×

Ika Bible 2018

Itẹn 15

1
Wẹ welụa ọnụ shịarị ịhịan oku, olulu a rọ; kanị wẹ weshi ọnụ elu gwa ịhịan oku, ọ kpasu ẹ iwe.
2
Oku-ọnụ ndị nwọn uche e mẹ ịhịan a chọ n'ọ marịn ihiẹn, kanị ọnụ ndị-nzuzu e hupụha oku nwọnlẹni isi.
3
Ẹnya Osolobuẹ rị ụzọ ile, e lee ndị eje-omumẹ lẹ ndị ezi-omumẹ.
4
Ọnụ hụn e dọnzi ihiẹn wụ osisi e ye ndụn, kanị ọnụ hụn e ku eje-ihiẹn e gbu mmọn ịhịan.
5
Onyẹ-nzuzu ara nị nẹdi ẹ zụn a, kanị onyẹ w'a dụn ọdụn o gi ẹ dọn e nwọnghọ uche.
6
Ihiẹn rị mkpa e jun iwe onyẹ ezi-omumẹ, kanị ihiẹn ndị eje-omumẹ e nwọnhẹn e buhẹni wẹ nsọngbu.
7
Ọnụ ndị nwọn uche e mẹsọnmẹ ịhịan a marịn ihiẹn, kanị ndị-nzuzu ara rodẹ ọhụn.
8
Ẹjan onyẹ eje-omumẹ chụn wụ arụ ẹnya Osolobuẹ, kanị ekpere mmaka ndị ezi-omumẹ mẹ, a sụọ Osolobuẹ ụsụọ.
9
Ụzọ ndị eje-omumẹ wụ arụ ẹnya Osolobuẹ, kanị ndị a chụsọn ezi-omumẹ a sụọ a ụsụọ.
10
Onyẹ gha ụzọ rị mma kpapụ, a fịan w'a eje-mkpịnsịn; onyẹ hụn sị agwakọ w'a ihiẹn ọwụlẹ k'a nwụnhụn.
11
Kẹ Ọnwụn kẹ Ntikpọ onwọnni hụn zuerini ẹnya Osolobuẹ — ọrịwụzị obi ịhịan!
12
Onyẹ-nlelịa ara chọ nị wẹ jụgbọ a; ara jẹndẹ d'a jụ ndị marịn ihiẹn ihiẹn.
13
Omẹni ịghọghọ rị ịhịan obi, ihun a sụọma a ẹmụ, kanị ụfụ rị ịhịan obi, o gbu mmọn a.
14
Obi nwọn uche a chọ n'ọ marịn ihiẹn, kanị nzuzu kẹ ọnụ onyẹ nzuzu e ri.
15
Onwọnni ụhụọhịn a rị onyẹ rị e ri ụya mma, kanị nke onyẹ obi rị a sụọ ụsụọ, ụhụọhịn ile k'o nwọnsọnmẹ anwịnrịn.
16
Ẹkẹrẹ ihiẹn ya lẹ egun Osolobuẹ wị ka mma karị okẹn akụ-lẹ-ụba ya lẹ nsọngbu wị.
17
Ebe wẹ nọ e ri mkp'ẹhụhụọ sụọ bụ ihiẹn-ọsụsụọ hụ a ka mma karị ebe wẹ nọ e ri nwa-efin duni bụ iwe rị arị.
18
Onyẹ e bukẹnrin olulu e se oku, kanị onyẹ ndidin e gbọn ikpe.
19
Ẹnya onyẹ-nzụnzụn, ogun gbọnkinsọnmẹ ụzọ, kanị ẹnya onyẹ ezi-omumẹ ụzọ rịchanrịn mma.
20
Nwa marịn ihiẹn e wẹhẹni nẹdi ẹ ịghọghọ, kanị onyẹ-ẹwobi e legberidẹ nnẹ ẹ.
21
Nzuzu a sụọ onyẹ nwọnlẹni uche, kanị onyẹ a ghọtanị a ghasọnmẹ ụzọ rị mma.
22
Ihiẹn ara gha omẹni ezigbo ndụnmọdụn arịa, kanị omẹni ndị ndụnmọdụn bu ọda, ihiẹn a gha ọhụnma.
23
Oku ịhịan shịarị danyechanrịn, o mẹ ẹ ghọghọ; oku wẹ ku ogẹn o furu a rịka mma.
24
Ụzọ ndụn ndị marịn ihiẹn a gha shikọ elu-elu, e mẹ wẹ adanlẹ la mmọn.
25
Osolobuẹ e tikpọ ikpụlọ onyẹ mpache, kanị o dọnmẹdẹni okpoho di ẹ nwụnhụn ihiẹn ẹ.
26
Iroro onyẹ eje-omumẹ e ze Osolobuẹ ize, kanị ọnụ-ọma a sụọ a ụsụọ.
27
Onyẹ ẹnya-uku e sehẹni ikpụlọ a nsọngbu, kanị onyẹ hụn ghalẹni a narịn ihiẹn furulẹni n'ọ narịn k'a rị ndụn.
28
Obi onyẹ ezi-omumẹ e rokpọ ihiẹn o k'a shịarị, kanị ọnụ onyẹ eje-omumẹ a shịarịhụ, e hupụha eje-ihiẹn.
29
Osolobuẹ a nọte anọte ebe ndị eje-omumẹ rị, kanị ọ nụ ekpere ndị ezi-omumẹ.
30
Ihun sụọ ịhịan ẹmụ, obi ibe ẹ a ghọghọ; ozi rị mma bịa, ndụn a ban ịhịan rudẹ ọkpụkpụ.
31
Onyẹ wẹ jụgbọ ọjụgbọ hụn e ye ndụn, o gi ẹ dọn, k'a rị imẹ ndị marịn ihiẹn.
32
Onyẹ hụn jụ ọzụnzụn e legberigụọ enwẹn ẹ; kanị onyẹ wẹ jụgbọ o gi ẹ dọn, rị e nwọnrin uche.
33
Egun Osolobuẹ e zin ịhịan amamihiẹn, onyẹ welụagụ enwẹn ẹ alị kẹ wẹ e ye ọghọ.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes