×

Ika Bible 2018

Itẹn 13

1
Nwa nwọn uche a nị nẹdi ẹ a zụn a, kanị onyẹ-nlelịa ara gọn ntịn wẹ gha a jụgbọ a.
2
Oku-ọnụ ịhịan e ye ẹ ihiẹn rị mma e ri, kanị ihiẹn hụn a gụn onyẹ ghẹrẹ-ghẹrẹ-ghẹrẹ e buhẹ ntikpọ.
3
Onyẹ hụn e kwọndọn ire ẹ rị e chedọn ndụn a, kanị onyẹ ghalẹni e rogụ o kebe ku k'a la iwi.
4
Ihiẹn a gụnsọnmẹ onyẹ-nzụnzụn bụ onwọnni hụn e ru ẹ ẹka; kanị onyẹ ẹka shi ikẹn e nwọnhẹnchanrịn ihiẹn rị a gụn a ẹgụn.
5
Ntụ e ze onyẹ ezi-omumẹ ize, kanị onyẹ eje-omumẹ e wẹhẹdẹ ifẹnrẹn lẹ ịfa.
6
Ezi-omumẹ e che onyẹ ezioku nche, kanị eje-omumẹ e mẹ onyẹ-njọ a la iwi.
7
Onyẹ ohu e mẹ kẹ ọdanfịn bụ onwọnni ihiẹn o nwọn; hụn ẹbọ e mẹ kẹ ogbẹnnyẹ bụ o nwọnghọ ihiẹn ọda-ọda.
8
Akụ-lẹ-ụba ọdanfịn k'o gi a gbarị isi ẹ ẹka eje-ịhịan, kanị w'a ra rọndẹ ogbẹnnyẹ ụdị egunni.
9
Ukpẹ onyẹ ezi-omumẹ e nwun ọda-ọda, kanị ukpẹ onyẹ eje-omumẹ k'e tinyụn.
10
Ikpe-ikpe kẹ mpache e se, kanị ẹka ndị a nụ ndụnmọdụn kẹ ịhịan a nọ a hụn amamihiẹn.
11
Eje-egho e gi ẹrẹtẹ-ẹrẹtẹ a la, kanị hụn wẹ kpa ẹkẹrẹ-ẹkẹrẹ a ba ọbụba-ọbụba.
12
Ịhịan tụbiekẹ ẹnya ihiẹn, obi a nahịn a; kanị ihiẹn wẹ rị a tụ ẹnya a bịanị, wụ mkpụrụ osisi e ye ndụn.
13
Onyẹ wẹ gwa oku o lelịa a k'e gi isi ẹ buru; kanị onyẹ gbaye iwu wẹ ye ẹ, ọ narịn ụgwọ-ọrụn.
14
Nkuzi onyẹ marịn ihiẹn nọ kẹ isi mirin hụn e ye ndụn; o mẹ ịhịan adanlẹ ọnyan ọnwụn.
15
Ọhụnma a bịanị onyẹ nwọn ezigbo nghọta, kanị ihiẹn a fụsọnmẹ onyẹ ihunnaị ọrụn.
16
Onyẹ ọwụlẹ nwọn uche e mẹ ihiẹn we ẹ ẹnya sụọ, kanị onyẹ-nzuzu gha e mẹ ihiẹn, ọ hụ a ghọsị nzuzu ẹ.
17
Onyẹ-ozi wụ eje-ịhịan e nwọnsọnmẹ nsọngbu, kanị ezigbo ụkọ e mẹ udọn a rịzị.
18
Onyẹ jụ ọzụnzụn ogbẹnnyẹ lẹ ịfa e họnrin nke ẹ, kanị onyẹ gi oku wẹ gwa a bihutọ ẹka, e ye w'ẹ ọghọ.
19
Ịhịan hụn ihiẹn rị a gụnn'a, ọ sụọ a ru umẹ-ndụn, kanị o ze ndị-nzuzu ize imẹbehi eje-ihiẹn.
20
Onyẹ sọn onyẹ marịn ihiẹn kpa ọ marịn ihiẹn, kanị onyẹ sọn onyẹ-nzuzu kpa ọ rụ ẹhụ.
21
Eje-ihiẹn a chụsọn onyẹ njọ, kanị ihiẹn rị mma wụ ụgwọ-ọrụn onyẹ ezi-omumẹ.
22
Onyẹ-ọma a latọnị ụmụ-ụmụ a ukuu, kanị ẹka ndị ezi-omumẹ kẹ akụ-lẹ-ụba onyẹ-njọ a lashi.
23
Alị ogbẹnnyẹ hụn o kelẹni rụn nwọn ikẹn mẹ ihiẹn ọda-ọda, kanị o ru, mmẹgbu a zarịchanrịn a.
24
Onyẹ sị ọ fịankọ mkpịnsịn, ihiẹn nwa a ara sụọ a; kanị hụn ihiẹn nwa a a sụọ a zụn a, a zụnshi ẹ ikẹn.
25
Ndị ezi-omumẹ a hụn ihiẹn a gụnnị wẹ e ri; kanị ẹfọ onyẹ eje-omumẹ a ra hụn ihiẹn-oriri.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes