×

Ika Bible 2018

Itẹn 2

1
Nwa m, omẹni y'e gi oku m dọn, bu ihiẹn m sị ị mẹ che imẹ i,
2
ghahanị i gọn amamihiẹn ntịn, lẹ ibu obi i che nghọta.
3
Ẹghẹẹ, omẹni y'a hị amamihiẹn, yikẹnmẹdẹ oro nị wẹ hụn ụzọ ye i nghọta,
4
omẹni y'a chọkẹnmẹ amamihiẹn kẹ w'a chọ egho, omẹni y'a chọ a ntan, chọ a imọn nọkẹ ihiẹn rị mkpa zuerini,
5
ogẹn ahụn kẹ y'e gi marịn ịtụ egun Osolobuẹ, wụrụzịkwọ onyẹ marịn Chuku.
6
Makẹni Osolobuẹ e ye amamihiẹn; ọnụ a kẹ ịhịan gha a marịn ihiẹn, ọnụ a kẹ nghọta gha a bịa.
7
Osolobuẹ dọnmẹni onyẹ kụrụ ọtọ amamihiẹn ihiẹn gi a ghan'a, ịya wụzịkwọ akpaịn ndị e dọnmẹ ẹka wẹ ọchan gi e che ẹhụ.
8
Uwẹ ile k'o gi e chedọn ụzọ ndị ezioku, e che ụzọ ndị e mẹ uche ẹ nche.
9
Ogẹn ahụn, y'a ghọta ihiẹn rị mma lẹ imẹ ihiẹn k'o furu lẹ imẹ onyẹ ọwụlẹ k'o furu — ghọta ụzọ ile hụn rị mma.
10
Makẹni, amamihiẹn k'a ban i imẹ obi, ẹfọ ka gha a sụọ ị nị y'a marịnghọ ihiẹn.
11
Ezigbo uche k'e chedọn i; nghọta k'e che i nche.
12
Amamihiẹn k'e mẹ i wanahịn eje-obibi, obibi ndị oku-ọnụ wẹ zinlẹni —
13
ndị latọ ụzọ rị mma ghama ụzọ gba-ishi;
14
ndị hụn eje-ihiẹn a sụọ omumẹ — hụn a ghọghọdẹni eje-ihiẹn jọgbu enwẹn ẹ,
15
hụn a ghasọnmẹ ụzọ zinlẹni, e mẹ ghẹrẹ-ghẹrẹ-ghẹrẹ.
16
Amamihiẹn k'a zụọpụhazị ị ẹka okpoho ọzọ, ẹka eje-okpoho ọnụ-ọma,
17
hụn latọgụ di-ụtụntụn a, latọ nkwa o kwe idẹnya Chuku.
18
Mmụlọ iwe ẹ wụ ụzọ ọnwụn, ụzọ hụ ọ ghakọ pụ alị-mmọn.
19
Onwọnni onyẹ e jẹn ebe ọ rị hụn e kinhẹnni mọbụ a saẹka e ru ụzọ ndụn.
20
Nwọnrin nwan amamihiẹn, kẹni i gha ụzọ ezigbo ịhịan, ghasọnmẹ ụzọ ndị ezi-omumẹ.
21
Makẹni ndị e dọnmẹ ẹka wẹ ọchan k'e bisọnmẹ alị; ndị nwọnlẹni nkọrịanị k'e bisọnmẹ imẹ ẹ;
22
kanị wẹ jẹnkọ d'e bepụ ndị-ejẹ alị, huepụ ndị ihunnaị rịn'a.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes