×

Ika Bible 2018

Itẹn 19

1
Ogbẹnnyẹ e dọnmẹ ẹka a ọchan ka mma karị onyẹ-nzuzu gi ọnụ a e ku eje-ihiẹn.
2
Ọrịnị mma nị ịhịan nwọn adụdụ bụ amamihiẹn arịa, mọbụ nị ịhịan hụhụ, fie ụzọ.
3
Nzuzu ịhịan hụ e wiwi ẹ ihiẹn, kanị obi ẹ hụ a kpọnị Osolobuẹ ọnụma.
4
Akụ-lẹ-ụba e wẹhẹ ọwụ bu ọda, kanị ịhịan dan ogbẹnnyẹ, ndị ọwụ a a gba a tọ.
5
Ọshẹri ntụ k'a tarịrị afụnfụn, onyẹ a tụ ntụ-ntụ alakọ mmaka.
6
Ndị bu ọda a channị okẹn-ịhịan ẹnya; ịhịan ile wụ ọwụ onyẹ e ye ịhịan ihiẹn.
7
Ize ogbẹnnyẹ e ze umunẹ ẹ ile — kị k'e mẹ ndị ọwụ a agbalẹn'a ọsọ? Ọ hụ a chụ wẹ, a rịọ wẹ, kanị w'a ra nọkunmẹ ẹ.
8
Onyẹ hụn nwọnhẹn amamihiẹn e mẹgụọnị enwẹn ẹ ihiẹn rị mma; onyẹ kwọnkẹnmẹ nghọta k'a gha ihun.
9
Ọshẹri ntụ k'a tarịrị afụnfụn; onyẹ a tụ ntụ k'a la iwi.
10
Onyẹ-ẹwobi efuruni e ri ụwa — ọrịwụzị nị igbọn kị ụmụ-eze!
11
Amamihiẹn ịhịan e ye ẹ ndidin; ọghọ a rọ n'o nu ihiẹn wẹ mẹ ẹ ẹka.
12
Olulu eze nọ kẹ ebe ẹwọrọ rị e dẹn, kanị ọhụnma a nọ kẹ igirigi ziẹnye elu irurue.
13
Okẹnnyẹ e zuzuni e wiwi nẹdi ẹ ihiẹn; nwunyẹ e kpe ikpe-ikpe lẹ mirin a tan ọtịntan-ọtịntan wụ ohu.
14
Nẹdi ịhịan e ye ẹ ụlọ lẹ ihiẹn ndị ọzọ, kanị ẹka Osolobuẹ kẹ ezigbo nwunyẹ gha a bịa.
15
Nzụnzụn e buhẹ okẹn-ụran, onyẹ ẹka-nkụtọpụ a ranhịn ẹgụn.
16
Onyẹ e mẹ ihiẹn Iwu-Osolobuẹ ku rị e che ndụn a nche, kanị onyẹ hụn gi ẹ e gu egu k'a nwụnhụn.
17
Onyẹ rị e mẹni ogbẹnnyẹ ọhụnma rị e zinye Osolobuẹ ihiẹn; o k'a kụ a ụgwọ ihiẹn o mẹ.
18
Fịan nwa ị mkpịnsịn, n'o gighọ a rị mma; e yelẹni ọnwụn ẹka gbu ẹ.
19
Onyẹ obi-ọkụn k'e girịrị isi ẹ buru ihiẹn rịn'a; ị zụọpụhagụ a, ị k'a zụọpụhazị a ọzọ.
20
A nụ ndụnmọdụn, a nị wẹ a zụn ị, o mẹgụ tan ị k'a marịn ihiẹn.
21
Ịhịan e rotọ ihiẹn bu ọda, kanị uche Osolobuẹ wụ ihiẹn hụn k'e mẹni.
22
Ịhịan chọ onyẹ wẹ gi e dọn ẹnya; ọ ka mma n'ị wụ ogbẹnnyẹ karị n'ị wụ onyẹ-ntụ.
23
Ịtụ-egun Osolobuẹ e dọnmẹ ịhịan ndụn, o mẹ ẹfọ e jun hụnyẹ, ọ ranhịn eje-ihiẹn ara ru ẹ ẹhụ.
24
Ẹka onyẹ-nzụnzụn a tọdẹ imẹ afẹrẹ — ara s'ẹka wekin ẹ che ọnụ.
25
Ị fịan onyẹ-nlelịa mkpịnsịn, onyẹ ọzọ te marịnlẹni ihiẹn e gi ẹ nwọnrin uche; ị jụgbọhụ onyẹ nwọn uche, o gi ẹ marịn ihiẹn.
26
Onyẹ kpari nẹdi ẹ, chụpụ nnẹ ẹ wụ nwa ịfa lẹ ụya.
27
Nwa m, i gọnbehi ntịn nkuzi, y'a ghabehi ụzọ amamihiẹn.
28
Ọshẹri-ntụ a mụdẹ ezioku ẹmụ; ọnụ onyẹ eje-omumẹ e luepụ eje-ihiẹn kẹ nni.
29
Ndị-ẹwobi kẹ wẹ dọnmẹtọnị afụnfụn; ụgba-azụụn ndị-nzuzu kẹ wẹ dọmẹtọnị mkpịnsịn.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes