnụ idẹnya nnụnụ ile!
18
Enwẹn wẹ kẹ ndị-njọnị warị e che nị wẹ gbu; enwẹn wẹ kẹ wẹ rịhụ e che nị wẹ gbu!
19
Ẹrịra k'ọ rịnị ndị a kpa eje-egho; eje-erere ahụn e gbu ndị nwọnn'ẹ isi.
20
Amamihiẹn rị ogbe a hị! Ọ nọ ebe ịhịan ile nọ e zu, a hị;
21
ọ hụ isi ọgbara-ogbe ịhịan jun, e yi oro, ọ hụzị ọgwa rị ọnụ-mgbọn obodo e ku ihiẹn ọ rị e ku, a sị:
22
“Euu, ndị ẹwobi, ele mgbe kẹ ‘Onwọnni hụn m marịn’ k'a sụọbehi ụnụ? Elee ogẹn kẹ ịmụ ịhịan ẹmụ k'a sụọbehi ndị-nlelịa? Elee mgbe kẹ ịmarịn-ihiẹn k'e zebehi ndị-nzuzu ize?
23
Omẹni ụnụ te gọn ntịn kẹ m rị a jụgbọ ụnụ, nkẹ a gwachanrịn m ụnụ ihiẹn rị m obi, mẹ ụnụ marịn ihiẹn m rị e ro.
24
Kanị, makẹni ụnụ azanị kẹ m kpọ oku, makẹni onwọnni onyẹ gọn ntịn kẹ m tịnpụ ẹka ẹbụọ nị m nabanhan ụnụ,
25
ebe omẹni ụnụ a jụchanrịn ndụnmọdụn m ile, jụ nị ụnụ egọnkọ ntịn ọjụgbọ m jụgbọ ụnụ,
26
mmẹ nwẹn sikọ d'a mụzịkwọ ẹmụ ogẹn eje-ihiẹn e gi kunrun ụnụ, m k'a mụgbu ụnụ ogẹn ọdakin e gi kunrun ụnụ;
27
ogẹn ihiẹn ụnụ a tụ egun ẹ e gi kunrun ụnụ lekẹ ufere e tikpọnị, ogẹn okẹn eje-ihiẹn e gi kunrun ụnụ nọkẹ okẹn ufere rị a kpọnị, ogẹn eje ihiẹn-ụfụ lẹ nsọngbu e gi kunrun ụnụ.
28
Ogẹn ahụn, ụnụ jẹnkọ d'a kpọ m, kanị azakọ m; ụnụ k'e gi akpak'alị obi ụnụ chọ m kanị ụnụ ahụnkọ m —
29
makẹni amamihiẹn ze ụnụ ize, makẹni ụnụ ahanrịnnị ịtụ-egun Osolobuẹ.
30
Ụnụ egini ndụnmọdụn m dọn, ụnụ egọnni ntịn ogẹn m gi jụgbọ ụnụ,
31
ụnụ jẹnkọ nwan d'e ri mkpụrụ hụn obibi ụnụ mịpụha, gi isi buru ihiẹn ụnụ romẹ, ẹfọ e jun ụnụ.
32
Makẹni isi ndị ẹwobi e fesọnmẹ k'e gbu wẹ, ẹfọ-ojunjun ndị-nzuzu k'e tikpọ ndị-nzuzu;
33
kanị onwọnni ihiẹn k'e mẹ onyẹ e gọn m ntịn, ẹhụ jẹnkọ d'e fu ẹ, egun eje-ihiẹn atụkọ a.”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc