×

Ika Bible 2018

Itẹn 16

1
Ịhịan nwọn ikẹn rotọ ihiẹn ọ chọ n'o ku, kanị ihiẹn Osolobuẹ chọ kẹ ọnụ ịhịan k'e ku.
2
Ihiẹn onyẹ e mẹ rị a mma ẹnya, kanị obi kẹ Osolobuẹ e lele.
3
Bu ihiẹn ile che ẹka Osolobuẹ, ihiẹn i bu obi a gha.
4
Osolobuẹ nwọn ihiẹn o bu obi e mẹ ihiẹn ile o mẹ — o dọnmẹzidẹ ndị eje-omumẹ ndụn kẹni nsọngbu kunrun wẹ.
5
Ndị ile a pacheni e ze Osolobuẹ ize. Ya wekwọ ị ẹnya nị alakọ wẹ mmaka.
6
Ihiẹn-ọsụsụọ lẹ ezioku kẹ ịhịan gi e mẹ wẹ a gbagharị a njọ; egun Osolobuẹ kẹ ịhịan gi a gbanị eje-ihiẹn ọsọ.
7
Omẹni obibi ịhịan a sụọ Osolobuẹ ụsụọ, o mẹdẹ ndị-iṅẹnrẹn ẹ e gi ẹnya rị mma e lee ẹ.
8
Ẹkẹrẹ wẹ gi ezi-omumẹ nwọnhẹn ka mma karị ọda wẹ gi mmẹgbu nwọnhẹn.
9
Ịhịan nwọn ikẹn rotọ ihiẹn ọ chọ n'o mẹ, kanị ụkụ ịhịan e jẹn ebe Osolobuẹ chọ.
10
Ọnụ eze kẹ wẹ nọ a nụ uche Osolobuẹ, y'e gikwọlẹ ọnụ a han eje-eṅẹn.
11
Osolobuẹ sị ezigbo mkpu k'ọ chọ, wẹ ile rị imẹ ẹkpa ya wụchanrịn nke ẹ.
12
Ndị-nze ara gi eje-omumẹ mẹ ẹhụ, makẹni ezi-omumẹ kẹ ukpo-eze gi e turu.
13
Ndị e ku ezioku a sụọ ndị-nze ụsụọ, onyẹ e ku ihiẹn k'ọ nọ kẹ wẹ gi e mẹ ẹhụ.
14
Ọnụma eze nwọn ikẹn buhẹni ịhịan ọnwụn, kanị onyẹ hụn nwọn uche a marịnghọ k'o dọn rọ a.
15
Ihun sụọ eze ẹmụ, ịhịan a rị ndụn; ọhụnma eze nọzịkwọ kẹ orukpu udu-mirin.
16
Inwọnrin amamihiẹn ka mma karị inwọnrin goru; ịhanrịn nghọta ka mma karị ịhanrịn siliva!
17
Ụzọ ọma hụn eje-ihiẹn rịlẹni kẹ ndị ezioku a gha; onyẹ hụn a kpachanpụ ẹnya e bi rị e che ndụn a nche.
18
Mpache bịaọlẹ, ihiẹn e sọnn'ẹ wụ ntikpọ; enwẹn ịhịan junmẹ ẹ ẹfọ, o d'a dan.
19
Ọ ka mma nị ịhịan welụa enwẹn ẹ alị, wụrụ onyẹ wẹ rị e mẹgbu, karị n'ọ rị e sọn ndị mpache e keri ihiẹn wẹ napụ ịhịan.
20
Onyẹ gi ezigbo ihiẹn wẹ kuzi ẹ dọn, ihiẹn a ghan'a, onyẹ gi Osolobuẹ dọn ẹnya, ngọzi a wụrụ nke ẹ.
21
Onyẹ uche rị ẹfọ kẹ w'a sị n'o nwọnghọ nghọta, oku rị mma a kwadọn nkuzi.
22
Nghọta e yesọnmẹ ndị nwọnn'ẹ ndụn kẹ isi-mirin dọn a gbapụhasọnmẹ mirin, kanị nzuzu e sehẹni ịhịan afụnfụn.
23
Obi onyẹ nwọn uche a gwa ọnụ a ihiẹn o ku hụn ọnụ a gi a saẹka a kuzi ọhụnma.
24
Oku rị mma wụ ọgba-ẹnwụn — ọ sụọ umẹ-ndụn ịhịan ụsụọ, e mẹ ọkpụkpụ a a rị ikẹn.
25
O nwọnghọ ụzọ rị ịhịan mma ẹnya, kanị ọnwụn k'o shikọ.
26
Ẹfọ hụn fọn onyẹ-ọrụn e yen'ẹ ẹka; ẹgụn rị a gụnn'a hụ e nu ẹ a rụnwaye.
27
Eje-ịhịan a chọ ịhịan njọ, ọnụ oku ẹ e rẹn kẹ ọkụn.
28
Onyẹ e bi k'ọ sụọ a e sesọnmẹ oku; ọghẹlẹ e kebe ọwụ lẹ ọwụ.
29
Eje-ịhịan e dufie ibe ẹ, e mẹ ẹ a ghama ụzọ rịlẹni mma.
30
Onyẹ hụn e gbu ikpu-ẹnya rị a chọ n'o mẹ ihiẹn rịlẹni mma; onyẹ hụn tụtụma ọnụ a kwademẹgụọ n'o mẹ eje-ihiẹn.
31
Isi-ẹwọ wụ ugọn wẹ tu ịhịan gi ye ẹ ọghọ; obibi-ọma kẹ wẹ gi e nwọn ẹ.
32
Onyẹ nwọn ndidin ka odogun-agha mma; onyẹ ma kwọndọn enwẹn ẹ ka onyẹ ma mẹri obodo mma.
33
Ịhịan a tụ mkpọ, kanị ihiẹn Osolobuẹ chọ kẹ mkpọ e ku.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes